前陣子，中央政策組首席顧問劉兆佳說過香港或已到達臨界點，而我自己同樣游走於臨界點 -- 面對社會的不公義與失望，究竟我應該選擇留守，為社會出一分力，還是離開這個我唯一的家? 這個問題我一直在思考，而因為一個人，我一直傾向選擇後者，那個人正是這幾天鬧得熱哄的梁美芬。

早於她近幾天的連番偉論前，我在上月頭及上年一月已經提及過這個人令我對社會有多失望。

(節錄)末日的話：現實

公投一役，我無期望，但係仍然失望。更叫我失望係一位民選議員 – 梁美芬。

我知道梁美芬呢個example我講過上萬次，但係都要講，尤其如果睇緊呢篇文o既係投過佢票o既選民。我化o左灰都會記得記者問佢點睇有外國領事聲援劉曉波，佢話咁樣”有可能引致當局加重對劉的刑罰”，呢句說話唔應該會o係法治社會聽到，更加唔可能出自法律學者把口，如果為人師表教學生打家劫舍，你話個社會仲有無希望？香港仲係咪一個法治社會？

(節錄)絕望與希望

在聖誕節，劉曉波因為煽動顛覆國家政權而入獄，翌日我們的立法會議員，”法律”學者梁美芬這樣說：
在內地同類案件，通常只判三至五年。她指，外國領事聲援劉曉波，有可能引致當局加重對劉的刑罰，「因為佢（中央）可能更加覺得，其實劉曉波不是劉曉波，而是好多外國勢力在背後，可能造成一些反作用，也不出奇。」(原文)
當”覺得”變成”理所當然”，香港的學者也變得人治，怎能對活在的這個地方不感到失望？

 

以前，我覺得像霍震霆那些出值率近乎零的功能組別議員最差勁，但原來那些議員比”食o野唔做o野，做o野打爛o野”的梁美芬議員已經好得多。

以法律學者身份說人治，以民選議員身份卻不知民間疾苦，還要反過來說要懲罰選民。

我們沒有時光機，選民並不可能預計來屆那個候選人做得好，因此選票從來是用作認同或懲罰現屆政府。但現在不用時光機，選民都應該知到梁美芬有多差勁。在此我要申報立場，我是泛民支持者。泛民有泛民的立場，我們支持民主政制改革，建制有建制的立場，民建聯工聯會的立場就是沒有立場，而在沒有立場那個立場方面他們非常堅定。無論各位支持泛民抑或建制，基於民主社會，就算如何不同意亦會予以尊重，但轉軚歸轉軚，總不可能將對的說成錯，錯的說成對吧?

當一件錯事有一百個，一萬個人說是對的，那件事就好有何能變成對的，要避免這樣的災難於香港發生，我們有必須要撥亂反正。然而我有參與71遊行，但我可沒有叫林瑞麟或者曾蔭權下台此等口號，原因十分簡單 -- 他們不是我們選出來，叫”下台”對我來說只是”嘥口水”，因此我只是一直叫他們”仆街”。但梁美芬可有不同，她是民選區議員，民選立法會議員，香港人有權”懲罰”這個說要懲罰選民的議員。

我並不知道梁美芬背後有甚麼政團跟宗教團體支持，但我懇請各位香港人，由年底區選開始，到下年立會選舉，好好考慮一下應該選一個怎樣的的議員代表自己，如果民建聯參一腳我甚至會支持建制選民投民建聯，可能這樣說有點反智，但我可我寧願民建聯當選也不願看見一個這樣無恥的人代表市民走入議會。同時我想告訴對選舉冷感的選民，精英時代已經過去，現在投票並非選賢能，而是選個”無咁差”的出來，出來投票吧，不要讓那張熟悉的面孔給你後悔多四年。

這不是關乎政治立場，而是在於良知，再一次懇請各位，別讓歪理成為真理。

延伸閱讀:

各界狂轟「抽水芬」被指轉軚反邀功

做人尚且知恥，況乎議員！

梁美芬惹反彈 區選勢被狙擊 迅速派單張被斥「抽水」

投棄權票 梁美芬達32次

給當日高調支持梁美芬、基督教12領袖的公開信

梁美芬惹反彈 區選勢被狙擊

我相信有10萬人不想梁美芬再當選議員

如果說，香港是本難讀的書，那七一遊行就是這本書的精讀，但政府可曾有認真翻開過這本書？

如果說，董建華最大的用處是香港人可以把所有問題怪罪於他，那今天林瑞麟可以取代他的位置嗎？

自零三年起，七月一日已經成為遊行代名詞。有趣的是，每年政府總要在七一前夕”刻意製造”一些議題好讓民怨沸騰，先不談林瑞麟那筆，警方叫遊行人仕不能使用樂器，其實即是叫人可以帶樂器吧？不是”刻意製造”是甚麼？我認為，讓七一遊行升溫，其實是給機會政府降溫。一來七一的確是一個一年一度給市民消消氣的機會，二來它亦是給建制派及政府擱置倒行逆施政策的一個下台階，三來就像我開頭說過的，遊行是香港精讀，遊行人仕有著不同的訴求，一天遊行已經取代政府平時要做N年的諮詢，問題是政府有無用心聆聽遊行人仕的訴求？管治危機與改善機會其實只差一線，政府選擇前者還是後者？

今年七一，我是抱著審慎心態估算遊行人數，然而民怨累積至一定程度，但遊行那浸”涂”其實不大，而且沒有一個一致認同的議題出來。廿二萬這個數字是預期之上，雖然難與零三年比較，但一個數以十萬計示威者的遊行絕不能小看，外國鮮有，就算有也是人口比香港多幾倍的城市，因此政府不能視若無睹，亦不能說遊行人仕是小數，同樣我們亦不會說同日千人慶回歸的是小數一樣，我們的聲音，同樣需要重視。

從零三年起，遊行趨勢是訴求越來越多之餘，近年訴求與訴求之間開始出現矛盾。例如107動力好煙民大聯盟，又或者新來港家庭爭取權益與抗議蝗虫的相關團體或人仕。感覺告訴我，一個本身訴求互有矛盾的遊行對政府其實頗為有利，因為政府可以按自己需要隨意標纖遊行人仕訴求再加以回應。而對政府來說，更幸運的是現屆政府沒有一個像董建華這樣有凝聚力的戰靶出現。不過我覺得，按照社會形勢，”戰靶”應該很大機會重臨，如果CY是下屆特首，想信他定必當人不讓。

今年遊行給我第一個訊息是 -- 天有眼，我第一次相信天。因為相比星期二某團體”so call”包圍立法會的傍沱大雨，七一絕對是天公做美。遊行人仕訴求各有不同，先撇除大路議題，有要求香港自治，有要求正視棺材房問題，有設立奶粉離境稅，有爭取同志權益，未親眼見過的話很難相信原來反對豁免基因改造木瓜都可以是示威訴求，如果政府可以解決當中一半問題，應該不會像現在那麼弱勢。

遊行人仕大致上分三類，第一類是打頭陣聲嘶力竭，即是庫斯克老師這幾天重提劉細良提出過的”卡啦OK式政治”。這類示威者嗌完激烈口號，上到政總踩一踩林公公紙板洩憤後，轉個身可以落國金Palace IFC看變型金剛，政府越來越對這類示威者視若無睹，因為政府”終於”明白兩件事: 1) 班友仔遊行完就”無o野” 2) 我o既選民得八百個，有七百萬人出黎遊行都唔關我事。第二類，亦是佔遊行大多數的，沒有激烈口號，Banner亦未必拉多條，沉默的由維園行過去政總，這類人對政府同樣十分不滿，與其說反政府，不如說他們想給政府一個”善意提醒”。第三類是近年冒出頭來的行動派，透過較激烈(至少社會普遍認為)抗爭逼令政府就犯。

七一那天我跟友人們走到接近修頓球場，遊行人士步伐開始放慢，當時我跟其他遊行人士都以為是警察不開路，有示威者向灣仔電腦城天橋上的警察高呼開路，有人更大叫”開槍”，後來才發現是”人民力量”集結了大班示威者堵塞道路令後來的示威者未能前進，當時是警方以人鏈方式區隔集結示威者我們才好不容易走過修頓球場。直至行過金鐘社民連街站，有人嗌咪說警方在修頓封路令示威者未能前進，有示威者當場糾正嗌咪那個人，告訴他是人民力量在堵塞道路，並非警方封路，及後嗌咪者聲稱消息來源是人民力量，要糾正就找人民力量糾正。以上都是本人的親身所聞。

首先，我不肯定”人民力量”是否因為警方曾經封路而決定集結，但可以肯定在我之後的示威者都因為人民力量而”受阻”，錯誤訊息對警方實是有欠公允，這樣的話我們跟”警長是及示威者害死”的人有甚麼分別? 我個人立場一直是，遊行人士沒有必要跟”所有”警察形成對立面，眼見網上有不少網民以”警犬”形容警察，其實他們也得維持基本秩序，可能有部份會對示威者不禮貌，但我相信大部份警察都希望遊行能夠順利進行。眾所週知港島交通就算沒有遊行都會嚴重滯塞，要協調兩者並非易事。

至於人民力量，當我行過修頓球場再回望轉頭，只能說他們的確很有橋。我得承認，由社民連到人民力量，我曾經覺得毓民是在分裂泛民，對香港民主進程有負面影響。現在回看，我是錯的，政府跟人民力量這類團體其實是相輔相成，不是政府的視若無睹就不會有這樣的激烈抗爭，正如八卦雜誌一樣，有這樣的讀者就有這樣的雜誌，同樣地，有這樣不堪政府就有這樣的政團。這令我想起”武狀元蘇乞兒”，電影結尾皇帝說丐幫弟子幾千萬，一天不解散，叫他怎能安心。周星馳說: 丐幫有幾多弟子唔係由我決定，係由你決定。如果你真係英明神武，令到國泰民安，搵鬼得閒做乞兒咩?

原則上人民力量所作所為我是理解的，不過我認為，群眾運動要取得成功，當然不一定要七百萬人都上街，但大前題是需要一定的民意支持。有參與五區公投的選民意願固然值得尊重，我也是其中一員，但投票率毫無疑問反映變相公投是失敗的。開講有話: 失敗乃成功之母，一直拿投票人數出來耀武揚威而不知失敗為何物，又何以取得成功呢? 我支持人民力量繼續以擦邊球方式作實質抗爭，但在動員以外亦多請convince一下普羅大眾，例如香港人眼中只有錢，可以嘗試從這個方向作困綁，畢竟民主公義從來都是為建設更好的社會而生，包括更好經濟。

下午三點半，走入維園這個蒸籠，蒸了兩個小時才開始出發。坦白說，我跟朋友們有好幾個路段都是行旁邊行人路(算是走捷徑吧？)，由天光行到天黑，最後我們都用了足足五個小時才完成整個遊行。我想說的是，各位可以不認同遊行這種手段，但不能不予以尊重。

遊行人仕其實可以在這個公眾假期睇戲，唱K，甚至在家中睡一整天，無必要在烈日之下行幾小時，為甚麼要這樣辛苦自己？

梁振英說譴責激烈示威，那為何會有激烈示威存在?

這一切都源於不公義制度，民主社會可能一樣有替補機制，但他們有公投法。現有議會往往未能反映選民意願，政府往往不到絕境，不聽民意。我們經常說上一代給了我們這一代一個爛攤子，但我們這一代又打算給下一代一個怎樣的香港?

遊行走到末段，差不多到匯豐總行，一整條行車線都是粉筆子，有訴求，有不滿，這個畫面對我震撼至極，那時是晚上八時，曾蔭權當時安坐在伊館欣賞慶回歸十四周年音樂會，而遊行未完政府已經做行貨回應，他們是否真的清楚粉筆紙訴求的一字一句?  看到這樣不滯的政府，我不時都渴望，主可以給我一個答案，因為那些我們痛恨的高官以至建制派議員都是教徒來的。

神可能會寬恕一個每天都去懺誨的賊，但我不會，因為我是人。

延伸閱讀:

Quoted from Kursk: 懇請大家就算不支持, 也請嘗試去諒解承受風險進行抗爭的朋友們。他們不是為了攪亂社會, 而是為了迫使無賴的政府對話。若果他們成功了, 好處是所有坐在家中的人也享受得到的。

點解香港會變成咁

其實要convince香港人好簡單，因為我地都係睇表面做人，餐廳門面企企理理我地就”假設”你係衛生架啦，廚房污糟有老鼠唔緊要，你唔好俾我食緊o野o個陣見到就得喇。不幸地，今日真係俾我見到老鼠。

話說小弟上年睇過Mr紅館演唱會，由於唔係特別鍾意，買o左最平飛，坐最後一行。無可否認上年演唱會氣氛一流，不過可能因為坐得太後，其實上年我同朋友們成場演唱會凈係聽到迴音，純粹靠Melody估歌詞，話就話係平飛，不過從來無人同我講過買平飛會聽唔到歌，But fine，一分錢一分貨，我無火滾。撇除人地坐時光機抄佢地歌，我覺得佢地真係有感染力，我Buy，所以今年買貴一級，坐22行，未睇前覺得個位都OK，演唱會一開始就瀨o野了。

以前我以為舞台勁唔勁係睇開幾多場，因為場數越多舞台budget就越多。Mr完全推倒我呢個諗法，原來只要有大Label贊助，開兩場都可以喪爆煙花，今次舞台效果我用浮誇形容絕不為過，但係演唱會最基本o既都做唔得好，做任何事幾好都係徒然，我講緊係聲音。

上年聽太細聲，今年聽大聲到真係耳聾，耳膜有痛楚感覺，我有大半場演唱會都係”黯”住耳聽，對我黎講簡直係嘈音Level，我聽兩晚五月天都無咁誇張。紅館坐位分價錢從來都係講緊同舞台距離之分，主辦單位有責任應該ensure所有觀眾都可以正常聽到欣賞到表演者演出，呢方面今次真係極差。

除o左音響，有樣更過份係，對正中央o既主控台，即係廿行左右位置。平時會有張演唱會大Poster貼o係度，今次o係張大Poster上面裝o左塊LED板專出字幕俾Mr當貓紙駛。呢塊LED板唔止出歌詞，仲Informative到出埋下一首唱咩歌，Mr各成員要講咩。換句話說，Mr未唱未講，觀眾只要望望塊板就會知道佢地將會唱咩同講咩，連”多謝Fans”都打埋出黎，駛唔駛呀？

小弟雖然無H網友一個星期睇幾次演唱會咁誇張，但總算係睇得密o個批。之但係我從來無見過咁大塊貓紙板，要打入健力士問題不大。

貓紙，甚至咪嘴，大把人做，我亦唔係針對Mr，問題係，你唔好俾我知麻，仲要揚到三面觀眾有兩面都可以望到塊咁很大o既LED板，情況就好似David Copperfield一邊表演魔術一邊俾你睇到個魔術係點做出黎咁。

今天是Mr最後一場演場會，也是我最後一次看Mr演唱會。

夠竟一年可以有幾多改變? 一年前，我寫過呢篇文，講到自己有幾咁熱血，一年後又如何?

我做邊行大家應該都知，好多時候個客問埋o的根本同我公司完全無關係o既o野，岩岩前排先教過個客點樣搵返Canon相機跟機隻CD，裝個Software睇RAW，友人笑言話我就黎連性病都幫人睇埋。無論係幫客，幫朋友，甚至同自己完全無關o既人，我一直都有一個信念，幫客固之然可以加強個客對我地公司loyalty，但更重要係，我好想借呢o的一點點o既幫助話俾所有人聽，呢個世界係有好人，好事，從而感染其他人，呢個係我改變世界o既方法。

可惜事與願遺，呢一年裡面，我發現我呢種改變世界o既方法為我帶來o既結論竟然係: 對別人公平，等於對自己不公平。QA同IFGo係節目經常語帶相關講到我做老闆好過癮，咁有錢又點會明”我地”o的平民百姓有幾慘丫。實情係，返工仲慘過打工仔，每日食完飯都想衝出馬路，我Detail到諗埋衝出去可能自己死唔去反而累街坊，司機唔死可能隔離大廈地下打緊邊爐o個班人死。之但係我實在比太多人幸運，而更重要係屋企人，女友，朋友，同公司o的客。一個咁怕死，咁理性o既我，活，很難，死，更難。我一直都明白，一分耕耘唔一定有一分收穫，我要求好簡單，俾返個打工仔待遇我，雖然我知無公道，但係對我公道o的，可以麻?

一年前我覺得世界的確唔係平等，社會公義唔係守株待兔得來，係人自己建構出黎，依家社會唔公義唔可以怪個天，要怪就要怪人，要撥亂反正應該係由始作俑者，即係人去解決。一年後我終於明白，因為人o既一種本質，社會係唔可能有真正o既公義 -- 弱肉強食。又或者咁講，所謂公義，公平，只係粉飾”弱肉強食”呢個客觀事實，而我o既結論係: 做人可以自私，但係唔好太虛偽。

特首選舉已經啟動(我無講錯，人地外國選舉係先拉票，然後搞一日投票，之後開票公佈當選人，我地o係投票之前一兩個星期已經知阿爺欽點o左邊個，投票當刻已經可以謝票，Skip o左一個step，全宇宙只有一個國家可以未投先知，學王國興話齋: 真係有o的自豪!!)，其中兩個較具話題性o既大熱門分別係梁振英同唐英年。我屎忽痕o係Google 分別Search o左佢地兩個名，睇下有咩Result。梁振英Search到o既有: 梁振英落區 指屯門規劃未完善，梁振英：應助港人內地配偶，為何梁振英可以做新香港良心，睇黎正面到不堪。再睇下唐英年: 唐英年指香港沒有地產霸權，唐英年語無倫次，陳方安生搖頭O 嘴，唐英年話要強化貧富懸殊。我o既結論係: 下屆特首應該係…………唐英年。

可能你會問，梁振英作為政府中人，佢都站在人民o既一邊去做反對派? 佢仲唔係新香港良心? 點解仲要揀語無論次o既唐英年? 答案已經係個問題度。

梁振英係行政會議成員，政府重大決策佢都唔可能無Say，換句話說，佢小緊政府o既o野佢自己都有可能有份參與，咁樣黎屈政府機我都戥曾蔭權可憐。有人將梁振英同功能組別o既泛民議員相題並論，大家都係”體制內抗爭”。我唔敢話唔岩，但係前者係有實權，後者只係橡皮圖章。Anyway，好聽o的香港人比較單純，難聽o的，我地都係Buy偽善呢味o野。而我認為，一路走來，思路最清晰係唐英年，唔係梁振英。

由佢不否認要加強香港貧富懸殊，到指香港無地產霸權，叫八十後問自己點解做唔到李嘉誠，立場一致而堅定，從不轉軚。聽落好仆街，實情係佢都明白我剛才講過o既客觀事實 -- 社會根本就係弱肉強食，與其好似梁振英咁扮好人，咁不如我直接同大家講加強貧富懸殊。o係M型社會生存，唔想做貧o既一邊，就要做富o既一邊，叫八十後做李嘉誠其實係為我地好。唐英年講o既都係中肯，發自內心，佢先係真正o既香港良心，佢張身分證應該有四粒星。

o係唐英年做特首o既年代，應該主張”真人治港”。作為納稅人，我一直認為，最浪費公帑唔係搞五區公投，係做公眾咨詢，既然咨唔咨詢結果都係咁，點解要扮民主呢? 林瑞麟就醒目喇，識得Skip o左呢o的多餘o既Step，不過佢個替補機制有個好大問題，就係建制派唔撈o既話有機會俾民主派替補，我真係十分擔心。其實替補機制有可能違法違憲，還掂都係違法，不如一不做二不休……不過咁樣，我唔係做”社工”，思想無咁暴力，我主張和諧，務實，理性。要堵塞補選漏洞，唔洗殺人放火o既，好簡單: 取消直選，連帶功能組別都取消埋，所有議員委任產生。

選舉本身就係浪費公帑，成日話泛民建制選票係64比，但因為功能組別，議會聲音同民意從來都係相反，政府搞咁多o野都係唔想有民主者，咁點解係都要搞埋o的浪費公帑o既假民主呢? 我已經忍泛民班仆街好耐架喇，搞咩環評司法覆核丫?大佬呀，呢個世界環境只會越來越差，理得佢破壞生態，拿拿林起好佢等我地呢一代有得用啦。再者，其實香港人都唔係好支持民主者，上年五區公投，大家只係識講浪費公帑，從來無深究個議題本身，如果當初建制派出黎選，我地呢o的反民主o既人就有機會投票俾建制派踢走o個五條仆街，佢地淆底無計喎。又或者如果我話，五區公投可以零公帑做到，香港人反响又會唔會咁大呢? 講到底，大家未必係老實，但肯定現實，愛錢不愛民主………Come on，做人唔好咁假，係咪係o羅。

本人極度期待唐英年治港o既黃金盛世，正所謂”信佢，你將來都會有”。我地將要面對新一輪o既價值觀衝擊，一個唔駛帶假面具o既新香港，一個你爭我奪o既香港，一個理順分化o既香港，遊行應該跟發叔而唔係民陣o既香港。唐英年，我愛你!!!

前排睇過一部電影，其中一段講述哥哥o係零三年四月一日自殺身亡，身為哥哥Fan屎o既主角講o左句話:

點解唔係譚詠麟?

以上對白的確比較激，不過唔多唔少反映當年張國榮同譚詠麟Fan屎的對立程度有幾誇張，就好似依家Android撚同iPhone撚咁，求其上個Forum時不時都會見到兩派用家互相指罵。我立場好簡單，自己覺得邊樣好用咪用邊樣o羅，理得你係Android撚定iPhone撚，關我撚事咩? 之但係我對某個品牌的確係有偏見，呢個偏見要由一句說話講起….

話說N年前，某個品牌出o左新Product，實物出o左街之後好多人都滴晒汗，當然亦有唔少人撐，我問過其中一個撐呢件新Producto既Blogger，依稀記得我係咁問o既: 呢期XXX俾人屌到爆喎，點解你可以寫到咁勁? 某Blogger答: 寫o係咁寫o者。

講真，年中出垃圾Product o既品牌大把，某品牌只係其中一員，要數最差都未必輪到佢，Fair o的咁講，點唔好用但都算襟用麻。但呢句說話，真係好影響我對某品牌觀感，因為由o個一刻開始，每逢有Blogger對某品牌讚好，我都會覺得係假o既。

過o左好一排，我o係朋友間圍內聽過一個傳聞，與其話傳聞，不如話係公開o既秘密。有人幫某品牌搞o左一個Campaign，就係”做”一件事，然後將呢件”做”出黎o既事變成一宗新聞，目的當然係為宣傳，朋友間當呢單o野係笑話咁聽。不過講好笑應該都唔會好笑得過俾Jetso要你Review但係唔可以俾人知，其實怕成咁，點解唔做好自己Product，反而要大耍金錢o係呢o的位呢? 唔通真係學黃子華話齋: 係咁架啦，好出奇呀? 又或者咁睇，事不關己，己不勞心，呢o的o野認真就輸鳥。

以上故仔可能大家覺得似曾相識，無錯，我係將o係blog或者talkonly時不時會提o既幾件事remaster做一個故仔。其實寫前寫後我都覺得，經常抽友人一句說話黎講其實好無品。更重要係，人地當時真係當你係”朋友”先講自己感受俾你聽，我o係度有必要鄭重對呢位朋友講聲: 對唔住，萬二分抱歉。

雖然，我係有偏見，但我講呢件事出黎目的唔係要針對友人或者某品牌，因為我並唔相信呢個地球得一個人或者一個品牌會咁做。

Anyway，故仔已經講完，經過上篇文講完人格分裂之後，我對呢方面有更深入o既了解，因此我將以我其中兩面人格為呢個故仔作出雙結論。

結論一

2011年6月15日，即係上星期三，有個示威者企上中環心臟地帶o既天橋頂企圖跳橋，期間有個警長o係上第二條天橋頂o個陣失足墮下身亡，我不厭其煩再講多次，警長身亡我都唔開心，但係無人想，包括示威者，你可以唔認同示威者行為，但係唔可能講到係個示威者害死個警長。無論警長點解要上天橋，係咪上同一條天橋都唔係重點，重點只有一個 - 呢個係一個意外。

呢單新聞我Quote過唔少次數甚至同朋友們有過”激辯”，因為呢個實在係一個好好o既通識課題。尤其係討論有關傳媒取態。而其中，明報翌日有一段相關新聞報導，標題係咁寫：

老差骨阻企跳墮橋殉職 闖禍示威司機叩頭認錯

無睇清楚，甚至有睇清楚內文o既讀者都可能以為件事好似TVB o的劇咁，警長同示威者糾纏，期間警長意外跌o左落橋。可能你會話：So what？如果示威者無上天橋，警長就唔駛死。我會答你：1) 我夠膽100%肯定，有唔少香港人到呢一刻心目中都有我岩岩講o既Picture。 2) 可能真係有人了解駛成件事之後都會覺得示威者錯晒，但係難保有一個人唔係咁諗，可能只有一個人，但係一個都係人。

講o左咁耐，我想講o既係 – 訊息傳播o既威力。只係一宗新聞，一個標題，字眼有些微調動，讀者觀感已經可以好唔同，何況係打手文？

互聯網係訊息傳播o既利器，你可以用黎傳播好o既訊息，亦都可以用黎傳唔好o既訊息。零三年沙士肆虐，四月一愚人節當日就係有個十四歲o靚仔發佈o左一個假消息令到所有香港人都步入惶恐狀態，我深信呢個蝴蝶效應係個o靚仔始料不及。人本來就係生命影響生命，各位o係互聯網發佈o既一字一句，無論事無大小，都有一定o既力量，都有可能左右一個人o既決定，所以我一年前已經講過：講各位相信o既o野，寫各位相信o既o野。

一年過去，一年我擔心互聯網資訊會因為越黎越假削約其可信度，依家唔需要再擔心，因為已成事實。依家阿邊個同o個個o係Forum鬧交，第一句唔係問候人娘親，係直斥對方係打手。 我講緊唔係一個打手做或者一間PR公司，而係變o左一個生態。上面個故仔係想話俾各位知，你地唔駛懷疑，我唔係講緊Urban Legend，呢個世界真係有打手，打手可以無處不在。可以叫你去買一部電話，亦可以叫你去睇一套非看不可o既電影，反之亦可以彈爆一樣o野去打擊Competitor，甚至兜一大個圈鬧一個competitor其實係唔想益另一個competitor。當打手變成一種生態，呢樣o野已經改變唔到，話”講各位相信o既o野，寫各位相信o既o野”已經Out晒，要改變o既唯有係讀者或者消費者。

o係資訊爆炸年代，我地要比以往睇更多，了解更多，我地再唔可以，又或者講，我地不嬲都唔可以靠傳媒，傳媒俾咩我地照單傳收係超錯，因為我地唔係機械人，我地亦都唔係AI，傳媒俾屎我地食我地係有得揀唔食。我地應該靠我地自身o既判斷力去決定乜o野係自己認同，乜o野係自己唔認同。我並唔認為呢個世界係非黑直白，我講o既o野你都未必岩聽，最重要係：你想o既係咩？你相信o既係咩？

結論二

搵食啫？犯法架？我想架？

其實寫手(無論係網上網下)就好似食肆咁，上晒岸就梗係可以挑客啦，你有無見過澳牛o的waiter笑住問你”先生今日想食o的咩呀”? 仲係游緊水o個o的咪又係要派傳單，笑笑口咁問個客想點。同樣地，可能真係有好少部份上晒岸o既可以鍾意點講就點講，但係仲有大部份都要睇客份上。大時大節，定時定候俾Jetso你，到要寫o野，真係有o野要彈o既時候你真係會彈？點都會留一手卦？就好似依家同你講蔡瀾轉頭會黎你間鋪試食，你有無可能用返”平時”待客o既態度對佢？煮返”一樣”o既o野俾客食？就算你平時做得幾好，最後你對蔡瀾只會”比好更好”，我諗呢個大家都明喎。

早排拜讀過庫斯克老師一篇博文 –  博客不是打手。佢講o既我大部份都唔同意，點解做Blogger一定要有潔僻？點解Blogger一定要義正詞嚴？點解做Blogger只可以為興趣？點解Blogger唔可以搵錢？講真丫，現實世界人與人之間o既猜度一早已經存在，膳稿o既o野o係互聯網流行之前已經有，依家之不過係互聯網同社會接軌。再者，打手，五毛黨，我唔做，人地都做啦。”結論一”個NetBugs都癡癡地線，我做寫o個個之麻，信唔信係睇o個個決定，點解要賴晒我？如果佢因為信我而瀨o左o野都係佢自己問題，講完。

———————————————————————————————————–

雙結論已經講完，各位可以按自己需要睇想睇o個個結論，無論邊個結論岩聽甚至無個岩聽，最尾一句說話想同各位講。雖然我唔知點解鐘錶廣告會有句咁o既Slogan，但係我覺得幾有意思，作為呢篇文o既結尾。

Follow your conviction.