我曾經有認真諗過有無辦法可以令更多人睇我個Blog，一個大熱Blog最重要o既關鍵係專注寫某一個類別o既o野(除非你係明星，寫咩都有人睇)，而我就係衰唔夠專注o羅。我覺得我係可以專注寫飲食，可惜我又鍾意寫埋鬧爆王國興o的無聊o野，好彩我唔係靠Blog搵真銀，唔係乞食都有份。
講返正題，話說有一日，流料ROY同我講o係新蒲崗食o左間西餐好得，有Ruby Tuesday水準但係價錢平一截，一定要試試咁話。我問佢o係邊，佢話o係越秀廣場對出但係唔記得名。前排某個weekend我就同女友去搵呢間唔知咩名o既西餐廳。搵云越秀三邊出口都唔見有一間西餐廳，當時已經知道俾佢o的流料昆o左，最後一場黎到無理由空肚折返，咁岩就行過o左呢間Houston喇 (後來我地估佢講o個間應該係J&V，但佢又話唔係，係一間叫WeWu o既物體，可能佢做得鬼節目多，食o野都撞邪)。
第一次去o個陣，坐底o個陣得一台客，未食o個陣有o的怕中雷，還好呢度o既餐湯為我地打o左支強心針。正所謂商場得唔得係睇廁所，一間西餐廳得唔得就係要睇個湯。好多餐廳o的羅宋湯其實係喪落類似tabasco o既調味料落去做濃o個味，個湯本身其實唔夠料，情況等於中湯落味精一樣，呢度個湯一飲已經知道係足料。
每個Set加$20都有個小食，必點o既係水牛城雞翼，雖然醬汁略甜，不過呢個又甜又辣o既醬汁配上外脆內滑o既炸雞翼絕對係天衣無蓬。(其實兩個人叫兩個set可以考慮只點一個小食，因為我食完兩隻雞翼同碗湯已經Full o左大半，仲要未食Main Course 同Dessert)
意大利飯係我好想試o既菜式，因為我好希望唔駛下下過澳門先食到有水準o既蘑菇意大利飯。公平地講，Houston o既意大利飯算做得唔錯，起碼食落唔似沙膠粒，係個味唔夠，期待有改進。
呢度其實我真係覺得可以一個set兩個人分，因為樣樣都大大份，食完雞翼唔計塊扒仲有大大舊焗薯等緊你，仲要未計Dessert，Outback兩舊幾水都無咁多o野食(扒Set $168，意大利飯Set $98，每款小食加$20，未計加一)。
正宗Tiramisu俾我印象係 – 甜到漏，勁濕，成pat屎。好多香港人見識過正宗o既都會覺得好難食或者好怪，而呢間o野個Tiramisu算係o係正宗同遷就香港人口味之間取得唔錯o既平衡，我覺得係OK到可以walkin入去齋食呢個Dessert。
其實呢排我真係寫少o左食，除非好食到千里迢迢屯門落到灣仔都值得，否則都唔會特登開個blog黎講。坦白講今次介紹呢間Houston算十分有水準，但有未係好食到要特登去，不過我去兩次，兩次都無乜人，今次去仲可以包埋場，點都要開個blog黎推介下，免得執笠之時後悔莫及。我估計極有可能係因為相對新蒲崗區內消費群，Houston o既人均消費過高，導致有水準但係生意淡薄o既局面，有意經營食肆o既朋友可以此為鑑。
小弟每年總有兩三個週末會到澳門，一為工作，二為飲飲食食。對上一次過大海是上年八月，事隔半年再踏足此地，我正式宣佈：澳門已被自由行攻陷，旅客太多，平時賭場不用排隊的兌錢櫃位也得排隊，去關閘的人比去其餘兩個碼頭的人加起來還要多。
可能我比較勾，我是因為”蝗蟲天下”一曲才知道網民以”蝗蟲”形容自由行。然而個人不太認同以”蝗蟲”這樣帶負面的一詞去形容內地旅客，但撇除該詞的負面因素，倒是形容得十分貼切。自由行所到之處就像行年宵一樣，如果每天出街都是這樣，你會想出街嗎？香港人愛外遊就是想離開一個濟逼的地方，誰不知外遊地方原來更迫，你叫香港人怎樣放鬆呢？本以為假期外遊是”放監”，原來只是”監獄調倉”。聲明一點，我不是反自由行，其實任何一個國家只要有大量民眾急不及待洗錢，又有些許”文化差異”都可以造就自由行，只是現時地球只有中國一個國家做到吧。不少地方都為了自由行這個龐大消費群作出改變，以往日本餐館沒有英文菜單，但因為自由行，現在多了中文菜單，部份商戶用銀聯卡購物更有連美帝的VISA MASTER卡都沒有的優惠，政治不正確也得說，各地旅遊業都對內地自遊行，又愛又恨。
說回正題，小弟每次過大海都會過埋夜，新口岸跟氹仔不少酒店都有住過(暫時覺得金都性價比最高，萊斯最雅緻，星際房間最好)，而今次去的是位於內港的十六浦酒店。未出發，先失策，我成日仍住巨龍是往返新口岸，訂票後才發覺巨龍是到氹仔的，而十六浦酒店shuttle在港澳碼頭那邊，所以遊了一個漫長車河(這是自己問題，與人無尤)。
先講講巨龍，其一艘雙體船的載客量已經接是一艘Turbojet或者金光飛航的三倍，船程其實跟後兩者差不多。可能因為載客量多三倍，上船時連服務員都得別多，只差未有列隊歡迎。經濟位好像比平時的窄些少，但感覺還好，更重要是少了一浸自由行，整個船程寧靜了不少。唯一大問題是班次太疏，尾班竟然是下午五時，間接令每班船乘坐率十分低，但願巨龍有一定背景，不然難以維持經營。(此blog見街時Beecrazy好像還有做巨龍豪華位團購，不妨參詳。)去到氹仔碼頭，最開心是終於有E道 (如果一年會去一兩次的話絕對值得花少去時間登記，幫你慳唔少時間)，CTM亦有提供microsim的儲值卡。
岩岩講到遊車河，我的方案是先乘金沙shuttle回新口岸，再由金沙乘shuttle到港澳碼頭，港澳碼頭乘十六浦shuttle便可到達目定地。在此要特別一彈十六浦的shuttle，班次疏落，又要拎飛，我在澳門從未試過搭酒店shuttle是人等車的，以這樣規模的酒店絕對不可接受。後期才知道原來該酒店來往港澳碼頭的是十六座，來往關閘的是大旅遊吧？明白未？以往過大海都不是shuttle就是打的，不過因為這家酒店shuttle疏落，附近又難打的，我跟女友才的起心肝學搭巴士。在此我建議各位可以買到便利店或者來來買張澳門通(即香港的八達通)，除免了搵散銀的麻煩，亦因為澳門政府有一德政 – 公交車資優惠計劃，用澳門通付費比現金再平一截，回港後如果有需要亦可轉贈給其他朋友，慳返的士錢夠去晃記買手信。
澳門巴士網站
新福利巴士
說坦白揀十六浦其實是因為看過朋友在那裡拍的一輯相，看似美輪美奐，實際因為週邊舊區環境所限有一點落差，小弟多付了百多元”升級”到海景套房，原來所謂海景是一條比城門河略闊一點的東東，值得升級與否見人見智，新一批酒店來說十六浦的房間保養算是比較差的一批。然而是這樣，作為愛吃的我十六浦地理位置的確一流，步行五分鐘已經是十月初五街，十分鐘已經是大三巴範圍。兩家米芝蓮推介平民食肆都在附近，一家是十月初五街的牛記，另一家是距離牛記不到五分鐘的六記，不能比這樣更便利吧。如果話要揀附近必食我會推介牛記的蟹黃撈麵，一字記之曰 – 夠味。另外六記轉角那家”楊枝金撈”糖水亦值得一試，雖然都係食跟滿記發記差不多的東西，不過這家點十分足料，芒果肉喪多而且很甜，芒果怪不容錯過(留意這家店落料很有給力，一個desert兩份share已很足夠)。
對上一次為各位介紹過為於新口岸的經典意大利餐廳，今天要為各位介紹鄰近媽閣的比薩薄餅店。唔好以為比薩薄餅店是像Pizza Hut賣Pizza的店，當然這裡有Pizza賣，不過其實它跟經典一樣都是食傳統意大利菜的餐廳，經朋友了解後原來經典是女兒開，比薩是老豆開的，難怪兩家味道差不多。菜式方面後者選擇比較多，亦沒有前者的一些怪規矩(經典其實是嚴禁拍照的)。無論怎樣，我每次過澳門都指定要吃他們的蘑菇意大利飯，我唔敢講香港吃不到這樣的味道，但這個價錢在香港要吃到這樣質素應該不太可能。米粒有咬口，但未咀嚼前蘑菇味已經充滿在口腔當中，每次吃完都教人回味!
檢視較大的地圖
風乾牛肉芝士，重口味芝士迷必點
手信可以唔買，蘑菇意大利飯一定要食
上次試過這裡的Tiramisu，十分正宗，亦因為太正宗，香港人未必受落。今次試意式雪糕跟雞蛋布丁，前者味道清新，MOP$28一大球，推介!
以往過澳門意大利菜是必食的，經過今次之後要加多一樣必食 – 日本菜。事關澳門友人介紹了一家十分出式的日本料理 – 鬼丸。這裡有矜貴的日本菜式像藍鰭跟山形牛，亦有十分平民的烏冬拉麵。我可以告訴各位，這裡的矜貴菜式的確貴，不過還是吃得出價值出來，不會呻笨。無興趣食貴的亦可叫一個MOP$49的叉燒拉麵，叉燒不是一舊硬硬的那種，肥瘦做得剛剛好，特別特別要留意是這裡的地獄湯底，由初級第一級都最辣第十八級，我吃第二級已經覺得吃不了第三級，不過因為湯底太正我還是整碗渴掉，如果有人吃到第十八級請拍片，真係要頒個獎俾你。
在較大的地圖上查看NetBugs 美食版圖
藍鰭腦天，友人推介，唔係唔好食，不過價錢呢......見識過就算吧 XD
用青瓜絲做的蟹籽沙律吃得多，用青蘋果絲做的還是第一次
十八層地獄叉燒拉麵
(Thanks 潮童H for those photos)
近期網上熱話終於由Youtube”真真正正”回歸電視，事關Now TV搞o左個新節目”撳錢”，觀眾安在家中答中八條問題就可以瓜分高達十萬獎金。我話”真真正正”回歸電視係因為以往無記熱門電視劇唔少人最後都係上mytv睇返，但”撳錢”就唔同，唔單止一定要睇直播，仲要廣告汁都要撈埋免得miss o左下一條問題，所以話Now TV今次真係算到盡一盡。不過我最有興趣o既並唔係幾萬個觀眾答晒八條問題最終有幾多人瓜分獎金，而係過o左二十號試睇仲凈返幾多人肯每個月俾HK$55睇呢個101台？
為o左”撳錢”，唔少朋友到捕定o係部電視機面前，準備埋notebook上住Google搵答案。其實”撳錢”問o既問題有唔少都幾本地化，不過本地化又唔代表容易，唔好話我呢o的八十後，我阿媽甚至連鄭寶鴻都未必識答。好似上星期有集最後一條問：邊個令本地公廁有廁紙用？衛奕信，彭定康，董建華，曾蔭權，四個揀一個。斷估都係衛奕信彭定康求其一個啦，點諗到咁鬼有建樹o個個原來係想當年我地最憎o既董建華丫？所以話，好多平時我地成日見，成日講o既o野，其實未必有我地想像中咁熟識甚至根本唔係o個一回事。好似我地成日話香港係”法治之區”，究竟”法治”係咩黎？
我相信唔少朋友o既理解係”法律管治”，其實呢個係”美麗的誤會”。如果話法治講o既係”公了”，咁依家o既香港應該係”私了”比較多。法治社會應該唔會有一場毆鬥後報晒警第二日收o左人十二萬同大家講係一場誤會然後不了了之，法治社會應該唔會係有路權問題然後有人同你講有個唔願開名”善長”買起o左條路，依家搞掂晒。最妙o既係應該involve但無involve 過o既政府高官竟然失驚無神遞o左隻手指公出黎”讚好”。呢兩件事話俾我地聽兩件事：1) 政客不可信，地主才可信。2) 套用呢個”善長”理論，我認為ICAC應該同公益金合併，因為呢個世界無賄款，只有善款，而強國應該可以稱之為慈善大國，因為裡面有唔少充滿善心o既善長人翁。咁既然”法治之區”唔係咁解，又係點解呢？
“法治之區”其實係講緊”佐敦區”，因為文苑街有間十分有名o既”添記法式三文治“。
有時食物o既配搭未必一定要花巧，簡簡單單都一樣可以有意相不到o既效果。香港o既茶餐廳就發明o左一個既簡單又永恆o既經典 – 早餐A：牛油餐包，西煎雙蛋。火腿通粉(撳錢不妨問下火腿通粉係邊個發明，我實在好有興趣知)。法治同樣有異曲同工之妙，簡單一舊麵飽，配搭幾樣食材就成為一份美味o既法治，當然呢度o既法治出晒名係因為老闆落足真材實料，每份法治都有扎肉，五香腩肉，咸豬手同嚼肉。除o左有唔少名人時有光顧，連狗都成日幫襯架。話說有位女仕時不時就會帶佢隻狗落街散步，隻狗每次行過間鋪聞到香噴噴o既法治就會停低係咁吠，主人點拖佢都唔肯走，呢個時候老闆就會丟一塊肉俾佢食。隔離對情侶話：連狗都識欣賞法治喎!! 呢個講法極其量只係岩一半，我唔識聽狗話，唔能夠否定隻狗真係識欣賞法治，但可以肯定o既係，佢只係食緊一塊肉，並唔係法治。法治o既奧妙係一啖過餸連飽咁樣食，所以佢食o既並唔係真真正正o既法治。
9up完一輪，同大家分享一個故仔。 幾年前，我同IFG走o左去青衣城地下間扒王之王食lunch。IFG掃o左一輪本Menu問Waiter：乜o野係法式雜扒？係咪有o的芝士再加o的XYZ汁落去。個侍應俾o左個不能更好o既答案佢：法式雜扒都係名黎o者，總之係雜扒啦。其實食o野最緊要係好食同埋係咪真材實料者，名o既o野其實真係唔係咁重要，俾你得個名有__用呀？潮語有云，認真就輸鳥。
如果話廟街食煲仔飯那處是街頭，那廟街的另一端應該是何處呢？
話說早陣子小弟在開飯找麻辣食店已經有留意過一家在佐敦的”麻辣媽媽”，不過一直未有幫襯過，終於到上個月跟友人有機會到那處一試。小弟在Google Map找”廟街237-247號”，並照那個Drop Pin到了廟街的牌匾下，以為到了廟街尾找了好幾遍還是找不到，最後打電話到”麻辣媽媽”查詢才知道”麻辣媽媽”應該在牌匾對面。這個故事的教訓是，Google Map的Drop Pin信七成好了(其實上回在長州找師妹甜品已經領教過，但公平地說，Openrice的Drop pin是正確的，看來因為這個關係真的有需要裝Openrice的App到iPhone)。
麻辣媽媽地方不是太大，但總算坐的舒服，門口像酒樓放了個大魚缸，看來那處的海鮮應該不錯，從Menu就看到有一味水煮龍蝦。 除了海鮮，Menu的菜式多元化得有趣，有麻辣，也有炖湯跟甜品之餘，連蘿蔔糕都有得賣。從嗜辣的角度說，這家店對我來說頗為失望，因為那些麻辣菜既不麻亦不辣 (丁點辣倒是有的)，不過還好菜式味道還是不俗的。
麻辣生蠔煲：我跟友人本身不太愛吃蠔，不過既然是招牌菜當然要試一試。正如剛剛說的，不太辣，但味道不俗，尤其這樣吃生蠔還是第一次試，推介!
青檸樹：這家店，可以不吃，但一定要飲這杯青檸樹，青檸汁加類似沙冰的青檸泡， 而且超大杯，一杯可以兩個人Share。
焦糖燉蛋：在好奇心驅使下點了這個焦糖墩蛋，果然沒有令我失望，燉蛋好像走了糖，焦糖硬得像冰糖，小心咬繃牙。
剛才介紹的麻辣媽媽算比較適合”食唔到辣又要食”的那類朋友，如果各位食得辣，可以試一試在文苑街那邊的”隨變麻辣雞煲”。
“隨變”位於上回介紹”點點心”的轉角位，未介紹吃先要講解walkin攻略，因為這家店都是長期要等位那一類。這家店每晚六點半開舖，不設電話訂檯。由於店內只有八張檯，如果要吃的話建議各位五點九前要到店前拎籌，不然零晨才好walkin (這家店關門時間為零晨三點)。
那天我跟兩位友人叫了一隻雞的麻辣雞煲，當雞煲來到的時候看似份量不是太多，不過食到尾聲的時侯還剩下不少，名符其實眼闊肚窄，建議各位人不太多可以叫半隻雞份量的麻辣雞煲，這樣可以點其他火鍋料試，其中必試的是凍豆腐，配合雞煲湯底味道一流。說回麻辣雞煲，如果食得辣可以嘗試中辣甚至大辣，如果不想吃得太辛苦吃小辣好了。雞肉方面相當滑，吃了一個多小時後從煲內夾起來的雞仍然不太”鞋”，可能因為煲內有一整隻雞的關係，湯底愈食愈有味，值得一試。
飲茶本身屬於十分草根的飲食文化，”一盅兩件”指的是一杯茶跟兩款點心，價錢既要相宜又要食得飽，以往食客不會對點心有太多要求。不過今時唔同往日，香港人越食越咀刁, 食點心也要講究. 點心專門店亦因而應運而生, 而且愈開愈多. 當中得到米芝蓮一星推介的添好運最為人所熟識. 每次駕車經過旺角總店都有一大班人在排隊, 驅使我前陣子也慕名去到添好運深水土步分店一試其馳名中外的酥皮叉燒包。
公平地說，小弟未幫襯過總店，但分店的點心水準實在十分一般，至於那個酥皮叉燒包，其實我並唔覺得特別好食，而且有點油。我覺得在公司附近酒樓吃的叉燒餐包比這個好吃得多了，現在看來有點過譽了。如果米芝蓮那位食家有去過添好運分店內的廁所，我肯定今年米芝蓮推介名單內一定沒有這家食店，那次我差點在廁所表演MJ獨門絕技Moonwalk繼而仆街。我得承認我是吹毛求疵的，不過過這樣的水準加上異常擠迫的座位安排，實在不值得呆企等一大輪幫襯。
我個人十分崇尚Steve Jobs經常掛在口邊的user experience，對食的看法也如是。食物未必要好食到飛起才是好，食店提供的不單是食物，還有地方跟服務，這些都是小弟對食店評價的重要因素。在香港，通常好食的都要排隊，服務往往差到無倫，消費者往往要衡量食店食物是否值得自己忍氣吞聲。今次為各位介紹的點心專門店並非米記推介，但經小弟多次幫襯，我確定這家小店絕對是好食，好坐，好服務，而且價錢十分相宜。
“點點心”位於文英街，斜對面是人氣小店棠記腸粉。點點心地方不算大，但坐位相當舒適。特別一提侍應會每幾分鐘就主動替食客斟茶，然而斟茶不是難事，但試問這樣簡單的服務又幾多家可以做到？兩個人食到飽一飽，賣單一百有找，實在未能找到可彈之處。
真係菠蘿包 – 點點心的點心紙每隔一段時間會有所不同，換句話說今次食過的點心下次未必食到。不過”真係菠蘿包”肯定會食到，因為這是”點點心”的招牌菜。”真係菠蘿包”是個迷你版菠蘿包，之所以叫”真係菠蘿包”是因為這個菠蘿包內真的有菠蘿肉，除此之外還有少量奶黃，令熱辣辣的菠蘿包帶有奶黃的微香。味道是相當一流，不過我有個小建議，就是放棄菠蘿肉，多加奶黃效果更好，因為菠蘿肉同那個包其實不太夾(當然加入菠蘿肉是gimmick多於味道)。
脆皮鮮蝦腸 – 第一次幫襯”點點心”之前在棠記食過腸粉，所以那次老闆叫我試脆皮鮮蝦腸我未有點，及後再幫襯終於見識過何謂”脆皮”鮮蝦腸，簡單而言就是鮮蝦腸加一些脆皮，食落其實都幾夾。
炸雲吞 – 在此要特別一提這店的點心每一款都很夠新鮮，尤其是蝦，包括蝦餃跟剛提及的脆皮鮮蝦腸，連這個炸雲吞也如是，加上炸皮夠薄夠脆，比相像中沒那麼熱氣。
砵仔蒸蘿蔔糕 - 菠蘿包有菠蘿，這裡的蘿蔔糕也有蘿蔔條的，加上大量臘味，另一必點(飽肚)點心。
Recent Comments