To share what i see…

好多人當初對iPhone 3GS 既推出不寄語厚望，因為無咩特別，一樣既樣，只係快o左。到現在iPhone 3GS正式出街，美國銷情理想，香港更加唔在講，呢幾日Twitter 朋友們主要話題唔係”會唔會買”，亦唔係”會買邊隻色，16GB定32GB”，而係”邊度有得賣？”，因為和記門市大部份賣斷市，而Apple Store淨機亦由首賣日24小時內出貨到現在五至七個工作天先出貨，熱銷情況可想而知。

好多人好奇iPhone 3GS同上一代一舊樣，點解仲有咁多人追捧？除左蘋果效應，影相拍片只係”導火線”，速度至係主要因素。只要iPhone 2G/3G裝左有返咁上下軟件，而o個o的軟件你係常用，唔難發現每Switch一個App，Nag Screen都要等好幾秒，如果o係iPhone只會用一兩個App問題不大，但如果好多App就會有”愈用愈慢”既感覺。如果你係未用過iPhone而有興趣買，我覺得3GS係唔錯既選擇，如果你已經用緊2G/3G，咁就要衡量下你係用好多App還是只係講電話同用Safari上網，後者就算你換 3GS差別亦不大，相反前者就非常值得換機(相信換左3GS既朋友無幾多個會反對我呢種講法)。

另一個好多人問既問題：新客上唔上台好？舊客加唔加監好？定係買淨機好？請恕小弟數學差，計唔到出面o的平均成本俾大家睇，但有以下結論：

- o係和記開新號碼或者轉台一定最著數，至於用邊個月費計劃，根本唔可能用”平均成本法”釐訂，除非你諗住湯卡個台俾其他人用，如果唔係應該按自己需要揀計劃。如果講最不化算係HK$138計劃，因為同HK$198或以上計劃相比，機價爭成HK$2,000。
- 舊客對加監九成九都係好抗拒，而收費之複雜我諗由Sales解釋俾你聽比較好，簡單o的一句：加監成本唔係平淨機好多。不過事實係，如果你買部淨機返黎到頭來都係用返和記既話，加監又如何？
- 和記對舊iPhone 3G客戶有提供收機服務，大概3K左右，我個人建議自己去先達搵收機佬收機比較好，最少都有幾舊水差額，拎黎捐左佢都無謂益和記。

App Store成功造就Hardware Crisis，即係軟件愈來愈強而同時顯得硬件滿足唔到軟件要求，用家自不然要換機，扭轉換手機只為追款的市場定律，將90年代電腦發展方程式套用落電話，這條戰線足以慢慢把玩。