香港有個奇怪現象：無論亞記點努力提升電視節目質素，每況愈下o既無記總能獨當一面，而且同亞記距離越拉越遠。小弟認為原因同亞記方向錯誤有關，佢地想做得比無記更好，其實觀眾就係想睇o的一成不變同唔好o既o野，而o係做得差呢方面無記做得非常好，因為佢地深明香港人o既核心價值 - 又要小又要睇，跟3仔客戶又要小又要用不謀而合。大家唔好以為我潤緊用3仔o既人，事關我都係三號倉o既長期監躉(仲要坐多三十六個月)，繼續用係因為睇過影帝張家輝主演o既”旺角監獄”，領略到”由一個台轉去另一個台只係等於由一個監倉轉去另一個監倉”o既道理。iPhone熱賣o既同時其實佢都係一艘沉船，邊個台有iPhone賣客量自然暴升，服務素質或多或少會下降，我唔相信會有telco可以多左一倍客服務會好左一倍，呢個沉船理論我相信不出幾個月就會應驗。

作為三號倉o既頭號打手，今次為各位同倉介紹呢個倉o既唯一娛樂 – 3Screen，只要各位係新入冊或者加監買iPhone4都會多o左個一年監躉娛樂通行証。比較奇怪係三仔好似無乜點講3Screen點用，所以我問o左嘉禾而且親身去o左戲院換免費戲票求証，方便各位倉友參考。

如果有睇過基本介紹應該知道3Screen係指每名客戶可以o係逢星期三於全線嘉禾戲院換領戲票一張，不過其實唔係任揀戲睇，亦唔係指定戲，而係指定院號，總之所有o係三號院做o既戲當日都可以睇，由於海運無三號院，所以可以睇唯一o個個院o既戲，例如剛過去o既星期三就可以睇”Inception”(片長關係要俾多HK$10)，原來做監躉都OK喎!!

換飛流程係咁o既，各位倉友用你地部iPhone4打*369，幾秒之後就會收到確認SMS。憑SMS落戲院就可以換飛(理論上只要戲院出o左星期三o既Seat Plan就可以落去換飛，唔一定要等到星期三)。職員會用你部電話傳一個空白短訊覆返Send短訊俾你o個個電話，幾秒後會再收到有確認碼o既短訊，職員抄低確認碼後就會刪晒所有有關SMS然後俾飛你，That’s All。

剛剛呢個星期三我係成功用3Screen換o左叛諜狂花o既戲飛，原本真係好抵，可惜套戲真係流爆，又或者我患上Christopher Nolan Symtom – 即係睇完佢o的戲之後有好一排睇其他戲都會覺得唔好睇。Anyway，各位倉友除o左透過嘉禾網站可以睇到三號院有咩戲上，亦可以用嘉禾官方售票iPhone Check去查。最後留意，當你星期三換o左飛之後，倉友可以o係星期四打*369再Claim過免費飛。
官網介紹： http://iphone.three.com.hk/website/global/popup.html

嘉禾院線網站 / 售票iPhone App

認識我o既朋友都知我平時帶兩部手機o係身，因為工作需要我一定要有後備，多得3香港呢部後備經常用得著。記得有次搭緊地鐵o個陣，收到公司系統Send過黎o既SMS通知有Server出問題，當時架地鐵o係荔枝角站，正當我諗住用iPhone上網o既時候…..係上唔到網o既。我一路試一直試，試到長沙灣站–>深水土步站–>太子站–>旺角站–>油麻地站–>佐敦站–>去到尖沙咀站，終於…..都係上唔到，大家估下我最後點搞公司部Server？

檢視較大的地圖
http://bit.ly/doaclB

最後我係去到尖沙咀港鐵站D2出口出面個PCCW電話亭(見上圖Streetview)用WiFi上網，用數碼通或者其他台o既人，你地明白我地o既感受未？用3香港之後，我覺得自己有兩樣o野係進步o左：第一樣o野係EQ，第二樣o野係”聯想詞庫”。(好多時我地聽電話其實只係聽到對方所講o既50-70%，剩低o既30 – 50%其實係利用大腦內置o既”聯想詞庫”功能併合出黎。)

作為一個仲有十二個月先出冊o既監躉，我黎緊生日，端午節，中秋節，重陽節同埋聖誕節o既願望除o左係世界和平之外，就係希望多o的人轉用數碼通(當年我用緊崎寶上網o個陣都有類似o既願望)，唔知兩個願望邊個容易實現o的呢？

當去到人生最絕望情緒最低落o既時候，人自然會為自己找到極樂 – 極度樂觀之人生觀。
「無欲無求，來亦何哀，去亦何苦」

Click here to view the embedded video.

正所謂爹親娘親都不及李爸爸親，不知不覺李爸爸由各位出世之後，阿媽抱你出院o個一刻已經開始照顧你起居飲食。今天政府唔起公屋，唔起居屋，連大家可以買到平o野o既公屋商場都賣埋俾領匯。不過唔緊要，因為李爸爸o既百佳大把平o野賣，仲會幫你”日日賺”，好過買股票!! 李爸爸仲幫香港人o既品味增值，將百佳Upgrade做Taste，等大家買o野都買得有Taste o的。所以計我話，李爸爸出品，必屬堅料，死Network呢o的事係無可能o係3發生，我作為頭號粉絲有必要為3平反!!

首先，我認為返工放工搭地鐵上唔到網或者勁慢係十分應該o既，因為返工放工o個陣根本就唔應該上網，3十分明白都市人忙到連自己休息時間都照顧唔到，特登俾機會上班一族有休息時間，唔似得數碼通咁，返工o係地鐵係咁玩Facebook Twitter，返到公司仲邊有心機做o野呀大佬？仲有你地知唔知真正令人與人之間距離拉遠係乜？係電話呀!! 荃灣打黎旺角又搵到你，台灣打黎旺角又搵到你，你地有無諗過如果電話窒下窒下，成日斷線，雙方就會自自然然約埋o係間Starbucks慢慢傾，呢個先係真真正正令人與人之間距離拉近o既辦法。

如果大家都係唔信3係幫緊大家，我再舉一個親身見證跟各位分享。話說小弟上個月某個晚上用緊iPhone上網等緊五月天歌迷會網站九點正賣飛，正所謂冥冥中自有主宰，我相信3係知我已經買o左飛唔上我徙錢睇多場，特登踏正九點令我上唔到網，仲要岩岩好淨係o個幾分鐘上唔到。最後我慳返幾百蚊，你地話3係咪比任何一個台體貼先？但係班3用戶唔珍惜3俾佢地o既機會，仲要返過來投訴3，有無搞錯？

昨晚3網絡”升級”o個陣，我同女友食緊飯，我無得上Twitter，佢上唔到Openrice，試問各位有幾耐未試過呢種Internet in the dark o既體驗？科技發展使人懶惰，3再次喚起香港人o既勤奮精神，比起Google提倡樣樣都靠Search Engine更偉大!! 多謝3，I love you !!