To share what i see…

作為食肉獸，小弟十分愛Pepper Lunch，雖然佢o既價錢一o的都唔平，不過以質素黎講佢o既價錢尚算合理。當初Pepper Lunch o係香港落戶o係APM foot court只此一家，當時我好想佢可以開多幾間分店唔駛下下都要過觀塘食。到依家Pepper Lunch朗豪坊，新港，奧海城等地方都有o既時候我先發覺問題所在。平時我地行港九各區大型商場買衫買鞋已經差唔多係同一個clone，點解依家連Food court都要食埋一模一樣o既野？香港係細，但係未至於連Food Court都無選擇掛？

小弟一個月總有幾次落高登黃金，但講到食就真係好少上西九龍個Foot court。其實佢地個Foot court呢一年都裝修過好幾次，座位擺放又調過好幾次，主要係因為裝修完都係無乜人流。 到年頭佢地再大執一次Food court，將o的鋪位拆細變做”格仔鋪”再租出去。當時我壞疑咁細間鋪可以賣咩食，估唔到依家又做得幾喎，至少Keep到人流。

上星期應該係佢地轉”格仔鋪”我第一次上去，由於每間鋪頭面積細左，變相鋪頭數目多左，食o既選擇自然都多左。有咖喱，有泰菜，有我最愛o既酸辣粉，如果一班人上去可以多試幾間不同菜色，而大部份食物廿蚊左右已經有交易，相對鄰近食店可謂十分經濟。小弟食過唔錯o既有FULL HOUSE，呢間韓國菜係韓國開，廿蚊一個紫菜包飯餐，正宗口味價錢亦十分相宜。另外o係正隔離o個間Tasty，一件窩夫加一杯紅豆冰，又係廿蚊。在此我想特別推介Foot court內的浪燒一品，用三四十蚊o既價錢可以食到好味足料o既大阪燒(唯一分別係呢度菜多過蛋槳，我覺得問題不大)，唔係呢度我真係唔知邊度食到喇。

由於Foodcourt選擇實在太多，其他o既留待各位自己親身發掘吧。西九龍中心搞呢類Foodcourt實在係唔錯，俾人一個努力o既機會總好過一個被剝削o既機會。

串燒好多人都愛吃，不過要食得飽通常都所費不菲(相對啦)。以前青衣長發村巴士站對出有個阿婆o係街邊整炭燒串燒，到依家為止仍然係小弟食過最大份最抵食既串燒，可惜自從領匯重整商場後趕絕左車仔檔，呢檔阿婆串燒絕跡人間。講返o的”尚存人間”既，近期小弟食過四間串燒都唔錯可以為各位推介。

1) 華記小食 – 位於尖咀寶勒巷分叉位既華記小食，串燒水準Keep到，兼且係四間當中整得最快，岩我呢o的EQ低既人。友人最鍾意o係度買完落附近酒吧開餐，而我就鍾意呢度既秋刀魚同埋佢個沙嗲底，算係比較突出。

在較大的地圖上查看NetBugs 美食版圖

2) 和味 – 對正西九龍中心正門，過左十一二點可以坐o係出面食，呢度最出名係燒原條茄子，小弟試過的確一流，至於其他食物就一般啦(主要問題係份量激少)。留意多人既時候可能要等兩三個字。還有就係，食酸辣粉最好過返隔離街傷心食….

在較大的地圖上查看NetBugs 美食版圖

3) 棟篤食 – 呢度既棟篤脆雞同串燒都唔錯，最特別係串燒個沙嗲汁，唔只有花生味，仲真係有粒粒花生，小弟都係第一次見識咁既醬。

在較大的地圖上查看NetBugs 美食版圖

4) 美食佳 – 呢間o係紅磡既串燒車仔麵小店算係區內奇葩，零晨三點去到o的檯檯凳凳霸晒成條街咁濟，原因好簡單：平。兩個人食串燒埋單HK$80一找可以飽既算係咁啦。

在較大的地圖上查看NetBugs 美食版圖