夠竟一年可以有幾多改變? 一年前，我寫過呢篇文 ，講到自己有幾咁熱血，一年後又如何?
我做邊行大家應該都知，好多時候個客問埋o的根本同我公司完全無關係o既o野，岩岩前排先教過個客點樣搵返Canon相機跟機隻CD，裝個Software睇RAW，友人笑言話我就黎連性病都幫人睇埋。無論係幫客，幫朋友，甚至同自己完全無關o既人，我一直都有一個信念，幫客固之然可以加強個客對我地公司loyalty，但更重要係，我好想借呢o的一點點o既幫助話俾所有人聽，呢個世界係有好人，好事，從而感染其他人，呢個係我改變世界o既方法。
可惜事與願遺，呢一年裡面，我發現我呢種改變世界o既方法為我帶來o既結論竟然係: 對別人公平，等於對自己不公平。QA同IFGo係節目經常語帶相關講到我做老闆好過癮，咁有錢又點會明”我地”o的平民百姓有幾慘丫。實情係，返工仲慘過打工仔，每日食完飯都想衝出馬路，我Detail到諗埋衝出去可能自己死唔去反而累街坊，司機唔死可能隔離大廈地下打緊邊爐o個班人死。之但係我實在比太多人幸運，而更重要係屋企人，女友，朋友，同公司o的客。一個咁怕死，咁理性o既我，活，很難，死，更難。我一直都明白，一分耕耘唔一定有一分收穫，我要求好簡單，俾返個打工仔待遇我，雖然我知無公道，但係對我公道o的，可以麻?
一年前我覺得世界的確唔係平等，社會公義唔係守株待兔得來，係人自己建構出黎，依家社會唔公義唔可以怪個天，要怪就要怪人，要撥亂反正應該係由始作俑者，即係人去解決。一年後我終於明白，因為人o既一種本質，社會係唔可能有真正o既公義 -- 弱肉強食。又或者咁講，所謂公義，公平，只係粉飾”弱肉強食”呢個客觀事實，而我o既結論係: 做人可以自私，但係唔好太虛偽。
特首選舉已經啟動(我無講錯，人地外國選舉係先拉票，然後搞一日投票，之後開票公佈當選人，我地o係投票之前一兩個星期已經知阿爺欽點o左邊個，投票當刻已經可以謝票，Skip o左一個step，全宇宙只有一個國家可以未投先知，學王國興話齋: 真係有o的自豪!!)，其中兩個較具話題性o既大熱門分別係梁振英同唐英年。我屎忽痕o係Google 分別Search o左佢地兩個名，睇下有咩Result。梁振英Search到o既有: 梁振英落區 指屯門規劃未完善，梁振英：應助港人內地配偶，為何梁振英可以做新香港良心，睇黎正面到不堪。再睇下唐英年: 唐英年指香港沒有地產霸權，唐英年語無倫次，陳方安生搖頭O 嘴，唐英年話要強化貧富懸殊。我o既結論係: 下屆特首應該係…………唐英年。
可能你會問，梁振英作為政府中人，佢都站在人民o既一邊去做反對派? 佢仲唔係新香港良心? 點解仲要揀語無論次o既唐英年? 答案已經係個問題度。
梁振英係行政會議成員，政府重大決策佢都唔可能無Say，換句話說，佢小緊政府o既o野佢自己都有可能有份參與，咁樣黎屈政府機我都戥曾蔭權可憐。有人將梁振英同功能組別o既泛民議員相題並論，大家都係”體制內抗爭”。我唔敢話唔岩，但係前者係有實權，後者只係橡皮圖章。Anyway，好聽o的香港人比較單純，難聽o的，我地都係Buy偽善呢味o野。而我認為，一路走來，思路最清晰係唐英年，唔係梁振英。
由佢不否認要加強香港貧富懸殊，到指香港無地產霸權，叫八十後問自己點解做唔到李嘉誠，立場一致而堅定，從不轉軚。聽落好仆街，實情係佢都明白我剛才講過o既客觀事實 -- 社會根本就係弱肉強食，與其好似梁振英咁扮好人，咁不如我直接同大家講加強貧富懸殊。o係M型社會生存，唔想做貧o既一邊，就要做富o既一邊，叫八十後做李嘉誠其實係為我地好。唐英年講o既都係中肯，發自內心，佢先係真正o既香港良心，佢張身分證應該有四粒星。
o係唐英年做特首o既年代，應該主張”真人治港”。作為納稅人，我一直認為，最浪費公帑唔係搞五區公投，係做公眾咨詢，既然咨唔咨詢結果都係咁，點解要扮民主呢? 林瑞麟就醒目喇，識得Skip o左呢o的多餘o既Step，不過佢個替補機制有個好大問題，就係建制派唔撈o既話有機會俾民主派替補，我真係十分擔心。其實替補機制有可能違法違憲，還掂都係違法，不如一不做二不休……不過咁樣，我唔係做”社工”，思想無咁暴力，我主張和諧，務實，理性。要堵塞補選漏洞，唔洗殺人放火o既，好簡單: 取消直選，連帶功能組別都取消埋，所有議員委任產生。
選舉本身就係浪費公帑，成日話泛民建制選票係64比，但因為功能組別，議會聲音同民意從來都係相反，政府搞咁多o野都係唔想有民主者，咁點解係都要搞埋o的浪費公帑o既假民主呢? 我已經忍泛民班仆街好耐架喇，搞咩環評司法覆核丫?大佬呀，呢個世界環境只會越來越差，理得佢破壞生態，拿拿林起好佢等我地呢一代有得用啦。再者，其實香港人都唔係好支持民主者，上年五區公投，大家只係識講浪費公帑，從來無深究個議題本身，如果當初建制派出黎選，我地呢o的反民主o既人就有機會投票俾建制派踢走o個五條仆街，佢地淆底無計喎。又或者如果我話，五區公投可以零公帑做到，香港人反响又會唔會咁大呢? 講到底，大家未必係老實，但肯定現實，愛錢不愛民主………Come on，做人唔好咁假，係咪係o羅。
本人極度期待唐英年治港o既黃金盛世，正所謂”信佢，你將來都會有”。我地將要面對新一輪o既價值觀衝擊，一個唔駛帶假面具o既新香港，一個你爭我奪o既香港，一個理順分化o既香港，遊行應該跟發叔而唔係民陣o既香港。唐英年，我愛你!!!
以下為小弟於talkonly談及對關愛基金看法的文字版，有聽節目的話唔需要覺得似曾相識，因為的確係搬字過字。
前陣子在Now時事全方位聽過黃慧麟談及現時政府其中一個問題十分到Point – 政府每事用”基金”形式打發議員，以為可以解決問題。最後令資源錯配更嚴重，撥款方式變得更複雜。關愛基金絕對是政府”問題基金”的典範。
用基金形式處理問題在政府角度好處是，在無須提高經常性開支前題下”做多o左o野”之餘亦唔會有手尾跟，因為所有基金都是”一次性撥款”。亦因為”一次性撥款”，面對朝令夕改的特區政府，低下階層可謂毫無保障。對於這個看守政府，好聽點是無遠景，無承擔，難聽點是無品，無恥，無賴。關愛基金聲稱目的是禰補現行社會保障的不足，那麼現時社會保障制度是誰制定? 特區政府。那關愛基金是誰搞出來? 同樣是特區政府。如果特區政府真的知道自己有甚麼不足，又何需關愛基金? 如果不知道，難道大家覺得關愛基金可以解決到問題嗎? 一個唔知自己有甚麼問題的政府打算解決自己的問題，最後結果就是出了一個給低收入家庭學童資助遊學的畸胎。這個庫房水浸的看守政府還要正面同NGO爭飯食，向大企業籌旗，有用腦就知道關愛基金的籌旗如果真的理想其他NGO沒可能不受任何影響，另一方面企業變相被加徵稅收。只能說，特區政府最叻有兩樣:做分化市民和兩邊不討好的事。如果有心逐步解決問題，應該透過常規機制處理，而並非以一次性撥款。
PS: 馬後砲都要講句: 關愛基金出台時我已經話基金呢條橋係唔Work，而比我更馬後砲o既包括一班議員同田北俊，唔到Last Minute知道籌旗唔夠數都唔出黎鬧，顯然成班友仔根本無乜立場，純粹係諗住借力打力有水抽水，咁不如我都去做議員啦! 反而陳啟宗Day1已經出黎講明關愛基金唔Make Sense小弟十分欣賞，真小人永遠都係好過偽君子。
早於兩年前我已經推介身邊朋友看”窮富翁大作戰”，節目雖未能完全道出貧窮人口實際現況，但尚算是令觀眾認識了香港的另一面。剛剛香港電台推出了新一輯”窮富翁大作戰”，由於節目從亞視搬回無記播出，因此比上一輯多了人談及。
大概介紹一下，”窮富翁大作戰”是一個真人騷型式節目，找來政商界名人體驗低技術工種以至低收入家庭生活。有不少人的觀後感是: 佢地真係好窮，好慘。而我相信更多人的觀後感是: 我一定唔可以變到好似佢地咁撚慘。而我覺得新一輯”窮富翁大作戰”頭兩位嘉賓田北辰及周國豐都給予觀眾極度錯誤的訊息: 呢o的低技術工種唔係人做，o個o的板間房唔係人住！敢問一句：唔係人做，唔通鬼做？唔係人住，唔通鬼住？社會欠他們的是一份尊重。
正如我在對上的Blog說過，社會是不可能沒有窮人的，他們口中沒有希望的低技術工種亦不可能沒人做。錢，人人都貪，不過我認識的香港人並非貪得無厭。政府定立最低工資，目的是保障低技術工人收入，而有一定數量的有關工種之所以薪金卑微是因為外判，而外判正正是當年政府帶頭做起的。在回歸前，像清潔工這類份外需要勞力跟嫌惡的工作，工資甚至會比一些文職還要高以示對其職業之尊重。今天外判工人被剝削，間接是政府做成，如今政府對貧窮人口援助仍然以唧牙膏方式批出，政府剝削市民就可以，我們要多一點就說是福利主義，這是甚麼怪道理？政府的無責任要確保每個香港人都可以致富，但絕對有責任要確保每個香港人都可以過有尊嚴的生活。對低收入家庭來說，街市每斤菜平一蚊，從板間房搬到公屋，生活已經可以改善不少，為何連這樣基本都做不到？
剛剛財爺公佈了最新一份財政預算案，一如以往的copy & paste，一如以往的得罪網民，但更重要的是得罪煙民(我深信加煙稅比全面禁煙更令煙民憤怒)，形成民怨導火線。我嘗試以point form說說我的看法。
- 我個人並不贊成派錢，這是十分消極的做法，如果每事都靠派錢解決，那又何需政府做資源分配？如果要比較的話，將HK$6,000存入MPF戶口”相對”的確比較好。但實情是”相對”入MPF實在有太多更好的做法，像網民說為何不用那筆以百億計的錢回購隧道解決長年過海塞車問題，反而增加汽車首次登記這些無關痛癢的稅項？再者為何政府派糖給市民往往都要給銀行基金這些利益集團過水濕腳？MPF如是，iBond亦如是。一來iBond發行量有限，如果每人最後只能買入一兩手(一萬一手)意義不大，二來這些低下階層涉足不到的東西只是加劇分化貧富差距。今天的記者會，根本財爺連自己都不能說服為何有這樣安排，你叫市民怎樣服？
- 稅基挾窄形成的是一個惡性循環，為保稅收政府政策全向地產金融傾斜，最後每個香港人都是直接或間接為地產商打工，打工仔薪金其實沒甚麼提升過，這樣前題下要擴闊稅基十分困難，尤其低收入家庭生活經已十分拮据。我認為擴闊稅基是解決香港這個死局的第一步，而大前提是先令低收入工種薪金上調。政府應該重開市政兩局，一為理順政治楷梯，減少空降兵，二為接管低技術外判工種，這個問題應該趁財政許可由政府這個始作佣者自行承擔。
- 現時行政機關無須向市民負責，所以與民意代表永遠都在對立局面，做成一些重要政策難以推行。就像早年的GST銷售稅只聞樓梯響，當然GST只是一個例子，但實情是說到加稅，民建聯都無情講。不過相反地，如果政策不太重要的話，建制派可以口類說反對，投票說支持，那政府的政策又何需貼近民意呢？
- 說到擴闊稅基，近期經常有人說要收奶粉離境稅，我們不能佔了便宜又賣乖，自遊行來香港帶動消費，好賣到香港人都買不到的就不賣，道理上比較難講通。比較合理的應該從貨源以至內地奶粉品質著手(事實上上星期已經爆出原來內地奶粉真的有問題，自遊行應該一早收到風，真佩服強國置(他人)生死於度外，勇敢中國人的精神啊)。不過另外一種稅我認為是可以開徵的 – 毒品稅。在煙仔終於貴過K仔的情況下，不難預計到將會有更多年青人成功戒煙並且轉投索K。我建議政府用一貫”取締唔到就規範”的做法，將K仔規範化，如果K稅定得高，應該可以鼓勵年青人轉回吃較健康的煙仔，同是亦不失為一個擴闊稅基的好機會，可謂一舉兩得。
有人話香港這個法治之區已經變得人治，請恕我未敢苟同，因為”人”是不可能做出這份預算案出來的。今日財政預算案一出，網上看到的民怨是史無前例的，政府有錢等如市民有錢，一個正常人類是難以說出這樣的話。如果財爺是正常人類的話，就算預算案未公佈他應該大概都預計到市民知悉後會何等憤怒，為何仍要公佈呢？我只想到兩個可能性：1) 他是曲線製造民怨，凝聚社會共識，推動政策改革。2) 玩謝香港，配合環珠灣區規劃及一國一制之來臨。
有位一樓一性工作者，平日已經受盡嫖客欺凌，不是虐打就是不戴套。今天那位嫖客兩樣都做齊，而且食”霸王餐”，如果你是那位性工作者你會怎樣做？多一事不如少一事？還是堅持自己僅有的尊嚴，挺身而出？香港人所面對的困境，不是沙士，不是金融海嘯，是一個市民沒有話語權的政府，這才是真真正正的”困境”。
無論如何，祝願各位自求多福吧。
(Thanks 潮童H for those photos)
近期網上熱話終於由Youtube”真真正正”回歸電視，事關Now TV搞o左個新節目”撳錢”，觀眾安在家中答中八條問題就可以瓜分高達十萬獎金。我話”真真正正”回歸電視係因為以往無記熱門電視劇唔少人最後都係上mytv睇返，但”撳錢”就唔同，唔單止一定要睇直播，仲要廣告汁都要撈埋免得miss o左下一條問題，所以話Now TV今次真係算到盡一盡。不過我最有興趣o既並唔係幾萬個觀眾答晒八條問題最終有幾多人瓜分獎金，而係過o左二十號試睇仲凈返幾多人肯每個月俾HK$55睇呢個101台？
為o左”撳錢”，唔少朋友到捕定o係部電視機面前，準備埋notebook上住Google搵答案。其實”撳錢”問o既問題有唔少都幾本地化，不過本地化又唔代表容易，唔好話我呢o的八十後，我阿媽甚至連鄭寶鴻都未必識答。好似上星期有集最後一條問：邊個令本地公廁有廁紙用？衛奕信，彭定康，董建華，曾蔭權，四個揀一個。斷估都係衛奕信彭定康求其一個啦，點諗到咁鬼有建樹o個個原來係想當年我地最憎o既董建華丫？所以話，好多平時我地成日見，成日講o既o野，其實未必有我地想像中咁熟識甚至根本唔係o個一回事。好似我地成日話香港係”法治之區”，究竟”法治”係咩黎？
我相信唔少朋友o既理解係”法律管治”，其實呢個係”美麗的誤會”。如果話法治講o既係”公了”，咁依家o既香港應該係”私了”比較多。法治社會應該唔會有一場毆鬥後報晒警第二日收o左人十二萬同大家講係一場誤會然後不了了之，法治社會應該唔會係有路權問題然後有人同你講有個唔願開名”善長”買起o左條路，依家搞掂晒。最妙o既係應該involve但無involve 過o既政府高官竟然失驚無神遞o左隻手指公出黎”讚好”。呢兩件事話俾我地聽兩件事：1) 政客不可信，地主才可信。2) 套用呢個”善長”理論，我認為ICAC應該同公益金合併，因為呢個世界無賄款，只有善款，而強國應該可以稱之為慈善大國，因為裡面有唔少充滿善心o既善長人翁。咁既然”法治之區”唔係咁解，又係點解呢？
“法治之區”其實係講緊”佐敦區”，因為文苑街有間十分有名o既”添記法式三文治 “。
有時食物o既配搭未必一定要花巧，簡簡單單都一樣可以有意相不到o既效果。香港o既茶餐廳就發明o左一個既簡單又永恆o既經典 – 早餐A：牛油餐包，西煎雙蛋。火腿通粉(撳錢不妨問下火腿通粉係邊個發明，我實在好有興趣知)。法治同樣有異曲同工之妙，簡單一舊麵飽，配搭幾樣食材就成為一份美味o既法治，當然呢度o既法治出晒名係因為老闆落足真材實料，每份法治都有扎肉，五香腩肉，咸豬手同嚼肉。除o左有唔少名人時有光顧，連狗都成日幫襯架。話說有位女仕時不時就會帶佢隻狗落街散步，隻狗每次行過間鋪聞到香噴噴o既法治就會停低係咁吠，主人點拖佢都唔肯走，呢個時候老闆就會丟一塊肉俾佢食。隔離對情侶話：連狗都識欣賞法治喎!! 呢個講法極其量只係岩一半，我唔識聽狗話，唔能夠否定隻狗真係識欣賞法治，但可以肯定o既係，佢只係食緊一塊肉，並唔係法治。法治o既奧妙係一啖過餸連飽咁樣食，所以佢食o既並唔係真真正正o既法治。
9up完一輪，同大家分享一個故仔。 幾年前，我同IFG走o左去青衣城地下間扒王之王食lunch。IFG掃o左一輪本Menu問Waiter：乜o野係法式雜扒？係咪有o的芝士再加o的XYZ汁落去。個侍應俾o左個不能更好o既答案佢：法式雜扒都係名黎o者，總之係雜扒啦。其實食o野最緊要係好食同埋係咪真材實料者，名o既o野其實真係唔係咁重要，俾你得個名有__用呀？潮語有云，認真就輸鳥。
有聽開talkonly的朋友都知道我們有一個非常奇怪的傳統，就是新年講白事。無錯，是死人冧樓那個”白事”。正所謂百無禁忌，小弟今年新正頭想跟各位作個分享，是有關新年兩大忌 – 窮與死。
小時候聽過一條IQ題是這樣的：阿媽落街買餸叫小明睇實門口唔好出去公園玩，最後小明去o左公園，點解？答案是：因為小明孭埋度門落公園玩，現實中前幾天我就親眼看過有人背著一整度門搬落街，那個不是小明，是裝修師父。
話說幾星期前公司度門夾板爆開，門也閂不了，前幾天裝修師父車來一度全新的木門一換一。起初以為將舊門丟到地下就可以，實情是要丟到就近的垃圾站，我叫裝修師父落樓直穿對面那座大廈就會見到垃圾站。隔了三四個字我跟同事落了正正對面那座大廈吃午飯，看到他的工具還在公司門口應該還未回來，我打算出去垃圾站回程路上找找給他”貼士”，那是才發現他還未行到那處，原來背著那度門是不可以穿過那座甲級寫字樓，他兜了一大個圈才到垃圾站。我不禁一問，為何有人會那麼苦？又為何我們可以在Office開著Facebook hea等年三十晚收爐？均富又是否可以解決”問題”？
首先可以肯定，均富是解決不了問題，如果均富可以解決問題，那共產黨就不是今天的共產黨，而共產問題亦不在於共產本身，乃在於人。客觀現實是，”讓一部分人先富起來”是可行，但”讓所有人民都富起來”是不可能的，這是一個簡單邏緝：沒有窮人那來有錢人？如果只要努力就可以脫貧，那人人努力向上像小時”我的志願”說做律師醫生，那來有人在街市劏雞賣菜？只要社會結構沒有改變，仍然會有上中下階層，仍然會有有錢人，仍然會有窮人，問題是快樂指數不應以金錢衡量。
就算未玩過鬥獸棋的朋友應該都知道其遊戲規則，就是大吃小，不過最小的鼠卻可以吃最大的象。近期社會多了名詞 – 地產霸權。其實做地產的不是問題，現在問題是少數地產商壟斷市場，令市場失衡，我說的失衡是失去制衡力，就像鬥獸棋缺少了鼠吃象的一步。
何鴻燊曾經講過，自己的生意就像天天在印銀紙一樣，想窮都難，實情小弟以至我深信懂得收看這個blog的朋友都未試過真真正正的窮。有看過”我的互聯網”系列的都知我並非甚麼高材生，其實我的際遇已經好過好多跟我同等學歷的人。正因為這樣，我經常都說上天給我的遠多於我應得的，有機會，有能力的話希望多幫助一些需要幫助的人。所謂幫助最多人第一時間想到的一定是捐錢，這個我也會，不過我一直都有個疑問，究竟我所捐的，最後會到誰人手上呢？我的想法是，如果自己親力親為，我就可以確保一分一毫用到那一處。其中一個構想就是早前有提及過的開餐廳 (報告一下，現時進度是零 V_V，需要多幾個月安排抽離公司跟talkonly事務)。另一個想法是，每年撥小筆錢，請各位食一餐飯，地點跟受惠機構由我定，機構不一定各位耳熟能詳的，可以是 hkjunkcall (這個網站所提供的服務實在很”直接地幫助”了不少人)，每位隨量收取捐款，其實這個做法前年talkonly已經做過一次，當時受惠機構是鮮魚行學校。一來可以跟各位新舊朋友見見面，二來亦可以向各位友好推介一些我認為值得支持的食肆，三來大家都可以食好o野，四來當然是可以幫到受惠者，一舉四得。最近一個構想就是請各位去RedMr玩一晚，Condition是每人填一張器官捐贈卡。
無論各位怕死與否，我們不時都會問自己，人究竟死後會到哪？還是煙消雲散？我當然沒有答案給各位，不過我並不相信在世間保留些甚麼可以對死後的自己有甚麼影響，因此我諗爆頭也不明白為何會有人願意花大半生積蓄，寧願節衣縮食也要去買一個給自己的”陰宅”，還是每年給家人一個拜祭”機會”？我認為對朋友，對親人的思念，無形比有形更重要，思念的”地方”可以是任何一處，個人覺得”海葬”是一個十分理想的選擇，對先人之莊重不遜於土葬，價錢亦十分經濟。假使我有一天離去，我也傾向海葬。雖然我不是耶穌，但我也希望親朋戚友們像慶祝耶穌誕生這樣記念我的離去 – 上年聖誕節我跟朋友們的節目是……唱K。
說回正題，我在Change of Mind說過我是一個毫無道德觀念的人，我認為世界是弱肉強食的，但我有一條底線，就是一個人怎樣壞也得幫同類，也就是人。寧願化成灰燼也不捐贈器官是解不通的，我明白到香港人除了炒股票，連做善事都是一蝸蜂式羊群效應，因此希望透過這個活動做點noise去呼籲更多人捐贈器官。前陣子我有徵詢過twitter朋友們的意見，友人們基本上都讚好，有人更加用”偉大”去形容我。
記得在Blog曾經講過，好幾年前，我替舊同學父親維修電腦，他給了我封大利是，在我婉拒之際他說了一句我這生都記住的話：銀紙只是一張紙來。大家可以認為他的話”很串咀”，就像何鴻燊說”想窮都難”一樣，但換個角度說，如果銀紙用於幫助人，它的確只是一張紙，無論人民幣如何升值它的價值永遠都及不上人，因為生命無價。如果用”紙”就可以幫助到需要幫助的人，有何偉大之有？況且我亦不至於要捐身家吧。
最後以上有關Red MR的建議最後遭到否決，因為有朋友(包括女友)覺得condition似”賣身”，而且這樣做最後得益者似是Red Mr多於受惠機構。其實我的想法很簡單，只要因為這個event而真的有人得以延續生命，我已經覺得是成功。不過聽到這些意見後我需要重新考慮吧。在此我要感謝各位友人們看畢我這長篇大論，亦誠邀各位給我一些相關Idea，並祝各位新一年快快樂樂，身體健康。
延伸閱讀：
器官捐贈網上登記
香港海葬服務中心
Recent Comments