唔知點解，香港人好鍾意食應節食品，每每大時大節以美心為首o既大型連鎖食肆都會大排長龍。中秋要食月餅，端午要食稯，新年要食年糕，咁呢個五月應該食咩呢？睇下呢幾個星期個市跌成咁就梗係食蟹啦，仲唔係夠晒應節？笑就講完喇，食蟹係真o既。我自己其實唔多好食蟹，應該話逢係要拆殼o既食物我都唔多好，人懶麻!! 不過女友十分好，所以月頭我地一齊去o左位於灣仔譚臣道o既蟹膳。
同好多海鮮酒家一樣，門面有好多蟹係度游水 XD
門面(右面唔係牆，係電動木趟門)
從Openrice參考呢間o野o既人均消費，晚飯最少要四位數字，肯定係高檔o野。不過由軒尼詩道行入譚臣道，由街頭行到街尾，經過o既食肆都係十分平民(其中一間係月頭關門o既昌記，據講咖喱好抵食)，實在不得不懷疑自己係咪行錯路，還好走到街尾Last一間終於見到。
打開Menu，彷彿就好似去o左旅行社渣住張東南亞三日兩夜leaflet咁，因為我預計到，埋單條數應該真係可以o係台灣渡過兩日三夜，而最後呢兩日三夜，o係呢個空間竟然可以轉化為一餐晚飯，果然係marvelous。
蟹膳有三種蟹你揀，毛蟹，松葉蟹同鱈場蟹。正當諗緊食邊個set之際，waitress話不如食毛蟹松葉蟹個set，因為鱈場蟹個set好大份，通常客人會食唔曬，我二話不說就Order o左鱈場蟹個set，原因有二：1) 俾得有返咁上下錢梗係食大份 2) 經驗之中通常越貴o既o野就會越細份，我唔係好信會食唔晒。
豆腐前菜
燒鱈場蟹腳 - 食完好似去o左蟹道樂咁.....
蟹天婦羅 - 其中有舊係蛋黃黎，咬落去會爆蛋黃槳，請恕小弟大鄉里，第一次試。食到呢到已經飽飽地。(留意：相中其係一份，二人餐有兩份，之前豆腐同燒蟹腳都係)
蟹火鍋，見到真係呆o左，waitress姐姐無老吹，真係好很大份。
蟹粥 - 睇住waitress將蟹殼上面o的糕倒落個湯度煮個粥出黎，味道無得彈，問題係當時已經飽凸。食係有食晒，不過已經無晒享受個mood(認真折墮)
蟹膳由門面到食物以至服務真係無乜可以挑剔，價錢貴就擺明車馬喇，值唔值得真係見仁見智，阿Q o的睇佢就真係幫你慳到程飛機唔駛去日本都食到咁有水準o既蟹宴。o個晚我同女友飽到真係行唔郁咁濟，如果各位四個人去的話不妨問下佢個二人餐可唔可以四個人share，咁樣我諗會make sense o的。開講有話，小食多滋味麻。而我地食到係真係要打包，可想而知有幾抵食 (咁都總好過俾o左成K唔知食過咩o既)。
後記：
以上介紹係”好食”，但絕對稱不上”豪食”。咁乜o野叫做”豪”呀？誠哥買10000呎屋有10000呎，呢o的唔係叫做”豪”，係叫做”應該”。你買1000呎屋，得500呎，咁就叫”豪”喇，因為你真係”豪”o左五百呎俾地產商。根據非正式統計，香港係全銀河系最多富豪o既人，而佢地住o既都係”豪宅”。簡而言之，豪o既真締並唔係在於你洗o左幾多，而係在於你收返幾多，收得越少代表你越豪。你跌o左張一百蚊紙落地，你會執返，誠哥跌o左張一百蚊紙落地，佢唔會執。咁你明白點解自己永遠都做唔到李嘉誠未？
小弟咁岩前排就食o左我人生其中一餐最豪o既 – 一碗淨牛腩，盛惠HK$78!! 真係發夢都無諗過可以咁貴，呢個故事話俾各位聽，Menu無o既o野最好問清楚價錢先叫，尤其好似o係尖咀諾士佛台斜路台灣o野隔離o個o的鋪頭。食蟹好豪咩？真係唔食過，你永遠都唔會知原來最豪係食一碗淨牛腩!!
有圖有真相!
淨牛腩 - 老闆積極嚮應"有營食肆""少肉多菜"大原則，碗淨牛腩個底生菜多向左走向右走到呢....
好多人話電視越來越少人睇，但係電視o既影響力睇黎未有減退跡象。TVB每次有新本地飲食節目對對於鍾意周圍搵食o既朋友黎講都係大災難，因為節目所到之處通常黎緊半年都會大排長龍，佢地睇節目唔係為o左想知有咩好o野食，而係睇下自己個地盤有無遭殃。
以上睇法固之然係比較自私，不過大家都係成年人，自私一點理所當然麻。以下Blog文係上年寫落，因為懶得過相，所以隔o左成年都無出過。適逢小弟昨晚再一次幫襯而水準不減，電視B節目攻冚葵芳區，特此為各位獻上以下”倉底貨”並提供多一個有水準o既小炒選擇。
——————————————————————————–
亂炒一通訂檯電話: 2422 1708
葵涌青山公路499號地下 (光輝圍內)
小弟在前年食過當時最Hit位於銅鑼灣的”吉列”，在那裡我造就了一個這生都不會再破的記錄 - 我呆企了接近三小時去吃那家店的吉列豬扒，由唔肚餓變肚餓，再餓到唔肚餓，到有得食的時候我已經不太肯定自己在吃甚麼。因此要評定一家食店好與壞，不單止是評定食物水準，還有包括進食過程以至埋單走人，這樣才算一個”整體”。
金潮曾經是talkonly節目完後的指定飯堂，隨著節目越來越”早”完已經無機會食，不過平日亦不會去食，因為實在太多人，不設訂位(其實有訂位的話更可惡，如果你訂了七點半，有人在七點三walkin而剛好有位，walkin的可以先吃，你等一粒鍾啦!)，五點半前未到不要想walkin。我應該算是非典型香港人，排隊食板前對我來說不可能的事，同樣要我排隊等位食金潮也是不可能，所以一直都想找個葵青區不用等位食小炒的好地方，經友人介紹下，終於找到了。
魚皮 – 比金潮大碟，有水準
乳香海珊骨 – 有團友話唔夠南乳味，但我覺得還可以啦。
脆豆腐 – 脆皮內是勁滑豆腐
水煮雞腎 – 水煮魚，水煮牛就食得多，水煮雞腎真係第一次，結論係：有水煮味，不過試過就算。
啫啫生菜煲 – 原本以為得啫啫同生菜，原來有落返些少豬頸肉，生菜十分入味，讚!
清湯蘿蔔坑腩煲 – 坑腩唔太淋，爭些少。
鬼馬炸油條 – 將墨魚膠釀入油炸鬼再切塊，成為脆皮墨魚餅，非常有創意，絕讚!
炸大腸 – 唔知係咪我食得少，我覺得這裡的炸大腸真係比較脆皮。
芥末小丸子 – 蝦丸內藏Wasabi，雖然我已經事先聲明堅辣，不過看來各位團友都唔Expect內藏的是堅Wasabi。
炸豬手 – 該店名菜之一，不過團友反應麻麻，緊隨水煮雞腎其後。
黃金蝦 – 蛋黃料比金潮少，但炸得比金潮脆，讚讚。
整體來說，亂炒一通精彩之處都是”炸物”，不過團友們都一致認為亂炒一通”煎炸得黎不太膩”。今天一行九人每人消費HK$80，價錢還可以。而最重要最重要最重要最重要最重要是，可以訂位人亦不太多，不過代價是 – 隔涉，從葵興港鐵站行過來需時10 – 15分鐘，夏天可能有點吃力，回程當消化吧…….
除非人氣食店真的有甚麼把砲的，否則還是不要那樣串，食客最終會離你而去，香港有名你叫 – 美食天堂，有得揀的才是老闆，對”老闆”好點吧!
唔知點解，好多人好似好期待我再介紹劣食。坦白講，唔係我唔想，實情係: 唔好食o既有好多，要整到o的o野難食好難，難食到要推介就難上加難。不過小弟倒是有三個食飯經常中雷o既Case可以同各位分享下。
“信用卡優惠”
依家好多連鎖食店都會同信用卡公司定時定候搞o的”半價優惠套餐”，而最有趣係呢o的所謂半價餐通常同普通Set Dinner差唔多價甚至貴o左，講穿o左其實就係將個regular 餐加多些少貴夾唔飽然後話有半價，同o的boutique “話”件衫原價一皮特價一舊水有異曲同工之妙。當然我唔排除呢o的半價餐真係會食到好o野，記憶中N前o係盛八食過一個半價餐還可以，不過亦都試過o係新都會某越南菜食o左個最紅半價餐，我永遠都唔忘記o個幾”條”唔知煎定炸到黑色o既鴨胸，劣食講緊o的o野好難食，o個幾條o野劣食都不如，遠睇唔似鴨胸，近睇擺唔到落口，真係唔係人食。
“廚師推介”
美其名係推介，其實係推貴貨，又或者推死貨。有時落到o的食海鮮o既中菜館，Waiter 都會笑笑口同你講今日o的乜乜海鮮有幾新鮮，當你話唔要o既時候，就好似一個領隊帶住班落紅磡珠寶店無幫襯o既自由行一樣，塊面梗係黑過奧巴馬啦。話說N年前去過勁大盒某間乜乜小籠包，問個waiter有咩推介，就係咁樣舊幾水食o左個勁乾粉絲，無乜海鮮o既海鮮煲。因為以上兩個Case，自始我幾唔想揀，都盡量prefer散叫，寧願亂叫都唔order set(當然仲有個好處係散叫多數唔會整定，好似以前o係麥記叫魚柳包走醬咁，包無整定)。
“豪裝餐廳”
以往本地一般平民餐館都係實而不華為主，但係唔知由幾時開始，好多餐館都係越裝越豪，連麥記依家都差唔多要每年換一次Look。其實豪裝本身唔係問題，好食就得啦，問題正正就係o的o野唔好食。好o既食店應該係諗點樣做好o的食物吸引食客，但係依家好多食店都係靠門面，完全係本末倒置，我真心覺得呢o的外表豪裝內裡劣食o既餐廳擺明係想掛羊頭賣狗肉。
前排去過黃埔某間昆蟲店食個二人餐，講緊人均消費都要一舊水，唔係Cheap o野黎。之但係食物真係hea到唔識形容，肉醬粟米片真係求其搵幾塊粟米片加幾滴肉醬落去就算。唔係想吹毛求疵，但呢間o野真係hea得很，旁邊有對男女Order o左個薄荷乜乜扒，個男o既問waitress o的薄荷o係邊，個waitress答: 我依加拎俾你。個問題係你個main course 有個咁o既名堂點會expect o的o野係後加? 最慘係我見到有對老夫婦，o係度左揀右揀，問個waiter有無得叫信用卡個半價餐，原來佢地係為o左用o個張食滿一舊水先減到廿蚊o既coupon先黎食。呢個故事話俾各位知: 便宜莫貪。
除了家常便飯廣東菜，香港人最愛的一定是日本菜，你看那些壽司連鎖店每天都大排長龍就知道。如今日本食品受輻射影響，雖則本地日本料理大部份材料都未必從日本購入，不過如今大家聽到日本菜三個字還是怕怕。今天為各位介紹另一香港熱門菜 – 泰菜。
小弟食泰國菜首選是九龍城，不用介紹近乎求其食一間水準都不會太差，如果見到餐廳當眼位置有掛上泰皇的照片可以肯定餐廳一定有泰國人打理。隆姐是小弟泰菜首選，幫襯多年，味道依然，當中芒果冰是我飲過最好飲的，還有不是每家泰菜生蝦都一定有配的炸蝦頭。不過人總是懶惰，如果有Replacement比較近當然會考慮近一店的，最近就幫襯了友人介紹了一家位於長沙灣青山道的”泰“，三個人吃每人$80左右，有魚有串燒有甜品，泰菜來說算便宜。
生蝦 -$58一碟來說應該是我吃過性價比最高的生蝦，份量的確比別家的多一截。
燒大蜆 – 鮮甜，應該是花甲吧？
燒泰式糯米飯腸 – 香口菜式，亦夠飽肚。
其實這家”泰”的確十分抵食，亦坐得舒服，之前已經想寫篇Blog推薦一下。可是幫襯二次，吃完準備埋單的時候，友人們發現遠處牆角有隻米奇高速略過，我轉身仰望，這隻米奇十分肥大，估計身長15cm，連帶條尾應該有30cm。其實香港食肆衛生環境大部份都麻麻(友人曾打趣說，旺角奶路臣街的榮園麵家是香港最衛生的食肆，別家餐廳洗碗洗碟在後巷，榮園本身就在後巷，衛生環境一目了然)，俗語有云”無眼屎乾淨盲”，睇唔到就當衛生啦，問題是我看到，所以要我再幫襯的話睇怕要一段時間淡化這個迪士尼陰影。還好我只是怕吃那家泰菜，不是怕吃泰菜，我又找到另一家在深水土步區的泰菜。話說有個星期五晚上做完節目送主持們出旺角，行經大埔道看見添好運旁邊有家泰國菜其門如市，當時已經是零晨兩三點。為此我上星期宵夜就去一探究竟。
這家Thailand Netsuwan店面極細，所以堂食的座位都是在街邊的，亦因此店鋪在晚上六時才開門，零晨四時關門。價錢不是特別便宜但尚算合理。
生蝦Again – 每隻四蚊
木瓜沙律 – 木瓜沙律食得多，這店的木瓜沙律有丁店鹹味，頗特別的。
串燒 – 我最愛這類的串燒，除了因為味道好，更重要是醬汁不用自己點，一上檯已經Eat Ready。
香港是美食天堂這句沒錯，但再多美食的天堂零晨時份店鋪總會休息，選擇總會比較少。Netsuwan是高水準，但未算超水準，不過對於零晨時份可以吃到這樣質素的泰菜，實在是一個非常不錯的選擇。
Recent Comments