小弟本身對葉問2興趣不太大，可看可不看。如果要說最有興趣應該是想知為何在電影其中一橋段有觀眾會在戲院一起大叫這樣的”high翻天”(據了解在新加坡戲院播映時也有這個情況)，但因為沒有空檔的關係最後也未有看過。直至上星期六，我看過”打擂台”後向友人大力推介，友人跟我說：”葉問2″仲好睇喎! 就是因為這句話，星期日晚便去戲院看過究竟。
基本上葉問2跟上集Formula是一樣的，只是架仔變了洋人，林家棟的擦鞋角色變了鄭則士做，更甚的我覺得葉問2可以直接形容為”翻拍葉問1″。打鬥場面都是這樣那樣，沒有甚麼好說的。反而想談談打鬥以外的。
葉問2本地票房超4000萬，國內票房超過2億，絕對是成功的電影。只能說電影對民族情緒的商業考量非常精準，亦因為這樣觀眾才會High到一起歡呼，而個人觀感是，就算加了幾句”有意思”的對白，亦改變不了這樣場面的突兀。要拍好人打壞人，壞人慘敗，Fine。但今天的中國，辦奧運，搞世博，講和諧，理應主張民族共融，刻意挑起民族矛盾去取悅觀眾實在值得商榷。
電影對我來說只有兩個可能性：一) 娛樂 二) 有訊息要帶出來，葉問2不屬於前者， 那如果是後者的話有甚麼訊息？打倒英國人，好o野？可能大部份觀眾都十分Buy這樣的電影，但請恕我實在接受不了。我並非明光社，本文無意抹殺觀眾對”葉問2″之認同，我只想提出，要帶出”中國人要自強”的訊息，不一定要打殘其他民族。今時今日要令其他民族對中國人尊重，不是靠打，更不是靠錢。我認為這點才是今天處於”經濟水浸”的中國人要深思的。
我承認對”葉問”出品人黃百鳴是有Bias的。對我來說他最經典的不是家有囍事，而是其有份編監的大贏家，竟然可以將一套喜劇做到完全唔似喜劇仲要悶到訓著，實屬難得。他好像分不清楚”懷舊”跟”舊”的分別，竟然可以一式一樣拍賀歲片，這樣的港產片究竟還有幾多個十年？
上回講到我係五月天頭號粉絲，其實我仲係本地數一唔使數二o既流動電話網絡商3香港頭號粉絲，五月天以外我最撐就係3。正所謂夠膽做就夠膽認，我o係talkonly絕對係3打手，不過我唔係用手而係用口(同埋我死蠢無收錢咁解)。話說昨日傍晚全香港3做o左幾粒鐘系統升級，竟然有用戶話係網絡死o左，仲用埋粗口鬧爆佢。我真心戥3唔抵，佢地實在太唔了解3香港其實係幾咁”用心良苦”。
正所謂爹親娘親都不及李爸爸親，不知不覺李爸爸由各位出世之後，阿媽抱你出院o個一刻已經開始照顧你起居飲食。今天政府唔起公屋，唔起居屋，連大家可以買到平o野o既公屋商場都賣埋俾領匯。不過唔緊要，因為李爸爸o既百佳大把平o野賣，仲會幫你”日日賺”，好過買股票!! 李爸爸仲幫香港人o既品味增值，將百佳Upgrade做Taste，等大家買o野都買得有Taste o的。所以計我話，李爸爸出品，必屬堅料，死Network呢o的事係無可能o係3發生，我作為頭號粉絲有必要為3平反!!
首先，我認為返工放工搭地鐵上唔到網或者勁慢係十分應該o既，因為返工放工o個陣根本就唔應該上網，3十分明白都市人忙到連自己休息時間都照顧唔到，特登俾機會上班一族有休息時間，唔似得數碼通咁，返工o係地鐵係咁玩Facebook Twitter，返到公司仲邊有心機做o野呀大佬？仲有你地知唔知真正令人與人之間距離拉遠係乜？係電話呀!! 荃灣打黎旺角又搵到你，台灣打黎旺角又搵到你，你地有無諗過如果電話窒下窒下，成日斷線，雙方就會自自然然約埋o係間Starbucks慢慢傾，呢個先係真真正正令人與人之間距離拉近o既辦法。
如果大家都係唔信3係幫緊大家，我再舉一個親身見證跟各位分享。話說小弟上個月某個晚上用緊iPhone上網等緊五月天歌迷會網站九點正賣飛，正所謂冥冥中自有主宰，我相信3係知我已經買o左飛唔上我徙錢睇多場，特登踏正九點令我上唔到網，仲要岩岩好淨係o個幾分鐘上唔到。最後我慳返幾百蚊，你地話3係咪比任何一個台體貼先？但係班3用戶唔珍惜3俾佢地o既機會，仲要返過來投訴3，有無搞錯？
昨晚3網絡”升級”o個陣，我同女友食緊飯，我無得上Twitter，佢上唔到Openrice，試問各位有幾耐未試過呢種Internet in the dark o既體驗？科技發展使人懶惰，3再次喚起香港人o既勤奮精神，比起Google提倡樣樣都靠Search Engine更偉大!! 多謝3，I love you !!
今年大年初六晚，talkonly節目做到翌日零晨三點，食埋宵夜(其實可以叫做”早餐”了!!)已經差不多係”清晨”將近五點。我渣車送占士返屋企，之前淨係知佢o係旺角轉N車回家，但係無諗過佢屋企原來遠到連我渣車都覺得勁遠，當時o係度諗：平時佢o係talkonly做成幾粒鐘節目之後搭小巴到旺角轉N車返屋企第二朝點返工？我在車上問佢：咁樣返屋企仲要咁夜咪好”lor”命？佢答：唔”lor”命。
最近心裡我經常對各talkonly主持有個疑問：點解要做talkonly？我經常話talkonly唔係自負盈虧，因為從來都無固定收入，所以talkonly只係一個”自虧”節目。個個星期五晚捱更抵夜做talkonly，返到屋企零晨三四點，仲”支力”過返工但係一個仙都無，真係值得嗎？
我本身其實唔係咁鍾意講o野(以前搭小巴唔係最後一刻無人叫落車我都唔會叫)，口才亦唔了得，只係誤打誤撞o係科網泡沫年代o既Radiorepublic開左個節目，而又咁岩識到小黃做就初期o既talkonly。初期talkonly並唔係諗住講IT，又係誤打誤撞講o左一集寬頻o野變o左做IT節目直到現在。話就話今年係talkonly十週年，其實斷斷續續中間有四年無做到，那段時間有一年我落o左腦場做Sales，可能因為返工講太多，所以工作以外愈來愈少講o野。說話少o左換來係聽多o左，而咁多年來o既聆聽換來一個小總結係：我相信人性本善，但大部人口講同心中所想都會有所差異。
記得有一次請o左個o係學校工作o既嘉賓上黎節目，開台前一齊食飯閒談，當時我在談及校園吸毒問題，嘉賓問我呢o的敏感話題可唔可以細聲o的講。我反問嘉賓點解唔可以o係公眾場合談及社會問題？講真心話應該係人類最自然o既本性，點解永遠要遮遮掩掩？我唔係想怪嘉賓，但實情係當社會人人唔敢或者唔想講真話o既時候，人一定唔會開心，社會衍生問題亦會愈來愈多。而talkonly所堅持係講真話，我地所讚所彈o既未必係所有聽眾所認同，但一定係我地所相信。
答返第一個問題 – 做talkonly真係值得嗎？在我個人而言，此時此刻我仍然覺得值得做。QA經常話o既talkonly風格就我o既解讀係 – 主持中不同立場所產生o既火花。可能大家覺得QA鍾意認叻，但係佢提o既o野夠尖銳，占士雖然說話唔多，但係一句到位，ifg代表住佢o個代，A網友係最有心做資料搜集，地畢最Hyper，馬高對Palm始終如一。我對這樣的talkonly主持組合珍而重之。雖然我對talkonly這種自虧製作模式仍然擔心無以為繼，但無疑因為咁talkonly先可以暢所欲言，無須向任何利益團體賣帳，我相信呢個世界點都要有好似我呢o的咁o既傻仔去顯得聰明人有幾聰明吧？
talkonly一集節目長度分分鐘比某些網台一週節目長度總和還要長，因此與其話講台係一個”節目”不如話係一個”台”。而我經常都有呢個疑問：聽Archive 的聽眾要分多少天才聽畢一集節目？在此小弟十二分感謝各位友好及高質素聽眾對talkonly的支持，當然亦要感謝主持們這些年來的付出。但願talkonly接下來可以好好維持，未敢突破， 但求繼續能為各位聽眾服務，謝謝。
黃子華在其棟篤笑講過：社會，科技o既進步同時帶來一o的問題，而呢o的問題佢認為未必能夠解決。
大約一星期前，一名姓趙女子在YouTube上傳一段短片，內容大致係因為廿蚊差價而鬧爆一位Shop Manager。後續發展係，”網民”不滿趙小姐所作所為引起一場起底浪潮。除左相片，住處，就讀大學之外，最新消息係有網民投訴佢涉嫌逃稅。
在此我不多講A有幾岩，B有幾錯。在文明社會之下，你桶我一刀並不代表我要桶返你一刀，兩者唔應該有因果關係。所謂”起底”是對是錯我不敢作一個客 觀定論，但我的主觀判斷認為事情已經發展到過火的地步。趙小姐做的是對是錯我不多談，要談的倒是我們這些在食花生等睇戲的站在甚麼位置。
文章主旨”網絡欺淩”指出的不單是網民對趙小姐的攻擊及起底，還有就是在看這件事情發展中的我們，如果我們將事情當作娛樂版C1頭條來作茶餘飯後的 話題，我們某程度上已經是”網絡欺淩”的一份子。說坦白，我沒有道德光環，唔睇唔講無可能，至少希望各位明白大家站在甚麼位置，應該甚麼心態看待這件事。 如果各位覺得起底組做得好，有好戲睇的時候，下一個被起底可能就係你。
這件事的發生亦令我想帶出兩個問題，首先趙小姐再一次給大家一個正面教訓 – 唔好將你屋企擺上網。我一直認為上網用Facebook Twitter已經等於出街露械，乜野都俾人睇晒，但最重要唔係點樣避免呢個情況發生，而係要接受呢個事實。講就咁講，不過有o的無謂既相(工作證之類) 可免則免。FB最好唔好有同事連繫或者最好公私分開。最後一句，自求多福。
另外有關這件事有一方好像未有人提及過的 – 論壇負責人。那些坐擁大量廣告收入的大型論壇，為甚麼論壇負責人可以完全沒人察覺問題嚴重程度讓事情發展得那麼”順利”，可能我說網絡需要監管令你感到不 悅耳，但我更怕這句說話是由政府說出來。話說回來傳統媒體每每在這些起底事情發生後大大聲講：網絡無王管。容我Quote下今期東週刊封面故事的最後一句：
趙燕萍濫用網上平台攻擊他人固然不對，但網民肆意侵犯別人私隱亦不見得道德，看來是時候研究如何加強監管網絡世界。
看看東週所謂保障事主的薄格相片，在此我要向那些佔了便宜又要批評”網民”不道德的傳媒說句： 你們比你們口中不道德的”網民”更不知所謂。
十四歲教科書，熊澤老師話長大就係：黑色唔可以話係黑色，白色唔可以話係白色。
我所認知既長大係：有o個句唔可以講o個句，呢個世界無對錯，只有既得利益，歷史都要改變。
可能我講既野無人會明，好抽像……其實我都唔係好明。點解政府拍咁多廣告叫人唔好吸煙，又擴大禁煙範圍，但係又繼續俾可以賣煙？點解馬會開賭，又同時撥款幫人戒賭呢？呢個社會對我黎講真係好奇怪。
我提出咁多奇怪既點解源於”林兆鑫事件“，我唔係明光社人，無道德光環，我接受坦白從寬，不過呢條友竟然企圖掩飾失當，我諗唔到點樣可以原諒呢個人，而最後法庭亦判囚廿五個月，奇就奇在好多達官貴人都有寫求情信幫佢。難道現實社會就好似學校那樣，可以用優點抵消缺點？如果係咁究竟做幾多件好事先可以抵消一件壞事？
熊澤老師續說：如果長大就係這樣，咁我寧願我個女唔會長大。
Recent Comments