To share what i see…

話說小弟上星期去日本，o係twitter提及要租電話同買電話卡，仲有開Skype做飛線，好多tweet友問o左同一個問題：乜真係慳到咩? 小弟特別為此寫o左呢篇分享希望幫到各位準備去日本自由行o既朋友。

如果大家有睇開我個blog，應該都知道我舅父一家o係日本傳道，自311地震發生後，因為我地o係香港o既屋企人好擔心佢地，所以叫佢地要多o的打返香港。隨之而來o既問題係：長途電話費好溶!! 可能你會問：IT人無理由唔識Skype掛？識唔係唔識，問題係唔係全家都識麻。所以當時諗到個方法：開一個Skype In o既日本號碼，再Skype Out去一個香港屋企，咁舅父就可以透過Skype In日本電話打到俾我地而婆婆又識聽，一來舅父免除IDD錢，另一方面Skype Out個Rate肯定化算過傳統IDD好多(其實)。點解提呢樣呢？因為去日本做飛線漫遊正正係將呢個方法倒轉黎做。

先講講背景，由於小弟Working Day聽電話(即打入)甚多，如果用一般漫遊下期月結單甚為和味。舉例說，如果漫遊打入每分鐘係HK$7，假設打入有120分鐘，費用就係HK$840。(呢個計法係用最平o個間Docomo計，如果漫遊跳o左去Softbank打入成HK$20一分鐘，因此無論各位有無打算另外租電話，去旅行前記緊留意當地漫遊收費，落機鎖定用最平o既網絡商。)如果用Skype飛線的話，費用慳唔少。

租電話方面主要方法一兩個，一個係o係香港預先租，一個係到日本機場租。香港租的話幾乎係得一間公司做 – 日通國際，大家或去有些許印象，因為本本旅遊精讀都有佢地廣告。五日租機費用HK$190，出發前一兩日上中環Office取機，返港後一日還機。好處係打Softbank同台大部份時間免費，同埋免除o係機場攪一大輪(去旅行要爭分奪秒麻)。唔好處係…岩岩講Skype飛線方法用唔到，如果無估錯係因為佢地有自己香港飛線來電服務，所以Block o左其他飛線。至於日本租機，以Softbank為例，租機費用為日費250yen(最少要用三日，當然我估你用一日俾三日錢都得o既)，以小弟去五日計，費用就係250yen x 5 + 325yen (行政費)，兌返港紙約HK$160，一來平過香港租(如果齋租iPhone SIM卡日費更平)，二來借機還機相當方便(可以o係成田借，羽田還)，三來經小弟測試肯定可以做到Skype飛線，唯一缺點係日本打日本要收成104yen一分鐘。

假設去日本五日，五日打入120分鐘，如果用傳統飛線的話，成本如下:

3HK打入漫遊 120 x HK$7.9 : HK$948

如果用Skype飛線的話，成本如下:

Skype In香港號碼(最少預繳三個月): HK$150
Skype Out日本話費 (假設打入120分鐘): 約HK$200
Softbank租電話費用: 250yen x 5(五日租金) + 325yen(行政費) = 約HK$160
合共HK$510

如果用飛線漫遊的話，成本如下:

飛線漫遊(以一電通為例): HK$2.49 x 120 = 約HK$300
Softbank租電話費用: 250yen x 5(五日租金) + 325yen(行政費) = 約HK$160
合共HK$460

總括黎講，如果聽唔太多電話，其實用Skype飛線反而會用多o左錢(飛線漫遊都係唔錯選擇，因為無月費，純粹逐分鐘計)，我個case 係因為要聽客電話，所以用呢種方法封頂，好多人漫遊完都收到震撼帳單，以往因為無日費漫遊，有關數據o既震撼帳單比較多，依家因為聽電話而衍生o既震撼帳單亦都有唔少，小弟就試過就咁漫遊買到成部ipad返黎。

講o左一大輪好似好複雜，其實最主要Step只係三個: 1) 租電話/SIM卡 ( 上Softbank Rental可以預約機場Pick Up兼預先知道手機號碼方便做飛線) 2) 上Skype.com買本地先上號碼同轉接來電到Softbank手機號碼 3) 將你本身電話飛線到你o係Skype買o既8字頭線上號碼。

Softbank會俾一個袋你，入面有齊火牛電話同借據，還o個陣一次過俾返佢就得。

借機同還機Location相當就腳，話唔定你未開始搵已經見到。

如果唔多用電話的話，其實漫遊都唔係問題，不過要留意漫遊到當地網絡商，唔同台收費可以爭好遠，以3HK為例，日本接聽電話(打入)，用Softbank每分鐘HK$20，Docomo只係HK$8。打出的話3HK有提供回撥(Homedirect)，收費平好多，各地漫遊收費詳情應該有詳列於有關網站內，3HK o係呢度。當然亦可以考慮用Skype打電話，咁就要講到點上網。

要o係日本隨街上網，選擇有兩個，日費漫遊同儲值卡，後者比較多人講係b mobile o既U300 SIM卡，一個月費用3,000yen，速度限制為300kbps，一般上Facebook Gmail查下o野係OK o既，甚至我試過放落Pocket Wifi做Share都仲得，問題在於因為得300kbps，其實只要兩個人同時上網就會開始Lag爆，所以唔介意俾多些少可以用Platinum o個張(5,280yen)，不過買得Platinum，如果你唔係去一頭半個月咁不如用返日費漫遊無咁煩。留意張SIM卡係要用日本本地手機號碼做一次Activate先用到，一係自己租電話Activate，一係搵人幫手(根據Research，成功率唔係100%，日本人好怕用自己手機幫外來人攪呢攪路)，一係打上hotline攪，但hotline星期六日同假期都無人聽，詳細方法可以睇呢度。

Q1: 點解唔直接用Skype聽要再Skype Out?
A1: 因為Skype o係3G表現其實唔多穩定，同Skype Out出返傳統電話的話爭好遠。用iPhone的話仲有可能Miss Call(話時話，用Skype飛線記緊你部電腦/iPhone/Android要Logout)。

Q2:點解你舅父唔用寬頻電話?
A2: 印象中我係有買過俾佢之後好似無續到，始終一掂到電腦o既o野，你地覺得好簡單o既o野長輩都係未必識用。如果長期使用的話其實香港寬頻2b電話同新世界Nettalk都係唔錯選擇，前者仲有埋個iPhone App俾你聽電話，不過收費差唔多係後者三倍。

TIPS1: 如果用Skype打傳統電話(即係打長途)，你可以o係Skype.com設定對方睇到自己手機號碼。
TIPS2: 香港人鍾意撚Ringtone，日本剛好相反，唔想俾人怒啤最好全程震機。
TIPS3: 除o左ringtone，日本人唔鍾意人Cut線，因為無禮貌，兼且你襟Reject o個下可能會收你聽電話費用，所以唔聽的話等佢自己Cut就好喇。
TIPS4: 日本鐵路一走入隧道九成九收唔到，你地班友仔唔好再小三仔地鐵收唔到喇。

talkonly談及社會民生或者政治體系這類議題，除了”自求多福”，說得最多是 -- 改變。

前陣子我曾經分享過我對改變的看法，主持們大多認為”相信就能改變”， 可以推倒一些事，而我就像讓子彈飛戲裡的群眾一樣，我不會參與亦不會阻止大家求變，如果求變成功我會出來一同慶賀。我唔介意各位說我見風駛舵，我只是自問自己能力有限，我亦唔介意各位覺得我低估自己能力，但我會從有限的能力去改變我認為我可以改變的一些事情，而我的求變動力有一部份是源於社會的不公。

要理解社會的不公，先要理解何為公平? 李超人可能覺得自己搵夠一早想唔做，但係依家想甩都甩唔到，唔公平。NetBugs可能覺得做老闆做到仲衰過做鴨，唔公平。大學生可能覺得NetBugs 呢o的咁o既茂利Quali差我咁多都可以做老闆，唔公平。當自己覺得公平，別人就會覺得不公平，講到底，呢個世界係唔會有公平，這是人性本質構成，無可避免的果。

而我，能夠生存到寫這篇文的一刻，其中一個原因是 -- 我已經接受社會是不公平，聽落有點消極，但總好過因為這樣而轉牛角尖吧? 明白這條Inconvenience Rule後，除了懂得向上望，開始會問自己，有沒有留意過自己下方在發生甚麼事情? 周遭有很多事情，看似一般平常，其實在影響一些人?  而這些影響並非無可避免? 以下是其中一例。

以上片段是青衣公園其中一路段，短短三分鐘已經有十三個垃圾筒，其實有沒有這樣的需要呢? 我同意垃圾筒需要方便市民，但這樣多會否有點太過呢? 會否對清潔工人構成不方便呢?

可能這樣問有點吹毛求疵，可能這樣反過來會方便了清潔工人，不過還是想各位注意一下。前陣子我到新都會廣場的廁所，洗手的時候看到當值的清潔伯伯一直伸出雙手到吹手機取暖，應該是因為廁所太凍的關係，我曾經在新都會廣場官方Fan Page問過其實廁所有沒有需要冷得似殮房呢? 無人回應。

曾經聽過一個講法，每一個有錢人背後衍生N個窮人，邏緝上是成立的，跟我曾經提出”沒有窮人那來有錢人”不謀而合。如果閣下認為社會是，或者應該要公平，而你自問有幾個臭錢，那便應該思考一下你與弱勢社群的關係，問自己可以做點甚麼，因為你也是造就弱勢社群的持份者之一員，不要以為可以將責任完全推卸到政府施政失誤。

前陣子，中央政策組首席顧問劉兆佳說過香港或已到達臨界點，而我自己同樣游走於臨界點 -- 面對社會的不公義與失望，究竟我應該選擇留守，為社會出一分力，還是離開這個我唯一的家? 這個問題我一直在思考，而因為一個人，我一直傾向選擇後者，那個人正是這幾天鬧得熱哄的梁美芬。

早於她近幾天的連番偉論前，我在上月頭及上年一月已經提及過這個人令我對社會有多失望。

(節錄)末日的話：現實

公投一役，我無期望，但係仍然失望。更叫我失望係一位民選議員 – 梁美芬。

我知道梁美芬呢個example我講過上萬次，但係都要講，尤其如果睇緊呢篇文o既係投過佢票o既選民。我化o左灰都會記得記者問佢點睇有外國領事聲援劉曉波，佢話咁樣”有可能引致當局加重對劉的刑罰”，呢句說話唔應該會o係法治社會聽到，更加唔可能出自法律學者把口，如果為人師表教學生打家劫舍，你話個社會仲有無希望？香港仲係咪一個法治社會？

(節錄)絕望與希望

在聖誕節，劉曉波因為煽動顛覆國家政權而入獄，翌日我們的立法會議員，”法律”學者梁美芬這樣說：
在內地同類案件，通常只判三至五年。她指，外國領事聲援劉曉波，有可能引致當局加重對劉的刑罰，「因為佢（中央）可能更加覺得，其實劉曉波不是劉曉波，而是好多外國勢力在背後，可能造成一些反作用，也不出奇。」(原文)
當”覺得”變成”理所當然”，香港的學者也變得人治，怎能對活在的這個地方不感到失望？

 

以前，我覺得像霍震霆那些出值率近乎零的功能組別議員最差勁，但原來那些議員比”食o野唔做o野，做o野打爛o野”的梁美芬議員已經好得多。

以法律學者身份說人治，以民選議員身份卻不知民間疾苦，還要反過來說要懲罰選民。

我們沒有時光機，選民並不可能預計來屆那個候選人做得好，因此選票從來是用作認同或懲罰現屆政府。但現在不用時光機，選民都應該知到梁美芬有多差勁。在此我要申報立場，我是泛民支持者。泛民有泛民的立場，我們支持民主政制改革，建制有建制的立場，民建聯工聯會的立場就是沒有立場，而在沒有立場那個立場方面他們非常堅定。無論各位支持泛民抑或建制，基於民主社會，就算如何不同意亦會予以尊重，但轉軚歸轉軚，總不可能將對的說成錯，錯的說成對吧?

當一件錯事有一百個，一萬個人說是對的，那件事就好有何能變成對的，要避免這樣的災難於香港發生，我們有必須要撥亂反正。然而我有參與71遊行，但我可沒有叫林瑞麟或者曾蔭權下台此等口號，原因十分簡單 -- 他們不是我們選出來，叫”下台”對我來說只是”嘥口水”，因此我只是一直叫他們”仆街”。但梁美芬可有不同，她是民選區議員，民選立法會議員，香港人有權”懲罰”這個說要懲罰選民的議員。

我並不知道梁美芬背後有甚麼政團跟宗教團體支持，但我懇請各位香港人，由年底區選開始，到下年立會選舉，好好考慮一下應該選一個怎樣的的議員代表自己，如果民建聯參一腳我甚至會支持建制選民投民建聯，可能這樣說有點反智，但我可我寧願民建聯當選也不願看見一個這樣無恥的人代表市民走入議會。同時我想告訴對選舉冷感的選民，精英時代已經過去，現在投票並非選賢能，而是選個”無咁差”的出來，出來投票吧，不要讓那張熟悉的面孔給你後悔多四年。

這不是關乎政治立場，而是在於良知，再一次懇請各位，別讓歪理成為真理。

延伸閱讀:

各界狂轟「抽水芬」被指轉軚反邀功

做人尚且知恥，況乎議員！

梁美芬惹反彈 區選勢被狙擊 迅速派單張被斥「抽水」

投棄權票 梁美芬達32次

給當日高調支持梁美芬、基督教12領袖的公開信

梁美芬惹反彈 區選勢被狙擊

我相信有10萬人不想梁美芬再當選議員

如果說，香港是本難讀的書，那七一遊行就是這本書的精讀，但政府可曾有認真翻開過這本書？

如果說，董建華最大的用處是香港人可以把所有問題怪罪於他，那今天林瑞麟可以取代他的位置嗎？

自零三年起，七月一日已經成為遊行代名詞。有趣的是，每年政府總要在七一前夕”刻意製造”一些議題好讓民怨沸騰，先不談林瑞麟那筆，警方叫遊行人仕不能使用樂器，其實即是叫人可以帶樂器吧？不是”刻意製造”是甚麼？我認為，讓七一遊行升溫，其實是給機會政府降溫。一來七一的確是一個一年一度給市民消消氣的機會，二來它亦是給建制派及政府擱置倒行逆施政策的一個下台階，三來就像我開頭說過的，遊行是香港精讀，遊行人仕有著不同的訴求，一天遊行已經取代政府平時要做N年的諮詢，問題是政府有無用心聆聽遊行人仕的訴求？管治危機與改善機會其實只差一線，政府選擇前者還是後者？

今年七一，我是抱著審慎心態估算遊行人數，然而民怨累積至一定程度，但遊行那浸”涂”其實不大，而且沒有一個一致認同的議題出來。廿二萬這個數字是預期之上，雖然難與零三年比較，但一個數以十萬計示威者的遊行絕不能小看，外國鮮有，就算有也是人口比香港多幾倍的城市，因此政府不能視若無睹，亦不能說遊行人仕是小數，同樣我們亦不會說同日千人慶回歸的是小數一樣，我們的聲音，同樣需要重視。

從零三年起，遊行趨勢是訴求越來越多之餘，近年訴求與訴求之間開始出現矛盾。例如107動力好煙民大聯盟，又或者新來港家庭爭取權益與抗議蝗虫的相關團體或人仕。感覺告訴我，一個本身訴求互有矛盾的遊行對政府其實頗為有利，因為政府可以按自己需要隨意標纖遊行人仕訴求再加以回應。而對政府來說，更幸運的是現屆政府沒有一個像董建華這樣有凝聚力的戰靶出現。不過我覺得，按照社會形勢，”戰靶”應該很大機會重臨，如果CY是下屆特首，想信他定必當人不讓。

今年遊行給我第一個訊息是 -- 天有眼，我第一次相信天。因為相比星期二某團體”so call”包圍立法會的傍沱大雨，七一絕對是天公做美。遊行人仕訴求各有不同，先撇除大路議題，有要求香港自治，有要求正視棺材房問題，有設立奶粉離境稅，有爭取同志權益，未親眼見過的話很難相信原來反對豁免基因改造木瓜都可以是示威訴求，如果政府可以解決當中一半問題，應該不會像現在那麼弱勢。

遊行人仕大致上分三類，第一類是打頭陣聲嘶力竭，即是庫斯克老師這幾天重提劉細良提出過的”卡啦OK式政治”。這類示威者嗌完激烈口號，上到政總踩一踩林公公紙板洩憤後，轉個身可以落國金Palace IFC看變型金剛，政府越來越對這類示威者視若無睹，因為政府”終於”明白兩件事: 1) 班友仔遊行完就”無o野” 2) 我o既選民得八百個，有七百萬人出黎遊行都唔關我事。第二類，亦是佔遊行大多數的，沒有激烈口號，Banner亦未必拉多條，沉默的由維園行過去政總，這類人對政府同樣十分不滿，與其說反政府，不如說他們想給政府一個”善意提醒”。第三類是近年冒出頭來的行動派，透過較激烈(至少社會普遍認為)抗爭逼令政府就犯。

七一那天我跟友人們走到接近修頓球場，遊行人士步伐開始放慢，當時我跟其他遊行人士都以為是警察不開路，有示威者向灣仔電腦城天橋上的警察高呼開路，有人更大叫”開槍”，後來才發現是”人民力量”集結了大班示威者堵塞道路令後來的示威者未能前進，當時是警方以人鏈方式區隔集結示威者我們才好不容易走過修頓球場。直至行過金鐘社民連街站，有人嗌咪說警方在修頓封路令示威者未能前進，有示威者當場糾正嗌咪那個人，告訴他是人民力量在堵塞道路，並非警方封路，及後嗌咪者聲稱消息來源是人民力量，要糾正就找人民力量糾正。以上都是本人的親身所聞。

首先，我不肯定”人民力量”是否因為警方曾經封路而決定集結，但可以肯定在我之後的示威者都因為人民力量而”受阻”，錯誤訊息對警方實是有欠公允，這樣的話我們跟”警長是及示威者害死”的人有甚麼分別? 我個人立場一直是，遊行人士沒有必要跟”所有”警察形成對立面，眼見網上有不少網民以”警犬”形容警察，其實他們也得維持基本秩序，可能有部份會對示威者不禮貌，但我相信大部份警察都希望遊行能夠順利進行。眾所週知港島交通就算沒有遊行都會嚴重滯塞，要協調兩者並非易事。

至於人民力量，當我行過修頓球場再回望轉頭，只能說他們的確很有橋。我得承認，由社民連到人民力量，我曾經覺得毓民是在分裂泛民，對香港民主進程有負面影響。現在回看，我是錯的，政府跟人民力量這類團體其實是相輔相成，不是政府的視若無睹就不會有這樣的激烈抗爭，正如八卦雜誌一樣，有這樣的讀者就有這樣的雜誌，同樣地，有這樣不堪政府就有這樣的政團。這令我想起”武狀元蘇乞兒”，電影結尾皇帝說丐幫弟子幾千萬，一天不解散，叫他怎能安心。周星馳說: 丐幫有幾多弟子唔係由我決定，係由你決定。如果你真係英明神武，令到國泰民安，搵鬼得閒做乞兒咩?

原則上人民力量所作所為我是理解的，不過我認為，群眾運動要取得成功，當然不一定要七百萬人都上街，但大前題是需要一定的民意支持。有參與五區公投的選民意願固然值得尊重，我也是其中一員，但投票率毫無疑問反映變相公投是失敗的。開講有話: 失敗乃成功之母，一直拿投票人數出來耀武揚威而不知失敗為何物，又何以取得成功呢? 我支持人民力量繼續以擦邊球方式作實質抗爭，但在動員以外亦多請convince一下普羅大眾，例如香港人眼中只有錢，可以嘗試從這個方向作困綁，畢竟民主公義從來都是為建設更好的社會而生，包括更好經濟。

下午三點半，走入維園這個蒸籠，蒸了兩個小時才開始出發。坦白說，我跟朋友們有好幾個路段都是行旁邊行人路(算是走捷徑吧？)，由天光行到天黑，最後我們都用了足足五個小時才完成整個遊行。我想說的是，各位可以不認同遊行這種手段，但不能不予以尊重。

遊行人仕其實可以在這個公眾假期睇戲，唱K，甚至在家中睡一整天，無必要在烈日之下行幾小時，為甚麼要這樣辛苦自己？

梁振英說譴責激烈示威，那為何會有激烈示威存在?

這一切都源於不公義制度，民主社會可能一樣有替補機制，但他們有公投法。現有議會往往未能反映選民意願，政府往往不到絕境，不聽民意。我們經常說上一代給了我們這一代一個爛攤子，但我們這一代又打算給下一代一個怎樣的香港?

遊行走到末段，差不多到匯豐總行，一整條行車線都是粉筆子，有訴求，有不滿，這個畫面對我震撼至極，那時是晚上八時，曾蔭權當時安坐在伊館欣賞慶回歸十四周年音樂會，而遊行未完政府已經做行貨回應，他們是否真的清楚粉筆紙訴求的一字一句?  看到這樣不滯的政府，我不時都渴望，主可以給我一個答案，因為那些我們痛恨的高官以至建制派議員都是教徒來的。

神可能會寬恕一個每天都去懺誨的賊，但我不會，因為我是人。

延伸閱讀:

Quoted from Kursk: 懇請大家就算不支持, 也請嘗試去諒解承受風險進行抗爭的朋友們。他們不是為了攪亂社會, 而是為了迫使無賴的政府對話。若果他們成功了, 好處是所有坐在家中的人也享受得到的。

點解香港會變成咁

其實要convince香港人好簡單，因為我地都係睇表面做人，餐廳門面企企理理我地就”假設”你係衛生架啦，廚房污糟有老鼠唔緊要，你唔好俾我食緊o野o個陣見到就得喇。不幸地，今日真係俾我見到老鼠。

話說小弟上年睇過Mr紅館演唱會，由於唔係特別鍾意，買o左最平飛，坐最後一行。無可否認上年演唱會氣氛一流，不過可能因為坐得太後，其實上年我同朋友們成場演唱會凈係聽到迴音，純粹靠Melody估歌詞，話就話係平飛，不過從來無人同我講過買平飛會聽唔到歌，But fine，一分錢一分貨，我無火滾。撇除人地坐時光機抄佢地歌，我覺得佢地真係有感染力，我Buy，所以今年買貴一級，坐22行，未睇前覺得個位都OK，演唱會一開始就瀨o野了。

以前我以為舞台勁唔勁係睇開幾多場，因為場數越多舞台budget就越多。Mr完全推倒我呢個諗法，原來只要有大Label贊助，開兩場都可以喪爆煙花，今次舞台效果我用浮誇形容絕不為過，但係演唱會最基本o既都做唔得好，做任何事幾好都係徒然，我講緊係聲音。

上年聽太細聲，今年聽大聲到真係耳聾，耳膜有痛楚感覺，我有大半場演唱會都係”黯”住耳聽，對我黎講簡直係嘈音Level，我聽兩晚五月天都無咁誇張。紅館坐位分價錢從來都係講緊同舞台距離之分，主辦單位有責任應該ensure所有觀眾都可以正常聽到欣賞到表演者演出，呢方面今次真係極差。

除o左音響，有樣更過份係，對正中央o既主控台，即係廿行左右位置。平時會有張演唱會大Poster貼o係度，今次o係張大Poster上面裝o左塊LED板專出字幕俾Mr當貓紙駛。呢塊LED板唔止出歌詞，仲Informative到出埋下一首唱咩歌，Mr各成員要講咩。換句話說，Mr未唱未講，觀眾只要望望塊板就會知道佢地將會唱咩同講咩，連”多謝Fans”都打埋出黎，駛唔駛呀？

小弟雖然無H網友一個星期睇幾次演唱會咁誇張，但總算係睇得密o個批。之但係我從來無見過咁大塊貓紙板，要打入健力士問題不大。

貓紙，甚至咪嘴，大把人做，我亦唔係針對Mr，問題係，你唔好俾我知麻，仲要揚到三面觀眾有兩面都可以望到塊咁很大o既LED板，情況就好似David Copperfield一邊表演魔術一邊俾你睇到個魔術係點做出黎咁。

今天是Mr最後一場演場會，也是我最後一次看Mr演唱會。