To share what i see…

說電影工業一直在進步一定沒錯，但如何把這種”進步”量化呢？小弟印象較為深刻的例子是上年年尾上映的Tron: Legacy跟1982年的Tron，一方面可以感受到這三十年電影CG技術之極大差異，另一方面不得不反過來驚嘆Tron的電影製作團隊如何在三十年前拍出這樣的Sci-Fi片(這個說法同樣適用於回到未來三部曲)。

作為觀眾，有兩個電影突破對我來說都印象深刻(當然不包括黑白到彩色，怎樣說我也是個八十後!)。第一個是侏羅紀公園，因為這部電影我迷上了史提芬史匹堡(這份迷戀至強戰世界告終)，他讓觀眾知道原來CG是可以這樣做，把幾千萬年前的畫面真實地呈現於幾千萬年後的觀眾眼前。第二個是3D，3D原意是令電影更為貼近真實，現在卻淪為片商掠水工具，甚麼XYZ也要加個3D。事實上現行技術根本並未能令電影更真實，但觀眾卻無情情要多付近一倍的票價入場。雖然我說到3D有多差勁，但肯定片商不會放過這塊肥豬肉，剛剛3D化後重映的Lion King在美國票房很大機會破億。將一式一樣的東西3D化又可以大撈一筆，誰會放棄？

由黑白到彩色，由彩色到3D，電影院衍生了不少新技術，像IMAX巨幕，體感坐椅DBOX，甚至於電影院內散發氣味(將上畫的”非常小特務決戰鎖時狂魔 4D”每人會附送刮刮卡一張，在電影放映期間按指示刮卡上的特定地方刮刮卡便會散發當時場景的氣味，這樣也想得出來實在無言以對)。這些電影的新技術以至進步有著同一個目的 --  令電影更真實。如此推論，一套電影不一定要讓觀眾相信故事是真的，至少覺得有可能(就是我們經常說的”說服力”)，做到這點的電影失敗極也有個限度。今次介紹兩部電影，分別是”Apollo 18″跟”那些年，我們一起追的女孩”，前者想觀眾相信是真的，後者是九把刀真人真事自導自編。

Apollo 18強調電影是真人真事，事實是，導演根據一些聲稱的事實，再加一些聲稱的事實片段，再自己拍片補完整個”故事”，簡單而言，這就是動新聞的製作模式，當然成本高得多，我說的是跟動新聞比較，如果與Hollywood A級製作比這仍是小本經營。雖說電影背景是外太空，但場景其實寥寥可數，說穿了就是把Paranormal Activity搬上外太空拍一次。導演用上太量CG令影片看上來像真的從太空拍，又提出了大量理據去說服觀眾這是”堅料”，如果觀眾相信有Apollo 18的可能性，電影還是有一定可觀性，否則可以差勁到割凳的地步。

“那些年”是九把刀自己求愛失敗的半個自傳式電影，電影於台灣大穫好評，叫好又叫座，現時票房跟另一大熱台片”賽德克.巴萊”分庭抗禮(只是同人唔同命，魏導還在欠下一屁股債)。電影內所有角色(除了彎彎是虛構的)都是”真名”來，惹來大量網民人肉搜尋九把刀的女神”沈佳宜”，窺看一下是甚麼樣子，”沈佳宜”真人更因此要離開台灣避風頭，看見電影之厲害。電影內容不談太多，只能說，有過戀愛，有過青春的人，很難不為此電影而動容，電影令每個觀眾都憶起自己的柯敬騰跟沈佳宜。其實求愛失敗沒有甚麼大不了，要將故事浪漫真實地表達出來，實在不能不給初執導演筒的九巴刀極高評價。唯一令本地網民總怒的不是電影不好看，是電影竟然要到下月底才上正場，其實今個月香港亦沒有甚麼大片上，究竟香港發行商霍士在避甚麼？Anyway，電影現時每週末都有售票優先場，觀眾可以留意霍士影片Fan Page公佈售票時間。

人最可怕的不是死亡，是衰老。那人最重要的是甚麼呢？是記憶。每段記憶都是唯一的，人的一生沒有任何比這個更寶貴，因為你的認知，情感都是靠這個記住。記憶的寶貴在於其”唯一”，因為單向的人生路上不可能從來，做錯的事可以補救但不能改正，SD卡壞掉去旅行時拍的照片全沒了亦不能重拍。我們的進步，我們的一生都是從記憶演化。然而人類記憶力未必有限，但因應我們需要傳承我們的智識和文化，因此我們發明了語言，透過語言溝通，透過文字將認知傳給下一代。由文字到聲音，到現在的影像，人類對於傳承記錄有著更完整和普及的媒介。

偶然在twitter看到有人post了一段youtube，是廿年前TVB”笑星救地球”其中一個環節”九七前後”的片段，片段裡九七後的黃一飛一邊抽煙一邊隨地吐痰，廿年後的今天相信那種諷刺時弊節目難以在電視看到(頭條新聞算是”死剩種”)，那是為什麼呢? 八九十年代，羅文可以大方露股為雜誌拍封面，為何廿年後一個更開明的香港不容許這樣的事情發生，是因為羅文露股不文明，還是現在社會比過去更不開明呢?

回望過去，現在的媒體看似越來越多樣化，但空間卻有收窄的趨勢，對著我們這一代人看似沒有甚麼大不了，但到下一代回望我們這一代的人和事，了解的可能會越來越少，形成一種惡性循環，我們寶貴的”記憶”很可能會未能傳承給下一代。而這種惡性循環同樣發生在剛提及的TVB。

這一兩年TVB有製作”光影流情”以至還在播出的”香港演義”等介紹香港七八十年代的節目，當中不乏一些過去電視劇的片段亦反映到當時環境甚至市民生活習慣。如果廿年後TVB製作類似的節目介紹現在的香港又會怎樣呢? 家家住大屋，人人用SonyEricsson手機，個個都爭產，我們逢星期一至五看到的TVB劇集，不是時裝劇，不是古裝劇，是超現實，是Sci-Fi。

有關TVB的問題，不其然又回歸到”有蛋先還是有雞先”，我自己一直傾向有這樣的觀眾才有這樣的節目。而根據市場供求定律，既然TVB有一定數量的觀眾，不論做得有多差亦不能推倒，要推倒只能用更好的。情況就像現在Google+跟Facebook相互制衡形成良性競爭，監管機構明知ATV長年虧損無力反擊甚至無力製作節目，令TVB在零競爭下一台獨大，他們有著無可推卸的責任。現在癌症到了末期，只能輕嘆 - 光影不留情。以上的稀噓其實一直都在心中存在，只是前陣子在戲院看”勁揪福祿壽”，電影本身從”得啖笑”角度絕對合格有餘。但這樣的TVB製作跟其電視劇一樣，對這個年代毫無益處。套用胡恩威一句話: 俾Junk Food我食唔緊要，但可唔可以有返些少有益o既食物?

說畢一大輪，是時候說回正題，前陣子看過本地超低成本制作電影”不設房”(據了解製作成本兩萬，應該是小弟在大銀幕看過最低成本電影)，從成本角度看成價比甚高，正如有Blog文說過一句，有些電影拿著幾千萬成本拍出來還是像垃圾一樣，”不設房”實在拍得有板有眼。從觀眾角度，記得前陣子看未入場我第一樣留意的不是劇情(利益申報: 當初入場主要是撐辛比)，而是門券標題其中四隻大字 -- 獨立電影。

獨立電影大意是指沒有龐大片商資本下拍出來的電影，包括小弟在內，相信不少觀眾未入場先被四隻大字嚇怕，覺得獨立電影都是沉悶，不明所以。”不設房”沒有以上原素，反之娛樂性豐富，甚至稱得上為Pop Corn Movie，劇情荒旦但對於社會問題十分到肉。比起桃姐或者歲月神偷等本土電影，”不設房”對七八九後可能更有共鳴。

其實很早以前已打算在此為各位介紹這套電影，只是早前在Art Centre上過兩場便沒有下文，如果介紹完原來沒有地方上映就沒有意思。現在電影落實在The Grand Cinema十月每個Weekend放映一場。(信得過我推介的話)不妨購票入場支持一下本地創作吧。

(講明先，不喜勿看)

我對宗教一直有兩個睇法：1) 宗教多數都係導人向善 2) 教徒得兩種，一種係好虔誠，好似舅父咁，另一種係純粹”Lam”著數。依家有第三個睇法：宗教間接或者直接導人搵錢。前者因為宗教使人積極，o係社會有返咁上下積極性通常都搵到錢，搵到錢自然有奉獻啦。之於後者，你地最好問下本地某o的宗教團體或者吼天犬喇。我講緊o既宗教唔一定係基督教天主教佛教之類，”生果教”都可以，你唔有返咁上下積極，點可能年年奉獻o的錢俾佢買i乜i物？唯一唔同係，生果教教徒只能虔誠，要從教主身上Lam著數應該無咩可能(或者考慮買AAPL)。點解要講咁多呢o的呢，因為我除o左係虔誠o既生果教教徒，仲係另一個宗教教徒 -- 五月天教(五迷)。

小弟由五月天第二張專輯開始聽，由香港第一場演唱會睇到去小巨蛋，由Stayreal”潮tee”買到”潮袋”，就算唔係最Hardcore都唔可能話我係偽飯。佢地第一次登上大銀幕我又點能夠錯過呢？為o左Ensure可以開畫日睇到，我o係一個星期前已經訂定飛買個好為睇3D五月天。片就已經睇完，係時候講感想。

我見台灣有影評用”給五迷的禮物”形容3DNA，而我認為3DNA係”給五迷的考驗”，因為唔係有返咁上下虔誠都好難對3DNA”讚好”。全片95分鐘，三份一係o個三個短篇故仔，餘下演唱會3D片段佔三份二，前者根本就係2D黎，至於後者，大部份近鏡都係取景於紅館五月天演唱會，由於拍攝3D好視乎畫面距離感，紅館個台咁細，無論拍攝到鏡頭擺位都有極大限制，效果有幾”好”可想而之。從一個電影觀眾黎講，將一個不完整o既演唱會中間仲要零碎地加插三個短篇故仔，我真心唔想得罪五迷，但係除o左不輪不類，我真係諗唔到其他形容詞去形容呢部片。如果從五迷角度，或許3DNA真係一份禮物，我知道本地有歌迷包場去戲院睇3DNA仲要包場，從Facebook睇佢地Message好似好High咁。但我真係想講一句，你地買隻DNA Live Blueray包場拎去戲院播肯定會High過睇3DNA，起麻真係睇緊個完整o既演唱會。

總括黎講，虔誠o既五迷睇完3DNA一定係興奮無比，情況就好似果粉入去Apple Store朝聖一樣，明明賣埋o的o野仲少過黃金，明明只係兜過圈，但仍然感到異常興奮。但作為一個五迷，一個維護五月天o既歌迷，如果你唔係五迷，我唔係唔建議，直頭係唔想你睇。睇五月天演唱會，我夠膽講任何人都可以情緒高漲High番天，但係3DNA完全睇唔到五月天o既感染力，我當然係想未曾認識五月天o既朋友睇偶像最好o既一面啦。我建議係，下次一係正正經經整個3D演唱會，咁樣左Cut一忽右Cut一忽在插三個故仔，真係好難睇。電影受眾比睇演唱會o既廣，一係學教會咁包場俾五迷睇，否則電影推得上大銀幕市場最好照顧下大眾感受。又或者倒返轉問五迷，如果有個人唔知五月天係乜水，走o左入去戲院睇3DNA，睇完你估佢會有咩反應?

話說小弟上星期去日本，o係twitter提及要租電話同買電話卡，仲有開Skype做飛線，好多tweet友問o左同一個問題：乜真係慳到咩? 小弟特別為此寫o左呢篇分享希望幫到各位準備去日本自由行o既朋友。

如果大家有睇開我個blog，應該都知道我舅父一家o係日本傳道，自311地震發生後，因為我地o係香港o既屋企人好擔心佢地，所以叫佢地要多o的打返香港。隨之而來o既問題係：長途電話費好溶!! 可能你會問：IT人無理由唔識Skype掛？識唔係唔識，問題係唔係全家都識麻。所以當時諗到個方法：開一個Skype In o既日本號碼，再Skype Out去一個香港屋企，咁舅父就可以透過Skype In日本電話打到俾我地而婆婆又識聽，一來舅父免除IDD錢，另一方面Skype Out個Rate肯定化算過傳統IDD好多(其實)。點解提呢樣呢？因為去日本做飛線漫遊正正係將呢個方法倒轉黎做。

先講講背景，由於小弟Working Day聽電話(即打入)甚多，如果用一般漫遊下期月結單甚為和味。舉例說，如果漫遊打入每分鐘係HK$7，假設打入有120分鐘，費用就係HK$840。(呢個計法係用最平o個間Docomo計，如果漫遊跳o左去Softbank打入成HK$20一分鐘，因此無論各位有無打算另外租電話，去旅行前記緊留意當地漫遊收費，落機鎖定用最平o既網絡商。)如果用Skype飛線的話，費用慳唔少。

租電話方面主要方法一兩個，一個係o係香港預先租，一個係到日本機場租。香港租的話幾乎係得一間公司做 – 日通國際，大家或去有些許印象，因為本本旅遊精讀都有佢地廣告。五日租機費用HK$190，出發前一兩日上中環Office取機，返港後一日還機。好處係打Softbank同台大部份時間免費，同埋免除o係機場攪一大輪(去旅行要爭分奪秒麻)。唔好處係…岩岩講Skype飛線方法用唔到，如果無估錯係因為佢地有自己香港飛線來電服務，所以Block o左其他飛線。至於日本租機，以Softbank為例，租機費用為日費250yen(最少要用三日，當然我估你用一日俾三日錢都得o既)，以小弟去五日計，費用就係250yen x 5 + 325yen (行政費)，兌返港紙約HK$160，一來平過香港租(如果齋租iPhone SIM卡日費更平)，二來借機還機相當方便(可以o係成田借，羽田還)，三來經小弟測試肯定可以做到Skype飛線，唯一缺點係日本打日本要收成104yen一分鐘。

假設去日本五日，五日打入120分鐘，如果用傳統飛線的話，成本如下:

3HK打入漫遊 120 x HK$7.9 : HK$948

如果用Skype飛線的話，成本如下:

Skype In香港號碼(最少預繳三個月): HK$150
Skype Out日本話費 (假設打入120分鐘): 約HK$200
Softbank租電話費用: 250yen x 5(五日租金) + 325yen(行政費) = 約HK$160
合共HK$510

如果用飛線漫遊的話，成本如下:

飛線漫遊(以一電通為例): HK$2.49 x 120 = 約HK$300
Softbank租電話費用: 250yen x 5(五日租金) + 325yen(行政費) = 約HK$160
合共HK$460

總括黎講，如果聽唔太多電話，其實用Skype飛線反而會用多o左錢(飛線漫遊都係唔錯選擇，因為無月費，純粹逐分鐘計)，我個case 係因為要聽客電話，所以用呢種方法封頂，好多人漫遊完都收到震撼帳單，以往因為無日費漫遊，有關數據o既震撼帳單比較多，依家因為聽電話而衍生o既震撼帳單亦都有唔少，小弟就試過就咁漫遊買到成部ipad返黎。

講o左一大輪好似好複雜，其實最主要Step只係三個: 1) 租電話/SIM卡 ( 上Softbank Rental可以預約機場Pick Up兼預先知道手機號碼方便做飛線) 2) 上Skype.com買本地先上號碼同轉接來電到Softbank手機號碼 3) 將你本身電話飛線到你o係Skype買o既8字頭線上號碼。

Softbank會俾一個袋你，入面有齊火牛電話同借據，還o個陣一次過俾返佢就得。

借機同還機Location相當就腳，話唔定你未開始搵已經見到。

如果唔多用電話的話，其實漫遊都唔係問題，不過要留意漫遊到當地網絡商，唔同台收費可以爭好遠，以3HK為例，日本接聽電話(打入)，用Softbank每分鐘HK$20，Docomo只係HK$8。打出的話3HK有提供回撥(Homedirect)，收費平好多，各地漫遊收費詳情應該有詳列於有關網站內，3HK o係呢度。當然亦可以考慮用Skype打電話，咁就要講到點上網。

要o係日本隨街上網，選擇有兩個，日費漫遊同儲值卡，後者比較多人講係b mobile o既U300 SIM卡，一個月費用3,000yen，速度限制為300kbps，一般上Facebook Gmail查下o野係OK o既，甚至我試過放落Pocket Wifi做Share都仲得，問題在於因為得300kbps，其實只要兩個人同時上網就會開始Lag爆，所以唔介意俾多些少可以用Platinum o個張(5,280yen)，不過買得Platinum，如果你唔係去一頭半個月咁不如用返日費漫遊無咁煩。留意張SIM卡係要用日本本地手機號碼做一次Activate先用到，一係自己租電話Activate，一係搵人幫手(根據Research，成功率唔係100%，日本人好怕用自己手機幫外來人攪呢攪路)，一係打上hotline攪，但hotline星期六日同假期都無人聽，詳細方法可以睇呢度。

Q1: 點解唔直接用Skype聽要再Skype Out?
A1: 因為Skype o係3G表現其實唔多穩定，同Skype Out出返傳統電話的話爭好遠。用iPhone的話仲有可能Miss Call(話時話，用Skype飛線記緊你部電腦/iPhone/Android要Logout)。

Q2:點解你舅父唔用寬頻電話?
A2: 印象中我係有買過俾佢之後好似無續到，始終一掂到電腦o既o野，你地覺得好簡單o既o野長輩都係未必識用。如果長期使用的話其實香港寬頻2b電話同新世界Nettalk都係唔錯選擇，前者仲有埋個iPhone App俾你聽電話，不過收費差唔多係後者三倍。

TIPS1: 如果用Skype打傳統電話(即係打長途)，你可以o係Skype.com設定對方睇到自己手機號碼。
TIPS2: 香港人鍾意撚Ringtone，日本剛好相反，唔想俾人怒啤最好全程震機。
TIPS3: 除o左ringtone，日本人唔鍾意人Cut線，因為無禮貌，兼且你襟Reject o個下可能會收你聽電話費用，所以唔聽的話等佢自己Cut就好喇。
TIPS4: 日本鐵路一走入隧道九成九收唔到，你地班友仔唔好再小三仔地鐵收唔到喇。

唔話你地係兩父子都唔得!!

相信各位一定曾經聽過或者講過類似說話去形容一個人的樣貌或者性格與其父母極為相似，前者不用多說跟遺傳有關，至於後者，Google一下就會發現很多人都是說”一半遺傳一半後天”，不過我比較傾向認為全屬後天。每個人一出世都係一張白紙，際遇造就性格，而性格就是人面對社會狀況的條件反射。

以往我很怕談及”我是誰”，因為我不懂如何介紹自己，隨著周遭發生的人和事而產生的一些立場，我對於這副將近二十七年的身軀越來越了解，在最後一回”末日的話”，我想跟各位分享我對這個社會的”條件反射” -- 我是一個怎樣的人。

人要認識自身，先要面對自己的缺點，而我認為人類有三大缺點(缺點是我主觀判斷) -- 貪婪，自私和虛偽，前兩者是先天，後者為後天。在talkonly，我不介意給聽眾說”騎牆”，不介意做仆街，不介意認錯，因為認錯是不會有錯的，這樣有人會說很無賴，但我亦不介意做無賴，只堅持一點 -- 寧作小人，莫作偽君子。

早陣子看過我過李燦榮在”左右紅藍綠”和鄭經翰在”VDONEXT”的訪問說議會內外的事，他們都異口同聲說，議員在議會內跟官員鬧得面紅耳熱，議會外跟官員攬頭攬頸，兩張面孔，都是假的。不少人都在說，議員和官員只懂做Show，但試問，我們又何嘗不曾過面對身邊的同事，朋友甚至親人在做一場又一場的Show呢?  一邊四圍唱朋友的不是，一邊跟那個你四圍唱的朋友嬉嬉哈哈，我不敢說我從未做過，亦不敢說這是錯，但可免則免，因為我認為這對人與人之間溝通毫無益處。在Newsgroup年代，我曾經親眼看到有人在以為我看不到的情況下對我冷嘲熱諷，我對這種被四圍唱而矇在鼓裡的事情身同感受。坦誠相對是做人基本，不論是親人，朋友甚至只是路人一個。

這陣子(其實已經流行好一陣子)流行說Unfriend，即Delete自己在Facebook或者Twitter的”既有朋友”。依稀記得我曾經形容自己”濫情”，基本上互相認識的我都以朋友相稱，但有兩類人實在不能不unfriend，一類是撩交打的，意見不同可以予以尊重，就像我跟母親政見不同，她反對遊行示威，我支持遊行示威表達訴求，難道我要跟她脫離母子關係嗎? 我是一個極度怕(甚至討厭)鬧交的人，不論是我得罪人還是人得罪我，因為鬧交是一件既浪費時間又沒結果的事，尤其網上罵戰，實在可免則免。

另一類已經在前文提及，在此不再重複。友人曾經在Facebook說被Unfriend然後說了一大輪對方的不是，看到這裡我想起陳強說過的一句話：做任何時，說任何話，只要不傷害到任何人就可以。而我相信Unfriend並不會傷害任何人，再者對我來說這有著另一種含意。

我不懂去恨一個人(除了梁美芬)，包括舊老闆。我認識有替過舊老闆打工的，全都說他”難頂”，就算未反面評價都相當麻麻，而我自己對他則沒甚麼，見到面還可以問個好。恨一個人跟鬧交一樣，同樣費時跟沒結果。如果我跟譚耀宗是朋友，或許我還可以跟他說句Hello，甚至吃個飯，因為我知道他站在一個怎樣的立場，就算不同意亦得尊重他作為一個人。一旦破了我這條界線，這個我不知如何形容的…..我會選擇Unfriend，因為我覺得很好怕，這就是我”面對”的方法，可能是幼稚手段，甚至令我越來越少朋友，但我願意用我自身生命發誓，Unfriend是出於尊重。一邊Say Hello佔便宜，一邊在說這樣那樣，我就是做不出。假如是我判斷錯誤，純屬誤會，只能說一聲，有緣無份。(待續)