我不能，香港人亦不能抹殺”自由行”此時此刻對香港經濟的貢獻，但我不禁一問，如果香港沒有”自由行”就不行，那沒有CEPA前的香港人都是食屎的嗎？我不是反對”陸客”，而是特區政府過份依賴內地，由九七前的產業單一化推進至現在的產業空洞化，這種糖果吃得太多恐怕會變成慢性毒藥。身邊不少朋友們都有我類近的憂慮(嚴格上來說已經實現，所以不算是憂慮)，將這份憂慮的情感反射至上星期的台灣總統選舉 -- 希望蔡英文贏。

香港不高興 from MagicHour Studio on Vimeo.

我們怕的不是香港失寵，我們怕的是台灣會步香港後塵。然而上星期六的結果並不如我所想，但我還是尊重台灣人民的選擇，天佑台灣。

今次民進黨輸了，但蔡英文輸票不輸人，一直以來我都覺得蔡英文說話”堀雷除”，欠缺感染力。但她的”敗選宣言”連我這個”局外人”也為之動容。跟八年前連宋兩老敗選後在凱道賴死唔走形成強烈對比。

今天晚上，我相信大家心裡都很難過；如果你心裡真的很難過，就讓它發洩出來。你可以哭泣，但不要洩氣。你可以悲傷，但是不要放棄。因為明天起來，我們要像過去四年一樣的勇敢，心裡充滿著希望。因為，我們必須勇敢地扛起這個國家的責任，我們必須樂觀地，繼續為台灣這塊土地打拼。(全文)

延伸閱讀: 安裕：不要讓台灣變成第二個香港

去邊度旅行?又係台灣?台灣邊度?又係台北? -- 以上就係每次去台北友人們俾我o既反應，不過今次係我人生第一次唔o係香港跨年，以下係今次小弟過台北自由行o既小分享，希望幫到大家。

出境攻略

小弟認為，去旅行就算幾Hea都好，都唔好Hea o係機場，所以一定要用最快時間入境兼離開機場。以下係小弟建議流程: 假設你唔係一支公自由行，一落機應該兵分兩路，一路兌錢(我見好多香港人o係度格價，其實間間個Rate同百年都差唔多，格得黎就有排排隊，另外雖則去台灣唔會洗得多，不過兌多都無壞，因為今時今日無o野慘得過渣”美完”同”港完”，兌多o左下次旅行再用，分分鐘買o野可以打個九折)，一路去排入境，最好排o係本地人隔黎條隊，因為本地人條隊清晒之後會轉俾遊客。

買上網卡

要算到咁盡係因為如果你要上網，入境後o係機場買上網卡o既Counter既多人又等得耐，尤其係”台灣大哥大“，可能因為佢係最平o既關係，但基本上隔離中華電信同遠傳o既日租卡價錢亦唔係貴好多。我買o既係面值TWD500(另送100，共600)o既中華電信充值卡，然後Join七日任上網計劃(TWD450，直接從充值卡扣除，即係淨返150)，我個人建議最好有埋Voice(一陣再講點解)，特別要讚下係每通電話完成後都會有短訊提示餘額(唔肯定係咪個個台都有)，另外上網其實係計”時數”，以我為例，七日即係168個鐘，唔用或者o係iPhone停用數據都唔會計”時數”，有效期半年(又係唔唔肯定係咪個個台都咁計)。如果係用行貨iPhone/iPad，”應該”已經有各個台灣電訊台APN設定(中華電信係，其他又係唔知)，即係乜都唔駛SET。

在台灣使用3G手機上網

溫馨提示:
1) 所有台都有Micro SIM提供
2) 離開香港可以申請漫遊飛線(如一電通)，慳返唔少打入IDD費。
3) 如果置身海外都要經常打出打入香港，不妨申請香港寬頻2b電話，可以用iPhone/Android app講電話，HK$28個月，唔用o個個月唔駛錢(唔用最多可以Keep Number 180日)，唯一問題係對上一次試個Android版Kill o左個App有人打黎無Push。
4) 如果用用下2b app發現個number一直出錯誤，可以o係登入”2b個人助理”  click “2b重設”，然後刪除號碼，重新登入一次”2b個人助理”，再加返個號碼就得。
5)其實2b仲有個來電過濾功能，用Desktop上 http://pa.2b.com.hk 就會見到，不過唔多識用o既話就唔好亂撚喇。

住宿

“Check In”中

話說小弟原先係買自由行Package，不過唔知係咪太遲買，有機票無酒店，聽旅行社o的Staff講原來跨年酒店比聖誕仲爆，如果無理解錯應該係台灣人自己都會去台北Join跨年所以有咁o既情況，最後我搵o左有間叫”愛租王“o既日租房。

呢間愛租王都幾神秘下，我o係Google Search都唔係幾搵到有人Comment佢地，主要溝通都係靠電郵，不過佢地應該都幾多香港客，因為俾錢可以過數去香港滙豐戶口。我地租o左兩晚，平均每晚約港幣$600，如果平日大概HK$300 -- 400一晚。其實整個”訂房”流程，就好似o係官網睇一樣，淨係知位置o係邊個捷運站附近，確實位置完全唔知，電郵叫我地到台北車站拎鎖匙o個陣都係搵個landmark企o係度交收，就好似o係旺中等人咁。

拎完匙第一時間搭捷運去住處，基本上佢地所有房間都係鄰近捷運站，我地訂o個間就o係忠孝復興捷運站附近，捷運站出口行兩分鐘左右就到，唯一唔方便係要行樓梯(唔係間間都要，留意網站房間介紹)。真係唔去到都唔知，原來係唐四樓一個單位，然後一拆四至六個房(相信其他房間都係類似咁做)，同網站圖片比較，都有七八成近似，除o左牆邊清潔麻麻，純訓覺黎講算係十分OK(要靚可以考慮之前介紹過o既馥華，依家開o左新捷運線，o係正酒店隔離，方便o左好多!!)。留意如果住多過一晚o既話，愛租王係唔會好似酒店咁日日同你執房，同埋要自備梳洗用品。

溫馨提示:
- 電郵查詢最好一次過俾幾個option佢，分埋先後次序。

EZ5 Live House

認識Ez5係因為十幾年前o係Boxup Download過一張叫”PUB不夜城”o既駐唱歌手合輯，今次去台灣前突然諗起，決定去會一會。

Ez5係一間每晚都有Live Performance o既音樂餐廳，收費每位TWD800，包兩張Coupon，每張可以換一樣食物或者飲品，兩者份量都唔少，以咁o既價錢仲要有歌聽算幾抵。Ez5每晚駐場歌手都唔同，網站同Facebook專頁都可以睇到當月駐場歌手資料，我地當晚有梁一貞，蘇子同卓義峰。講Funny肯定係蘇子大哥，但係論唱功實在不能不大推卓義峰。

由Bon jovi唱到Ricky Martin “Let me entertain you”，沙聲，高中低音海豚音樣樣皆能，把聲絕對係屈機，如果靚仔少少我諗佢應該可以好紅。

溫馨提示:
- 來台前記住訂位
- 如果來台慶生碰巧當晚去Ez5而蘇子o係度記住話俾佢聽你生日 XD

來台三件事：食，食同埋食

台北食o既大把，真心講，求其搵o的o野食都唔差得去邊，反而諗下想食邊範仲好。記住Download “台灣Openrice” iPeen 愛評網搵食，我就係咁樣o係日租房附近搵到間”三兩燒肉”，大概港紙百頭就可以任食，仲要係炭爐黎，香港要咁食法先唔好講最少要兩舊水都唔知有無咁足料，最重要係唔知要排隊排幾耐。

如果問我有咩係必食，係得一樣 - 廖家牛肉麵。話就話牛肉麵係台灣”特產”，如果大家真係諗住食廖家，不妨求其搵一間牛肉麵食，食完再幫趁廖家就會知佢個湯底有幾堅。特別推介佢o的”小菜”泡菜，唔係Kimchi，係酸酸地o既醃菜，美味醒胃。

溫馨提示:
- 牛肉麵同牛肉湯麵o既分別係 -- 牛肉麵有牛肉，湯麵無。
- 寫blog呢一刻做過o的research好似呢間牛肉麵都唔錯 - 與廖家牛肉麵系出同門的良月牛肉麵
- 返到香港先知原來新開o左個號稱北台灣最大夜市 -- 輔大花園夜市，各位去完可以話俾小弟知正唔正 ^_^
北台灣也有花園夜市-輔大花園觀光夜市泰式椒麻雞超推 …
- Last but not least，開頭講買電話充值卡最好有埋Voice，因為可以打電話訂位，無謂去到想食o個個地方點知無位。

台北跨年 + 101煙花

台北跨年氣氛不比香港o既差，而且跨年晚會總多，不過要睇台北101跨年煙花就可以順便去睇市政府前地o既跨年晚會。差唔多每年都有五月天做壓軸(今年因為自己有演唱會，所以變o左做開場)，不過要”睇到”o既話就要五六點去到，因為市政府前地個設計問題，如果企後些少已經比o的panel同spotlight擋住。唔想咁樣逼入去可以考慮o係鄰近信義商場附近坐底等睇煙花，好幾個位都有投射銀幕直播跨年晚會，附近亦有好多臨時小食檔，肚餓可以買條香腸或者花枝丸醫下肚。

記得上年睇搭船睇國慶煙花，一上到船個導遊第一句就係：唔好意思，其實煙花最好睇唔係搭船(後來話最好睇應該係o係會展，因為睇煙化o既最佳位置一定係留俾有錢人)。睇台北101煙花一樣都有best view，當日出發前一定要留意新聞台報當晚風向同最佳位置，唔係可以乜都睇唔到，好似對上兩次o既跨年煙花，如果o係跨年晚會o個邊睇就只會有煙無花。

我自己無o係文化中心睇過新年或者國慶煙花好難比(雖則我覺得搭船睇o個次國慶煙花不及101煙花)，要比就比IFC，不過真係無得比，101正太太太太多。其中一個大原因係因為o係香港唔可以咁近距離睇IFC煙花，加上今次係101八年黎密度最高o既跨年煙花，唔好睇就有假，我地為o左呢四分鐘，足足等o左四個鐘，只能用一個字形容 -- 值。

仲有一樣係香港睇煙花唔可能會發生o既事，就係當101放完煙花後，其實週邊都有人係咁放緊煙花(講真真係唔肯定係咪合法)，有小型有大型，基本上由101行返去忠孝復興半小時途中都有人放緊，o個種被爆煙花聲音包圍o既感覺有o的似身處戰場打緊仗咁。

溫馨提示:
- 就當我用5d mark ii拍都只會係有形無實，要睇一定要睇現場!!
- 信義區有間o係天台o既nightclub叫myst，對正台北101，無論係咪跨年睇台北夜境都一流(其實o係台北101觀景台無咩好睇的)，如果想睇跨年煙花呢個都係其中一個選擇。
美麗華大直IMAX

雖然美麗華大直已經唔係亞洲最大IMAX，不過同最大相差唔遠，如果同Megabox比再大一截，真正銀幕包圍眼球，網站可以先預訂(唔駛俾錢)，然後o係開場四十分鐘前到場買飛。睇完戲可以去美麗華地標 - 摩天輪。如果商場唔夠行仲可以過隔離家樂福Shopping。

消費二三事

Uniqlo -- o係香港永世唔係無貨都斷色斷碼o既”黃宗澤”，o係台灣大量現貨，雖然賣得貴過香港，不過服務真係好得恐佈，Cashier俾返張收條我差唔多九十度鞠恭，同o係廣東道名店排隊買幾皮o野包包形成強烈對比。

曼秀雷敦 -- 我無寫錯你無睇錯，真係曼秀雷敦，香港有rain代言賣HK$5x，台灣無o左雨神張sticker賣HK$2x，真係_!!

Macaron -- o係台北車站B1 o既臺鐵便當2號店，見到有盒好似Macaron o既物體，但只係賣TWD50，香港一粒o既價錢就可以買到一盒!! (當然o的Macaron係山寨版，但係食落都有返七八成感覺 XD)

Next Taiwan

適逢台灣總統選舉，我去o左睇睇蔡英文o既競選總部，有今次Campaign吉祥物小豬(詳見 三隻小豬運動)，亦有好多凳俾人坐，其實我都唔知o的人坐o係度有咩做，感覺有點傳銷Feel。有位女仕走過黎同我地寒喧，佢雖然知道我地係香港人，不過都熱情相向，話自己都去過香港，又話台灣最緊要o既係：唔好變成下一個香港。

同競選總部相連，係賣今次Campaign記念品o既小英商號，有tee，有書有唱片，亦有一o的本地農民o既包裝米賣，其中我留意到一樣記念品包裝下面o既一句話：生活不在他方，在台灣。

曾幾何時，甚至寫緊blog o既呢一刻，我，甚至唔少朋友雖然無實行，但係都有諗過移民，見到”他方”有人仍然對自己o既地方”有堅持”，點可以唔慚愧。今時今日一個好o既政府要做o既，係好簡單，亦係最難，就係唔好讓惡果俾下一代承受，台灣有民主，有民選總統，係咪一定做到？未必。但至少，佢地仲有選擇，仲有改善o既可能性，仲有對上一次特首選舉梁家傑話我地香港無o既 -- 願景。

老左話沒有國那有家，問你為國家做過甚麼？不如問我地俾o左一個咩將來俾下一代？當一個人諗點解多過諗你/理想，咁樣做人同做條鹹魚其實無咩分別，當一個社會超過一半都係咁o既人，咁唔係dying，this city is dead you know？

記得兩年前，Motorola部Milestone岩岩o係香港見街，小弟都入o左一部，當時我係用緊iPhone 3GS，根據各大Forum/Blog討論，主要唔係提Crystaltalk話音或者部機本身有幾好，反而統一口徑話部機快過iPhone 3GS。我作為一個3GS用家，見到呢個輿論實在百思不得其解，你可以用Tech Guy角度話因為Android當時行Multitask 3GS無慢係應該，但呢o的說話同Enduser講實在係no sense，究竟話3GS慢過milestone o既人用意何在?

或者咁講，如果法律規定人類只能做自己喜歡o既工作，咁無一個國家失業率可以少過90%，即係總有人(甚至所有人)都要做厭惡性工作，你可以唔同意呢個咁奇怪o既論述，But that’s the reality。個個去炒股票o既話，邊個去劏雞? 個個去做Apple，邊個賣Nokia? 如果出年係世界末日，末世前呢個世界俾我最大o既Message係，唔好信人，只要信自己。o係我仲係用28.8kbps上網o既年代，網上好似無依家咁多呃呃騙騙。o係我o既理想世界，地球得以仍然運轉，係因為愛，而愛係由信任起始，我講緊o既愛不單止係對家人，而係Everyone，當信任人變成一種罪，咁錯o既係我地對人o既信任還是係我地o既社會呢? 現實答案係前者。

講到呢o的問題不其然有點sad，不過其實我個人又唔係好sad播，正如開頭所講，呢期忙過鬼，以前見到o的客o既蘇州屎(俾人投訴o既律師信)都係有o的驚，依家我已經忙到見到呢o的都無晒感覺。正當我以為我已經對任何事無晒感覺，唔識驚，忙到連壓力都唔記得係咩o既時候。我發覺呢o的o野，呃到人，甚至呃到自己，但係永遠呃唔到一樣o野: 夢。前排我發o左個咁o既夢。

夢o既第一個場景排隊玩過山車，等o左勁耐，我聽o左個電話，好似係個friend o係我公司等我，我同佢講我同女友仲排緊隊玩過山車。等o左好耐，最後等唔到我自己返o左公司，返到去我無見到個Friend，反而見到個Sales(我唔知係Sell咩，總之係Sales)，見到間公司變o左間Datacenter，好多Server櫃，個Sales好似等得唔耐煩，我同佢叩o左29次頭。最後一個場景係我搭車見到有煙花，收音機旁述話爆三十次煙花係好兆頭，但係廿九次係代表斷頭，係不祥之兆。

究竟個夢代表咩? 我唔識完全解讀，希望各位睇埋下一篇Blog可以幫我解讀一下，謝謝。

(待續)

因為飲食男女介紹的關係，前陣子去過沙田瀝源村會一會那家過百年歷史的盛記麵家。第一次走入瀝源村，發現這裡的跟一橋之隔的新城市廣場有著大不同，除了私樓跟公屋的分別，連帶消費指數也差一大截，例證有廣受街坊歡迎的”百樂麵包製造店“，以及廿五蚊一個午餐的榮樂茶餐廳，其炒蛋質素絕不遜於澳牛。

用Google做過一些資料搜集，有人用”屋村的後花園”形容盛記麵家，這個說法一點也不為過。各位雖然可以從相片看到盛記的用心佈置，但我還是建議各位必須過來幫襯一碗牛雜麵，由石屎森林就到舊式公屋，再走過一條陰暗的走廊看見盛記麵家的大門，不是親身走過來是很難感受到這個地方有何奇妙。

據了解盛記麵家早期的確是家麵家，就是只做粉麵，後來開始做晚市小菜，甚至盆菜。近年因為領匯加租，晚市引入火鍋希望可以幫補一下，今次我正正是一嚐他們的火鍋。晚市火鍋水準意料之內的好，座位肯定好坐過那些乜香物香。如果各位跟我一樣常一嚐盛記火鍋，建議先致電訂位，因為晚市火鍋只會在那個只有數張檯的冷氣房供應(冬天可能可以會在沒有冷氣的坐位提供，那坐位會比較多)。

當晚結賬後，我在盛記留了一會參觀跟拍照，老闆走過來”㗳嗲”，為我介紹店內各樣佈置，其中談及地上為何畫了一條魚，他告訴我，希望人們尊重大自然。雖然跟老闆傾談只是很短的時間，但我聽得出他還是有一份很強的Passion，要知道盛記開業不是一年半載，這份Passion堅持至今絕非易事。”尊重大自然”五字聽下去好像有點不著邊際，但我認為改變，不都是從那些”不著邊際”開始的嗎?這個Passion得頭頂有個光環的老闆，令我想起我的舅父。

由幼稚園開始，我已經就讀基督教學校(中學是天主教)，不過真正對”教會”或者”主”有認識卻是由跟舅父返土瓜灣一家小教會開始的(依稀記得返過好一兩年禮拜，直至由土瓜灣搬去青衣)。舅父是個虔誠基督徒，母親曾用”擔屎唔偷食”形容他，這個說法可能有點難聽，但的確，他就是一個這樣的人。舅父大半生都將自己奉獻及主，幾年前一家更從香港走到日本傳道(寫文的時候舅父應該在岩手縣進行探訪)。

四年前舅父一家出發到日本前，在北角宣道會辦過一場活動讓家屬跟朋友了解日本宣教因由。舅父說他曾經在廿年前一次夢中見到”鳥居”(即我們說的橫梁)，他認為這是主給他的啟示，及後便決定要到日本宣教。那次在北宣他亦有提及過日本的社會問題，包括宗教，以至自殺問題，這一切好像真的自有主宰。四年過去，除了中間有一次回港兩個星期，我跟他們一家甚少交談，直至2011年3月11日。

正如各位所知道的，那天日本發生了由地震產生的極嚴重海嘯，看到那個畫面好一回，突然母親致電，才想起舅父一家也在附近，當是在午飯的我整個人慌張起來，一邊在哭，一邊在打電話給舅父。我和母親其實不太清楚舅父住處所在，只知道是東京市近郊，卻不知是否在災區附近，正正因此我倆當時份外擔心，，一方面擔心舅父一家安危，另一方面想在六點半新聞前找到他們，因為我怕婆婆看到新聞時我們還未找到舅父一家會比我們更擔心更激動。直至下午五時，打了兩多小時終於打通了電話，總算放下心頭大石，只是沒想到還有另一問題 – 核洩漏。

福島核事故發生後，香港人在傳媒喧染下活在恐慌之中，買鹽防輻射，賣雞擴輻射。我沒有買鹽，亦沒有買雞，但我們仍然渴望舅父一家暫時回港，我和母親一邊游說舅父，一邊找機票，希望舅父答允後他們一家可以隨即安排回港。我們是基於安存理由希望他們回港，而當時舅父的想法剛好相反，因為那處正在水深火熱，他更加需要留低去幫助災民，為他們祈禱。

半年過去，香港人對壽司店由避之則吉到繼續排長龍，日本旅行團由無人問津到其門如市。雖不能說我們的恐慌全都是無根無據，但有不少擔心都頗為多餘，回想當時不斷叫舅父回港，他卻一直遊走於災區探訪做義工，我不其然有一種自愧的感覺。

上個月正值311地震後六個月，我跟女友過了東京五天自由行，其中一晚拜訪了舅父一家，順道把母親在香港買的月餅跟燈籠送給他們。那天我們相約舅父在池袋站，打算乘西武鐵道到他們家，站內異常的多人，看到指示牌在顯示四隻大字 – 人生事故。可能搭開山手線遊東京的香港遊客未必會特別留意，其實日本鐵路誤點問題不比港鐵少，甚至比港鐵嚴重，主要成因並非是訊號系統等硬件問題，而是發生人為意外 – 自殺。事故發生後，鐵路公司保証於特定時間內清場，乘客可穫”遲到券”一張以方便上班一族或學生能証明遲到因由。

從舅父得知，日本自殺率高崌世界前列(四年前出發宣道前已有提及)，每年有超過三萬人”成功”自殺，換句話說有關數字並未包括自殺但穫救的人。日本政府為了減低自殺率，立法定明自殺的話，其家人需要罰款，令企圖自殺的人為免禍及家人而打退自殺的念頭。這樣的規定其實相當不合理，但面對長期高企的自殺率，這看來是無計可施的下下策。

如果有煲日劇的朋友應該不難發現，像白色巨塔，死亡筆記，跳躍大搜查線等數之不盡的動漫，劇集或者電影，故事根源都來自社會自身問題， 視日本為旅遊勝地的我們未必能夠知道甚至理解。當我問及舅父自殺率為何如此高，他說是因為日本人生活枯燥，生活壓力大，市區居住空間少，有工作的人工時特別長，還有跟很多大城市一樣的M型社會問題。雖然我沒有實質數據去支持我的論述，不過我相信，香港很快會成為下一個日本。

實在香港現在正正步入日本社會問題的初期，同樣生活富裕，卻貧富懸殊。當晚從東久留米(舅父家)回到池袋，看到酒店旁邊，就是那座池袋地標Sun Shine City旁邊的東池袋中央公園，有不少露宿者在裡面過夜，這方面比香港人道得多。在香港，你可能未必有看過這樣的情景，不是因為我們比日本富裕，而是政府為免影響市容，禁止露宿者在公園露宿，刻意設計到公園空間能坐不能睡，能睡的都放痕粉或者噴水，既無心解決露宿者住屋問題卻又趕絕他們唯一容身之所，這是那個無賴敗類想出來的好主意？

香港跟日本有很多相似之處，我不知道將來香港會否像日本一樣自殺率上升，但有一樣是我個人比較擔心，就是香港人比日本人少了一份團結精神。團結本是香港精神，但光環卻正逐漸退色，這是因為特區政府回歸以來一次又一次透過港人分化和撕裂族群去取得既得利益。311地震之時，日本人可以守望相助甚至幫外來人一把，如果touchwood現在香港發生了大事情，四分五裂的香港人會如何？

我曾經說過，改變這個世界，不是看奧巴馬，不是看別人，而是看自己。這句話應該要改改，其實每個人的存在都在改變世界，怎樣改變取決於自己，而並非等運到。盛記老闆，我舅父，他們有著不同理念，改變著他們想看見的世界，在我眼中，他們的對世界的改變不比Steve Jobs的少。

香港是全世界最多人相信神的地方，因為大部人都在等，等神來打救我們。至於我，我也有我對”改變”的想法，但我的意志沒有他們的強，不時對”改變”感到沮喪，不是因為眾人不認同，不是因為明知不可為而為之，而是眾人認同, 卻明知可為而不為之。有很多近在咫尺的機會，香港人卻在冷眼旁觀，看到這種荒謬，我還可以怎樣？很多人說，2012是世界末日，如果是，為何還在搞環保？為何還要為下一代著想？如果不是，香港人，你們現在做的是甚麼？

延伸閱讀：蘋果日報 - 港人急功近利將無立錐地