我經常說去食店是一種體驗，吃只是體驗的其中一部份，我愛觀察食店周邊，包括環境，亦包括店員和食客，通常去到一些未去過的食店都會觀察周圍研究他們是”怎樣做”的？是成功還是失敗？失敗例子有綠寶石餐廳(現址為旺角友誠地庫的美心快餐)，明明在港鐵站出口旁邊，佔盡地利，卻生意淡薄，名符其實的旺中帶死。成功例子有明將，這樣的劣食奇葩，仍然受不少食客追捧，當中除了有部份死士，其餘大部份都是普通食客，幫襯原因跟該區人口結構或多或少有點關係，他們口中的美食，我們眼中的劣食，能夠坐在那處感受這份強烈對比或多或少能令各位學會多點珍惜吧？
今時今日品牌形象十分重要，而建立品牌形象的其中一個重要元素是特許以至連鎖經營。上星期經過登打士街，見到台式飲品”真珠”賣緊十幾蚊仲要買一送一仍然銷情冷淡，相反貢茶企硬HK$12杯仍然大排長龍。珍珠奶茶其實不是甚麼專利發明，其實間間味道差唔多，貢茶唔會特別好飲，真珠唔會特別難飲，只係貢茶成功另消費者覺得飲貢茶比較有Taste，情況其實有點似Starbucks。
說到連鎖食店，我以前是許記甜品的常客，因為我是芒果怪，但近年唔知是我不幸還是他們不幸，次次吃到的都是酸芒果，好像專挑的，之後好一排都沒有幫襯過，近排比較多吃發記。不過我亦不忘試試其他非連鎖甜品店以發掘新款式。以下兩家店是我近期頗欣賞的。
土屋位於女人街近廣華那邊，是上文提及過旺中帶死的那一類，每次去之前都擔心會結業。當初欣賞他們是因為其木糠布丁，有水準之餘亦有份量。上星期再幫襯他們的綿綿冰跟Apple Crumble亦是不錯的選擇，尤其Apple Crumble，對我這類不愛東尼黃那種喪甜的人來說甜度剛剛好，只是3.6奶凍比較遜色(跟小甜谷差太遠)。
認識甜品莊是因為有天乘地鐵回家看到的一個易拉架，話雖同在青衣，但那家店跟我家有一大段距離，很少機會經過。我看了Openrice的食評，看到食評不多，但個個讚不絕口，更有人說是酒店級，感覺有點打手成份，因此我決意去探過究竟。
那個特濃朱古力蛋糕味道以至口感跟Royce的朱古力很相似，但價錢只是廿多元。
甜品莊的好評所言非虛，如果款式更多，老闆有東尼黃咁靚仔，生意應該更上一層樓，可以五天工作週。
上星期跟朋友們吃完晚飯到土屋吃甜品兼吹水，坐到有點不願離開，因為冷氣太舒服，不太冷不太熱的，然後大家在研究為何土屋甜品質素跟生意不成對比，我們得出結論是，可能因為他們沒有深水土步甜品名店殮房般的冷氣，可能食物沒有”食神”所說的求其：
張檯有咁窄得咁窄，張凳有咁迫得咁迫米等D友坐得咁舒服，
食完拿拿聲好走，支飲管有咁粗得咁粗，冰有咁大舊放咁大舊，杯汽水咪
chur一聲飲完買過第二杯囉。你係咪新黎架呢D野要我教，你唔好一尾得
個up做啦仆街！
離開時經過西洋菜街，看到許記甜品繼續大排長龍，有點戥土屋不值…….
上星期問及友人她的擇偶條件，其中一樣是工作(人工)有返咁上下，有長遠大計搵大錢。
在此要為”港女”平反，要求男友有錢唔係港唔港女o既問題，其他地方唔敢講，住得o係香港真係有結婚打算o既每每講到將來都係錢，如果用更現實更刻薄o既講法係：呢度係無精神生活，無錢只能夠過精神病生活，香港女性想forsee一個幸福將來難度有錯嗎？
而小弟絕對有她所說的相反。無錯，我係一個無乜大志o既人，我工作不是求賺大錢，夠食已經心滿意足。就算唔識得我o既都應該知我夢想係開餐廳，講到呢個位通常朋友都會問：你想開乜o野類型餐廳先？我o既答案係：我想開一間串鋪!
記得早幾年有次去o左元朗人氣日本料理”田中”，朋友們呆企o左成粒幾鐘終於入到去。因為每檯限食45分鐘o既關係(留意呢間田中唔係食放題的)，我地一坐低就用極速九秒九Order食物。食物的確係唔錯，我地食到差唔多之際，友人見到隔離檯碟燒三文魚鰭好似好正，正當想落Order o既時候，個Waitress話：你地差唔多夠45分鐘喇喎!朋友答：我五分鐘食得晒(當時已經食o左40分鐘)，個Waitress再答：你五分鐘食到o者，我五分鐘燒唔到麻。呢間鋪絕對係串爆，但唔係我所講o既串鋪。
我所指o既串鋪唔係指服務差的鋪，係指o個o的”自主性”好高o既鋪。人地麥記為o左做多o的生意，由開十幾個鐘做到開足廿四個鐘，偏偏有o的鋪反其道而行，每日只開幾個鐘，一個月唔開一個星期(聯記)，落雨唔開(媽咪雞蛋仔)，心情差唔開，最吹漲係：咁做都未執，仲好好生意。我就係想做呢o的串鋪。
小弟家住青衣，上年在開飯無意中找到一家在青衣涌美的車仔麵檔，不過實在太遠(話就話青衣係個島，兩點距離其實可以好遠下)，最後無去到。後來幾個月前飲食男女介紹過呢間車仔麵檔，因此決定去拜會呢間華記小食店。上個月頭未去大阪之前上過去一次，拉左半閘，當時係兩點十(間野收三點)。月頭再去過，早o左十分鐘，今次無拉閘，不過已經收晒檯。上星期，我本住唔信邪o既精神再去過，今次終於食得到!!可能因為太晏去(佢地開上晝七點)，感覺有點似食緊佢地o的貨尾，味道係正常， 不過未去到要特登上去食o既地步，但總算可以一償心願。
1)最好十二點左右到，話就話收三點，過o左兩點可能已Close。2)逢星期一唔開，就算唔係星期一去都最好打去問o左有無開先好去，唔係去到摸門釘唔好怪我。3) 睇清楚路牌，因為間鋪o係幾入下。
華記小食店
電話： 24360710
地址： 青衣涌美老屋村90號地下
檢視較大的地圖
好多人覺得因為我食得多，所以食得奄尖。非也，其實我覺得最重要係食得Make Sense，有返咁上下貴的話有要求係相當合理，反之食Cheap野當然無得要求多多。但係我份人比較老土，我接受唔到油渣麵加火腿加豬頸肉，油渣麵精髓就係在於夠Cheap，加埋o的咁”高級”o既餸咁不如換埋蕃茄湯底同黑豚肉啦。
昨日Happy Sunday訓到下晝三點，懶洋洋起身然後四點行樂青怡鳳城食個車仔麵，唔駛趕頭趕命，廿蚊三個餸，大大碗車仔麵，蘿蔔大份到好似食o左半碗飯。其實食車仔麵都係求方便，講價錢o者，如果食到趕頭趕命就真係無晒意思。我唔敢講呢間o野會好食過華記呢間”名店”，不過食得最開心都係o係鳳城。
盛惠HK$20 o既”鳳城”車仔麵
鳳城小食店
電話： 24956683
地址： 青衣青怡花園青怡廣場地下G22號鋪
檢視較大的地圖
“串鋪”背後…..
華記小食店營業時間係上午七點到下午三點，一星期開得六日，究竟係點維皮呢？今天有人話如果食店時薪HK$33好多鋪會執笠，其實反過來呢種講法潛台詞係”我地剝削工人既合情又合理”。而我呢篇文想提出o既係，唔同食店有唔同既生存之道，包括唔需要剝削工人o既生存方式。幾年前搞零團費o既旅行社話唔逼o的團友買o野維唔到皮，其實有無諗過呢種根本唔係可持續o既營運模式甚或唔應該有呢種Business？同樣如果唔靠剝削就會摺埋o既食店，其實係咪要諗下可能真要被逃汰呢？
香港互聯網出了個Openrice，從此多一了個渠道可以令寂寂無名o既小店可以搖身一變成為排長龍o既名店。好食之人可以車費都蝕埋去上水廣成冰室，因此我認為只要食物做得好，大家係唔介意俾多些少錢去幫襯食店。
好似對上一兩年真君寶誕都有跟朋友談及，不過談及的時候已經完了，很多朋友都沒機會去看看，但今次介紹時還是真君寶誕介紹的第二天，各位朋友還是有機會可以進來青衣看看。
Read more…
Recent Comments