To share what i see…

去邊度旅行?又係台灣?台灣邊度?又係台北? -- 以上就係每次去台北友人們俾我o既反應，不過今次係我人生第一次唔o係香港跨年，以下係今次小弟過台北自由行o既小分享，希望幫到大家。

出境攻略

小弟認為，去旅行就算幾Hea都好，都唔好Hea o係機場，所以一定要用最快時間入境兼離開機場。以下係小弟建議流程: 假設你唔係一支公自由行，一落機應該兵分兩路，一路兌錢(我見好多香港人o係度格價，其實間間個Rate同百年都差唔多，格得黎就有排排隊，另外雖則去台灣唔會洗得多，不過兌多都無壞，因為今時今日無o野慘得過渣”美完”同”港完”，兌多o左下次旅行再用，分分鐘買o野可以打個九折)，一路去排入境，最好排o係本地人隔黎條隊，因為本地人條隊清晒之後會轉俾遊客。

買上網卡

要算到咁盡係因為如果你要上網，入境後o係機場買上網卡o既Counter既多人又等得耐，尤其係”台灣大哥大“，可能因為佢係最平o既關係，但基本上隔離中華電信同遠傳o既日租卡價錢亦唔係貴好多。我買o既係面值TWD500(另送100，共600)o既中華電信充值卡，然後Join七日任上網計劃(TWD450，直接從充值卡扣除，即係淨返150)，我個人建議最好有埋Voice(一陣再講點解)，特別要讚下係每通電話完成後都會有短訊提示餘額(唔肯定係咪個個台都有)，另外上網其實係計”時數”，以我為例，七日即係168個鐘，唔用或者o係iPhone停用數據都唔會計”時數”，有效期半年(又係唔唔肯定係咪個個台都咁計)。如果係用行貨iPhone/iPad，”應該”已經有各個台灣電訊台APN設定(中華電信係，其他又係唔知)，即係乜都唔駛SET。

在台灣使用3G手機上網

溫馨提示:
1) 所有台都有Micro SIM提供
2) 離開香港可以申請漫遊飛線(如一電通)，慳返唔少打入IDD費。
3) 如果置身海外都要經常打出打入香港，不妨申請香港寬頻2b電話，可以用iPhone/Android app講電話，HK$28個月，唔用o個個月唔駛錢(唔用最多可以Keep Number 180日)，唯一問題係對上一次試個Android版Kill o左個App有人打黎無Push。
4) 如果用用下2b app發現個number一直出錯誤，可以o係登入”2b個人助理”  click “2b重設”，然後刪除號碼，重新登入一次”2b個人助理”，再加返個號碼就得。
5)其實2b仲有個來電過濾功能，用Desktop上 http://pa.2b.com.hk 就會見到，不過唔多識用o既話就唔好亂撚喇。

住宿

“Check In”中

話說小弟原先係買自由行Package，不過唔知係咪太遲買，有機票無酒店，聽旅行社o的Staff講原來跨年酒店比聖誕仲爆，如果無理解錯應該係台灣人自己都會去台北Join跨年所以有咁o既情況，最後我搵o左有間叫”愛租王“o既日租房。

呢間愛租王都幾神秘下，我o係Google Search都唔係幾搵到有人Comment佢地，主要溝通都係靠電郵，不過佢地應該都幾多香港客，因為俾錢可以過數去香港滙豐戶口。我地租o左兩晚，平均每晚約港幣$600，如果平日大概HK$300 -- 400一晚。其實整個”訂房”流程，就好似o係官網睇一樣，淨係知位置o係邊個捷運站附近，確實位置完全唔知，電郵叫我地到台北車站拎鎖匙o個陣都係搵個landmark企o係度交收，就好似o係旺中等人咁。

 

拎完匙第一時間搭捷運去住處，基本上佢地所有房間都係鄰近捷運站，我地訂o個間就o係忠孝復興捷運站附近，捷運站出口行兩分鐘左右就到，唯一唔方便係要行樓梯(唔係間間都要，留意網站房間介紹)。真係唔去到都唔知，原來係唐四樓一個單位，然後一拆四至六個房(相信其他房間都係類似咁做)，同網站圖片比較，都有七八成近似，除o左牆邊清潔麻麻，純訓覺黎講算係十分OK(要靚可以考慮之前介紹過o既馥華，依家開o左新捷運線，o係正酒店隔離，方便o左好多!!)。留意如果住多過一晚o既話，愛租王係唔會好似酒店咁日日同你執房，同埋要自備梳洗用品。

溫馨提示:
- 電郵查詢最好一次過俾幾個option佢，分埋先後次序。

EZ5 Live House

認識Ez5係因為十幾年前o係Boxup Download過一張叫”PUB不夜城”o既駐唱歌手合輯，今次去台灣前突然諗起，決定去會一會。

Ez5係一間每晚都有Live Performance o既音樂餐廳，收費每位TWD800，包兩張Coupon，每張可以換一樣食物或者飲品，兩者份量都唔少，以咁o既價錢仲要有歌聽算幾抵。Ez5每晚駐場歌手都唔同，網站同Facebook專頁都可以睇到當月駐場歌手資料，我地當晚有梁一貞，蘇子同卓義峰。講Funny肯定係蘇子大哥，但係論唱功實在不能不大推卓義峰。

由Bon jovi唱到Ricky Martin “Let me entertain you”，沙聲，高中低音海豚音樣樣皆能，把聲絕對係屈機，如果靚仔少少我諗佢應該可以好紅。

溫馨提示:
- 來台前記住訂位
- 如果來台慶生碰巧當晚去Ez5而蘇子o係度記住話俾佢聽你生日 XD

來台三件事：食，食同埋食

台北食o既大把，真心講，求其搵o的o野食都唔差得去邊，反而諗下想食邊範仲好。記住Download “台灣Openrice” iPeen 愛評網搵食，我就係咁樣o係日租房附近搵到間”三兩燒肉”，大概港紙百頭就可以任食，仲要係炭爐黎，香港要咁食法先唔好講最少要兩舊水都唔知有無咁足料，最重要係唔知要排隊排幾耐。

如果問我有咩係必食，係得一樣 - 廖家牛肉麵。話就話牛肉麵係台灣”特產”，如果大家真係諗住食廖家，不妨求其搵一間牛肉麵食，食完再幫趁廖家就會知佢個湯底有幾堅。特別推介佢o的”小菜”泡菜，唔係Kimchi，係酸酸地o既醃菜，美味醒胃。

溫馨提示:
- 牛肉麵同牛肉湯麵o既分別係 -- 牛肉麵有牛肉，湯麵無。
- 寫blog呢一刻做過o的research好似呢間牛肉麵都唔錯 - 與廖家牛肉麵系出同門的良月牛肉麵
- 返到香港先知原來新開o左個號稱北台灣最大夜市 -- 輔大花園夜市，各位去完可以話俾小弟知正唔正 ^_^
北台灣也有花園夜市-輔大花園觀光夜市泰式椒麻雞超推 …
- Last but not least，開頭講買電話充值卡最好有埋Voice，因為可以打電話訂位，無謂去到想食o個個地方點知無位。

台北跨年 + 101煙花

台北跨年氣氛不比香港o既差，而且跨年晚會總多，不過要睇台北101跨年煙花就可以順便去睇市政府前地o既跨年晚會。差唔多每年都有五月天做壓軸(今年因為自己有演唱會，所以變o左做開場)，不過要”睇到”o既話就要五六點去到，因為市政府前地個設計問題，如果企後些少已經比o的panel同spotlight擋住。唔想咁樣逼入去可以考慮o係鄰近信義商場附近坐底等睇煙花，好幾個位都有投射銀幕直播跨年晚會，附近亦有好多臨時小食檔，肚餓可以買條香腸或者花枝丸醫下肚。

記得上年睇搭船睇國慶煙花，一上到船個導遊第一句就係：唔好意思，其實煙花最好睇唔係搭船(後來話最好睇應該係o係會展，因為睇煙化o既最佳位置一定係留俾有錢人)。睇台北101煙花一樣都有best view，當日出發前一定要留意新聞台報當晚風向同最佳位置，唔係可以乜都睇唔到，好似對上兩次o既跨年煙花，如果o係跨年晚會o個邊睇就只會有煙無花。

我自己無o係文化中心睇過新年或者國慶煙花好難比(雖則我覺得搭船睇o個次國慶煙花不及101煙花)，要比就比IFC，不過真係無得比，101正太太太太多。其中一個大原因係因為o係香港唔可以咁近距離睇IFC煙花，加上今次係101八年黎密度最高o既跨年煙花，唔好睇就有假，我地為o左呢四分鐘，足足等o左四個鐘，只能用一個字形容 -- 值。

仲有一樣係香港睇煙花唔可能會發生o既事，就係當101放完煙花後，其實週邊都有人係咁放緊煙花(講真真係唔肯定係咪合法)，有小型有大型，基本上由101行返去忠孝復興半小時途中都有人放緊，o個種被爆煙花聲音包圍o既感覺有o的似身處戰場打緊仗咁。

溫馨提示:
- 就當我用5d mark ii拍都只會係有形無實，要睇一定要睇現場!!
- 信義區有間o係天台o既nightclub叫myst，對正台北101，無論係咪跨年睇台北夜境都一流(其實o係台北101觀景台無咩好睇的)，如果想睇跨年煙花呢個都係其中一個選擇。
美麗華大直IMAX

雖然美麗華大直已經唔係亞洲最大IMAX，不過同最大相差唔遠，如果同Megabox比再大一截，真正銀幕包圍眼球，網站可以先預訂(唔駛俾錢)，然後o係開場四十分鐘前到場買飛。睇完戲可以去美麗華地標 - 摩天輪。如果商場唔夠行仲可以過隔離家樂福Shopping。

消費二三事

Uniqlo -- o係香港永世唔係無貨都斷色斷碼o既”黃宗澤”，o係台灣大量現貨，雖然賣得貴過香港，不過服務真係好得恐佈，Cashier俾返張收條我差唔多九十度鞠恭，同o係廣東道名店排隊買幾皮o野包包形成強烈對比。

曼秀雷敦 -- 我無寫錯你無睇錯，真係曼秀雷敦，香港有rain代言賣HK$5x，台灣無o左雨神張sticker賣HK$2x，真係_!!

Macaron -- o係台北車站B1 o既臺鐵便當2號店，見到有盒好似Macaron o既物體，但只係賣TWD50，香港一粒o既價錢就可以買到一盒!! (當然o的Macaron係山寨版，但係食落都有返七八成感覺 XD)

Next Taiwan

適逢台灣總統選舉，我去o左睇睇蔡英文o既競選總部，有今次Campaign吉祥物小豬(詳見 三隻小豬運動)，亦有好多凳俾人坐，其實我都唔知o的人坐o係度有咩做，感覺有點傳銷Feel。有位女仕走過黎同我地寒喧，佢雖然知道我地係香港人，不過都熱情相向，話自己都去過香港，又話台灣最緊要o既係：唔好變成下一個香港。

同競選總部相連，係賣今次Campaign記念品o既小英商號，有tee，有書有唱片，亦有一o的本地農民o既包裝米賣，其中我留意到一樣記念品包裝下面o既一句話：生活不在他方，在台灣。

曾幾何時，甚至寫緊blog o既呢一刻，我，甚至唔少朋友雖然無實行，但係都有諗過移民，見到”他方”有人仍然對自己o既地方”有堅持”，點可以唔慚愧。今時今日一個好o既政府要做o既，係好簡單，亦係最難，就係唔好讓惡果俾下一代承受，台灣有民主，有民選總統，係咪一定做到？未必。但至少，佢地仲有選擇，仲有改善o既可能性，仲有對上一次特首選舉梁家傑話我地香港無o既 -- 願景。

老左話沒有國那有家，問你為國家做過甚麼？不如問我地俾o左一個咩將來俾下一代？當一個人諗點解多過諗你/理想，咁樣做人同做條鹹魚其實無咩分別，當一個社會超過一半都係咁o既人，咁唔係dying，this city is dead you know？

 

每年小弟總有兩次過大海，一為公二為私，都係飲飲食食咁啦，賭錢就真係近乎零(除非我知道天文台長過去賭，我一定賭….買佢對家，有人送錢俾我點解唔要？）。而每次過澳門都會過夜，因此大大小小酒店都住唔少。暫時住過咁多間覺得漁人碼頭萊斯酒店性價比較高，戶戶向海，交通方便，相對鄰近酒店價錢”比較”平，我個人幾推介，不過價錢有無調整唔就唔多肯定，因為根據友人所講，呢排澳門酒店房價飆升，以往閒日平週末一半o既差距縮減，同級平霸金都依家閒日都要八舊幾水，至於點解加咁多轉頭再講。今次要介紹係另一間我覺得比萊斯更值得推介o既酒店，望廈賓館。

澳門大部份大路酒店都有個共通點，就係澳門名聖 － 賭場。皆因包括酒店在內，賭場以外o既所有o野都只係附屬品，最賺錢亦係唯一賺到錢就只有賭場。望廈賓館應該係第一間小弟住過無賭場o既酒店。我已經唔記得點解我會知道有呢間o野存在，甚至問路有好多澳門人都唔知係咩黎，爭o的以為係爆房賓館，但實情望廈賓館係今年米芝蓮推介酒店其中一間，由澳門旅遊學院開辦，志在俾學生有實習機會，類似香港理工o既hotel icon（當然hotel icon癡線好多，佢o個間真係酒店黎)，而旁邊o既旅遊學院教學餐廳亦有相當好o既評價(可惜只開閒日，每次都係weekend過大海o既我無緣品嘗)。

有人覺得俾學生實習o既酒店服務麻麻，其實正好相反，因為少o左班老屎忽，服務員感覺上比一般酒店更真誠。所有房間設備十分齊全，除o左有提供免費WIFI，連電腦都有埋。房價方面，標準房間假日收費MOP$800，由於係培訓酒店，所有稅項全免，同級酒店黎講算係相當相宜。至於地理方面，其實酒店算o係市區，雖則唔係旅遊區，不過o係港澳碼頭巴士往返都相當方便，可恨我太遲買船飛，只能揀氹仔落船，亦因為咁，俾我見識到澳門的士有幾”好o野”。

落船之後，我同女友搭金沙shuttle出返新口岸，諗住轉的士過酒店，眼見的士站咁鬼多人，過o左老遠巴士站，諗住見咩搭咩，誰不知架巴士成半粒鐘一班，最後都去o左另一個少人o的o既的士站。就觀察所見，好多的士都係落晒旗唔載客，然後行過o的想截的士o既人度問佢地想去邊，簡單o的黎講即係： 揀客。我地行去的士途中問過兩三架呢o的的士，我講o左個”望”字，”廈”字都未講架的士已經”飛”走o左。如果無理解錯係因為望廈賓館唔o係旅遊區，即係話，的士上o左就未必有客回程，佢地覺得”唔著數”，呢個正正係香港同澳門的士佬o既分別 – 一個供過於求，一個供不應求。

到的士站之後，俾兩個遊客打尖，話我地企得唔夠”前”喎，都唔緊要。上到的士話去望廈賓館，雖然個的士司機背住我，但我到feel到佢塊面浸黑氣，途中佢打電話俾個行家，大慨問個行家o係邊度，然後行家問返佢轉頭，佢話: 好騎呢(指我地去o個個地方)，然後再講：不知幾想踢佢地出去 (我好難想像佢唔係講緊我地o羅)。即係咁，從來無人同我講過澳門的士凈係行經旅遊區，作為遊客呢個體驗認真”難忘”，下次再過望廈一定唔會再打的。Anyway，如果呢個係無競爭o既結果，澳門政府係咪要考慮下增發的士牌，同埋加快起o個條有普選可能都仲未有o既輕軌(即係香港o既輕鐵)呢？

作為一個都幾經常過大海o既人，有兩樣o野我覺得無論各位係咪經常去都要做o既，1)申請E道，2)唔好靠的士。其實澳門巴士係幾方便，最緊要係過來來(澳門連鎖超市)買返張澳門通(即係八達通)，$3.2車資可以減到$2.0。如果各位好似我咁過親大海都係飲飲食食而唔係流連各大賭場的話，巴士同澳門通都係必需品，因為計埋等的士，巴士真係未必慢得過佢。

講返之前，點解澳門酒店貴o左咁多，好大程度同自由行有關，行一轉威記就會feel到，個個好似輸唔切咁，最有趣係，一街之隔o既COD(新濠天地)少好很多人，可能格調唔夠大陸卦，要講合符國情o既格局，新開o既銀河應該好岩自由行，至於小弟就對銀河不敢恭維，擺o的咁”兒戲”o既o野o係正門做藝術品，我覺得呢間o野掂極有限，祝你好運。

澳門限定1) 晃記紫菜肉鬆鳳凰卷 – 真係唔知點解，特別好食，食親都係一盒盒咁啪，因為一食就停唔到口。

澳門限定2)蘑菇意大利飯，唔敢話香港食唔到，不過同樣價錢o係香港應該真係食唔到咁有水準o既意大利飯 (經典意大利餐廳 /比薩薄餅店 )

澳門限定3) 澳門通，搭巴士幫你慳唔少仲唔駛戴咁多”神沙”返香港 (MOP$130張，面值$100，按金$30，來來有售)

話說H網友有兩張水舞間門票連船飛，星期五問我要唔要，星期日出發。諗o左兩諗，雖然今個月山窮水盡，時間又急，但係價錢實在太吸引，最後都係過o左大海。

星期日晏晝兩點渣住兩張Coupon去船公司櫃位換飛，但櫃位淨係換到六點船飛，心諗: 水舞間五點開場，呢鑊仆街喇。佢話出面有漁民示威緊，Block住碼頭搞到o的船出唔到，最後買o左巨龍船飛搏一搏睇下出唔出到。o係禁區天橋望出去，真係堅多船(今日睇返新聞先知，原來有成四百隻)，場面之壯觀唔講以為玩緊AOE。最後架船好彩地唔係delay太耐(帶位同我地講，拿拿臨求其搵個位坐得架喇，唔係開唔到船)。Block行人路就聽得多，海路真係第一次。

去到澳門碼頭，俾海關逗。我去過咁多次澳門，今次係第一次。言語之間睇黎係因為我個袋拎得太少o野覺得有古怪(唔過夜可以有幾多o野 = =)，我同佢講睇完水舞間即日來回所以唔洗拎咁多o野。(感覺上)佢想chok我: 咁水舞間好唔好睇先? 我答: 都未睇，點知者。

我地16:55去到水舞間劇院睇五點場，等o左三個字，入到場先發現原來已經開始o左，我諗各位有機會睇真係要早些少入場。整體我覺得算係唔錯，但未至於好睇到爆得咁緊要。作為一個無乜art sense o既觀眾，水舞間同Zaia比，後者雜技成份比較高，不過比較靜同埋陰陰沉沉，無足夠精神入場好容易會釣魚。相反水舞間視聽效果較強勁，尤其個舞台，由水池變平地可以快到眨下眼就miss o左，整個performance十分適合大中華市場。其中一樣我覺得幾緊要係新濠識得搵Sammi唱主題曲，話就話同個劇完全無關係，不過宣傳Campaign實在做得唔錯。反觀Zaia其實由剛剛開始到依家票房一直麻麻，大家做埋差唔多o既o野，只有一街之隔，實在係不明所以。

睇水舞間o既奇遇係，唔知點解鑊鑊睇親戲，坐我後面總有o的人大大聲傾計。今次我鼓起勇氣同佢地(係兩個人)講: 下次睇呢o的劇唔該你地唔好咁大聲講o野，真係好影響觀眾。今次係我第一次忍唔住開聲，因為無人同佢地講，佢地永遠都唔會覺得自己有問題。佢地全程一邊吹水，一邊討論劇情，一邊影相，我真係唔明，咁樣同個司機左手渣電話右手打SMS有咩分別，點可以欣賞到個劇? 咁樣俾幾舊水入場，唔尊重旁邊觀眾，又唔尊重演出者，更加係浪費金錢。

離開新濠之後，真係岩岩遇著剛剛，行o左過去第一日開o既銀河渡假村(其實新濠天地同威尼斯人都有shuttle過去，笨o左)。話就話開o左，其實佢同威尼斯人隔住o個大片地應該都係銀河，即係仲有排起，有時都不得不佩服點解澳門咁細但係可以起咁多酒店。講返銀河，感覺上由內到外都係Clone威尼斯人，商戶感覺十分香港，翠華，零食物語，奇華，萬寧，Pacific Coffee，夏麵館，Godiva，意粉屋，唔講以為去o左青衣城。Food Court有Pepper Lunch同New York Fries，榮式燒雞扒，元朗學記粥麵，又係香港o野，最唔明係點解個Food Court咁鬼細都要學Siam o個o的大Food Court咁要買充值卡買o野食。但更唔明係點解銀河大堂要放舊咁X核突o既o野，同青衣公園元宵放o個o的紙紮工藝有得Flight，請恕小弟唔多識欣賞。

飲飽食醉，終於決定打道回港，九點幾去到港澳碼頭，walkin換飛最快都要十一點幾先有船(其實逢星期日晚都係超Full，呢個我都一早知，問題係去程有示威，連回程都唔俾換，一句講晒，黑仔!)，其實隔離船公司有得快o的但係用唔到張Coupon，最後決定時間換金錢，入去試下排後補。

因為有人提早上船，所以本身搭o個班船就會有所謂o既後補位，其實如果船公司肯電腦化放棄人手劃位，又或者統一後補排隊而唔係分航線排隊，就唔會經常出現混亂情況。我見有唔少乘客周圍左排右排，最後排o左成兩粒鐘都仲係走唔到，當然亦有人靠打尖攝位，仲有成班人渣住個walkie talkie保持通話睇下邊面少人排(我諗應該唔係新鮮事，我認我係大鄉里)。但講到最好諗o野，應該係有人渣住張船飛，個底墊住張”紅紙”，掂行掂過。曾經聽過一個傳聞，話如果你想提早落船，又唔想排後補，可以俾一舊水個劃位。呢個傳聞同我親眼所見不謀而合，無錯，張”紅紙”應該係港紙HK$100，亦係呢種”服務” o既”公價”。既然我聽過，又親眼睇過，我深信，呢個應該係佢地某種潛規則，我絕對唔鼓勵各位咁做，因為咁樣同行賄無分別。

「難求緣份至 難求全合意 一生總有第一次s」，第一次永遠得一次，但係一生可以有好多個第一次。只係去o左一日澳門，第一次見識漁民示威，第一次俾開關逗，第一次睇水舞間，第一次開聲鬧爆觀眾，第一次見到有酒店放舊咁核突o既o野o係大堂，第一次見識船飛墊紅紙。古語有云: 八十歲唔死，都有新聞聽。同樣地，唔到死o個刻，你永遠唔知自己可以遇到幾多個第一次。

話說月頭各大本地IT網站都有介紹K場Red Mr將會同Microsoft合作。在talkonly談及有關報導時，QA話：不如平安夜去Red Mr做節目。就係因為咁，上星期五我地去到Red Mr進行”戶外直播”順便見識下佢地張Surface Computer檯，眾人一致認為：對Surface Computer頗為失望，但對Red Mr其他設施以至服務都極為滿意甚至有驚喜。

唔知好彩定唔好彩，因為一o的”意外”，我地訂o個間房，由廿人房Upgrade o左做五十人房，亦即係Red Mr最大o個間”Red Mr房”。經過九曲十三灣，我地終於入到間房。一開門眾人都O”晒咀”，因為實在大得好誇張下。(按一下下圖檢視360全景)。

先介紹一下KTV最重要一環：當然就係唱K。雖然話Neway同”五大”(前稱”四大”，即四大唱片公司，包括SONY，EMI，華納及環球，BMA加入後俗稱”五大”)關係麻麻，不過K迷最愛之一Eason以至五大o既一o的舊歌其實Neway一直都有得唱，反而華納歌手，好似方大同同簫敬騰連個人頭都消失o左。因為Red Mr，K迷終於可以o係KTV唱返佢地o既歌之餘，歐美同台灣歌曲選擇多o左，反而因為”獨家試唱”關係，東亞，英皇同金牌大風歌手都不見蹤影，所以從點歌Panel睇落Red Mr歌曲選擇會比Neway略少。講起Panel，Red Mr全線都係以輕觸式屏幕點歌，初用者多用一會應該可以習慣，搵唔到歌仲可以用手寫，認字率應該高過iPhone Default個手寫，唯獨唔知點解會無Random出歌(其實Neway個Random都唔係幾Random，感覺似係First In Last Out)。至於音響方面，真係唔錯下，連無線咪都好過人，平時o係Neway唱K 一晚無線咪總要換電兩三次，但係o個晚我地八九點唱到五點都未試過要換電，醫生A都話：從”歌手”角度黎講，音響一流!!

“Red Mr房”內設有兩台LCD TV，一個係播KTV，另一個係打機用。除”Red Mr房”外，大部份大房都有提供Xbox Kinect玩，由於唔係每間房都有齊每一隻Game，所以未必玩到你想玩o既Game，再唔係可以自攜遊戲碟去。唔係親身用65吋大屏幕玩過都唔知原來大Screen玩Kinect Sports同公司台32吋可以爭咁遠，o係台32吋LCD TV玩叫做TV Game，o係台65吋LCD TV玩就似真係碌緊齡。至於房內另一Microsoft發明：Surface Computer，基本上大家玩o左兩玩已經無掂過，因為現時功能太少，可以聽歌唔可以點歌，可以睇Menu唔可以落Order，實在十分雞肋。如果羅生睇到呢篇Blog，真係要諗諗張檯仲有咩可能性。如其將來每間房都有一台Surface Computer不如每間房都有一台Kinect，就我理解一台XBOX Kinect 加埋一台LCD TV o既價錢只係一台Surface Computer o既十分一左右，但就現時黎講娛樂性以至User Experience都好過Surface Computer一截，既慳到皮個客又滿意，何樂而不為？

其中一樣一定要提係Red Mr o既食物，網站用到”味覺感動”黎形容果然無吹水，串燒同炒粉麵水準都十分高甚至好過出面唔少餐廳。能夠o係零晨一兩點炒粉麵可以做到有如此鑊氣實在難以置信，希望及後其他分店都可以Keep到呢個水準。呢個聖誕o係Red Mr應該係咁多年黎過得最豪最盡興o既一晚。

講到豪，Red MR收費一o的都唔平，基本上係人愈多，房愈大，收費愈貴(請參考官網)。有兩類人十分適合幫襯，第一類係合家歡有細路，因為有人話細路唔計人頭費(最好打電話問清楚)，第二類係一班人會開大酒，因為Red Mr訂房八人以上係免收人頭費，但係有最低消費，雖然話最低消費除開貴過人頭費，不過”最低消費”可以食晒落肚，人頭費唔可以，計落仲有著數。

翻查Wikipedia資料，原來本地唱K文化已經接近有廿年，對我來說印像最深應該是當年以Neway，Big Echo為首的大聯盟與加州紅大戰一役(當年加州紅發明了獨家試唱令其他K場處於挨打狀態)，最後大聯盟因為Neway過檔去加州紅陣營而遭瓦解，K場亦因而陸續倒閉，最後只剩下Neway跟加州紅，而加州紅於今年年頭更反被Neway收購令Neway成為本地唯一連鎖K場。觀乎廿年來的發展，從來沒有像今年頭這樣零競爭的局面，市場極為不健康。今次羅生打本進入KTV市場對消費者絕對是一件好事，一來多了選擇，二來終於可以有”五大”歌曲唱。我相信只要音樂不死，K場一定有可為，不過暫時Neway應該無須太擔心，因為現時Red Mr人均消費比Neway略高，一般年輕消費層相信仍然會傾向幫襯Neway。Red Mr不妨像以往Red Box Green Box的方式，多照顧中下消費層，畢竟並非每個年輕人Weekend動輒可以拿出二三百多元出來唱K。

一般香港人對黑暗o既定義可能係 – 好暗。無他的，香港深受光害影響，就算臨訓前熄晒燈擘大對眼都可以清楚看到週邊事物，訓醒第二朝又係光明的一日，換句話說其實香港人好少體會到伸手不見五指的”黑暗”。

在復活節前小弟已經在Now新聞睇過”黑暗中對話”體驗館的介紹，直至上星期聽到有去過的人Comment”想再去多次”吸引我幾日前決定去體驗一下。而參觀之前一晚我曾經在Google搜尋過相關介紹，發現大部份搜尋結果都是傳媒介紹，甚少有體驗館參觀者的評語。希望以下的介紹可以給未有去過的朋友作為一個小參考。

“黑暗中對話”體驗館是要入場人士感受一個全程伸手不見五指的體驗，因此在入館前，職員會要求參加者將所有會發光的物件(包括手機)寄存在館外的Locker。然後會給你一支”手仗”(即我們平時說的”盲公竹”)，大概介紹完手仗使用方法後，便會進入全黑暗的體驗館，由導遊帶參加者以視覺以外的方式去感受體驗館內不同場景，包括用手去觸摸，用鼻去聞，用耳去聆聽周邊。顧名思義，”黑暗中對話”是有”對話”環節的，導遊會跟參加者在體驗館內的最後一站一起坐下來一邊”飲o野”一邊談談感受(以上過程都是在黑暗中進行的)，亦可以問一下導遊問題，而我就這個不經不覺有75分鐘的旅程問了導遊一個問題：請問最裡有多大？(答案不在這裡答，想知自己問導遊)

在此我不多談館內有甚麼，最好還是自己去感受。體驗館概念是從德國引入，並以社企方式營辦，為視障人士提供工作機會。剛剛所說的導遊都是視障人士，換句話說在體驗館內其實參加者跟導友一樣都是在黑暗中遊走。”黑暗中對話”沒有既定訊息帶出，主要是參加者自己感受。其實在未開始行程之前，我已經想像到體驗館面積應該不太大，如果在館內能夠看見的話我想信這是一個五分鐘耐可以行畢的旅程，可是我們卻行了超過一小時，各位試試將心比己，想像一下視障人士在日常生活中的難處，希望各位日後遇見有需要的殘疾人士都可以幫他們一把。

根據介紹，主辦機構透過體驗館為視障人士提供具尊嚴的工作及提高公眾對殘疾人士的認識和包容。早前體驗館在白色情人節辦過Blind Date，接下來正構思辦Dinner in the dark。

剛回家途中再回想在館內”看到”的，我不太懂形容，因為我們的記憶一直都以影像方式儲存在腦海，今次體驗卻沒有影像，只有聽覺，觸覺。平常我們活動大多數是睇戲，睇演唱會，小弟建議各位不妨去”黑暗中對話”體驗館感受一個完全沒有影像，相信一定是”前所未有”的旅程，

PS: 在此特別感謝導遊Eunice帶給我們難忘的體驗 =)

香港九龍美孚景荔徑8號盈暉家居城2樓215號(鄰近美孚港鐵站，官網有詳細資料)
http://www.dialogue-in-the-dark.hk/
貼士1: 體驗館逢星期一休息
貼士2: 網站有提供翌日門票預售服務，即日可以嘗試Walkin購票，但建議先致電查詢