一直以來我都覺得政府”有o的問題”，但係要我講我又唔知點形容。直到特首提出六大產業(黃毓民稱六大陷家產業 / 施永青稱六大渺茫產業)，我終於知到政府問題係咩 – 不務正業，政府比市民行前一步提新政策不為過，但新政策之前竟然可以無視社會既有問題我就覺得有點兒那個。
政府並非一間公司，唔可以學某些學者或者”骷髏會“講一句”貧富懸殊係解決唔到”輕輕帶過。小弟趁是晚失眠，就當我是但UP求其寫，寫下如果我是當奴既話我會做o的咩。(以下內容純粹老吹，睇故唔好駁故)
- 政府應該重新擬定包括內地單程證來港在內之移民法例，所謂優才輸入講穿左只係申請一本特區護照，但點講都好佢地都係要講”資格”。無論優才定唔係優才，移民到香港都應該有需要有一套更嚴格既審批制度，否則在可見將來會有更多社會問題出現。
- 基於地少人多的獨特地理環境，政府應該在下一次樓市泡沫爆破前諗清楚一個問題：買樓是不是應該是一項投資?係既話可以繼續話之佢，但係一定要加強公屋同居屋規劃。唔係既話對於泡沫後升浪就唔能夠過急。
- 政府應該簽定法例禁止再於維港填海，避免填填下變左條河。如果話因為交通濟塞所以就要填海其實唔太講得通，因為以中環灣仔為中心既港島商業區其實一路擴展緊，今次俾你填海搞繞道，咁下次呢？我覺得政府應該帶頭將政府部門逐步北移到新界區，例如天水圍。其實我覺得之前蔡瀾話o係天水圍搞大笪地絕對係有得做，甚或與其食環署要車仔檔走鬼，不與規範佢地確保車仔檔安全性。搞大笪地再加比以前添馬艦規模更大既嘉年華式主題公園，呢o的咪就係”活化”o羅。
有時講真係天下無敵，就當我係發開口夢啦 ZZZzzz
今日晏晝落Taste買麵包，我前面得兩個師奶等緊俾錢，當Cashier o都到一盒HK$20蚊蛋糕既時候………
師奶A：都係唔要喇
Cashier：好……呢件唔要…..
師奶B：點解唔要呀？
師奶A：咁貴……
師奶B：試下丫麻
師奶A：咁買啦，我要返呢件……..
點解呢對師奶買野之前唔睇下價錢呢? 有時o係便利店或者超市買野真係幾複雜…….先生有無自備購物袋呀？多謝支持環保!!先生買唔買利賓納橡皮糖今日特價？先生有無易賞錢卡？先生Look卡定o都卡呀？先生用唔用Enjoy Dollar呀？分分鐘佢問你既問題多過你買緊既野。難怪師奶活躍股壇，今日你開市時間，買和黃股票要用既時間一定比落百佳買野短得多。大家都要”排隊”，不過一般都唔駛等好耐，唔會有人問你有無自備購物袋，唔會有人問你：先生有無興趣買埋1097，岩岩落左好多喎!! 唔會問你點俾錢，銀行懶安全，限制特別多，唯獨炒股戶口，有心跳既人都開到…….講左咁多廢話，唔知o的超市可唔可以簡化下Cashier o的台詞？既然多謝支持環保唔係真心，出位價既野又唔係咁出位，不如唔好講啦，我地受夠喇!!
尋日報紙有單新聞，有位中年漢因為不滿收費電視欺騙手法推銷兼中招，前日去左自殺。好多人當呢單新聞係笑話咁睇：乜咁都得？使唔使自殺呀？小弟覺得呢o的新聞一o的都唔好笑，收費電視只係導火線(但亦難詞其咎)，真正原因可能係生活壓力，當人由支配情緒變成被情緒支配，任何事都會變得不理智。我可以o係度大大聲話係生活壓力既錯， 但係可以點解決？我真係唔識教人，只能說這些是香港社會這個壓力煲下犧牲品。
大約兩年前，小弟公司部份網絡轉用左H公司，本來都無咩事…..應該係話，一般唔爆鑊既我唔搵佢佢唔搵我其實無咩問題，最怕係出事，點知真係出事。
上年新年o個陣，Network俾人炸鑊勁，一般情況下Datacenter係可以鎖定來源或目標IP進行封鎖，半小時內定必Settle到個問題，最Worst Case都係鎖俾人炸既IP而唔係成個Network。當時係零晨四點幾，我打去所謂24×7既Hotline，好快就有人聽電話，不過原來佢係人肉留言信箱，有問題要等到Office Hour覆，天呀，咁要24×7黎做乜？我記得最後係十一點幾先恢復正常(其實之後有一日因為佢系統搞錯停左我戶口，詳細唔講喇)。
後來我同客交代左係因為H公司問題所以停左幾個鐘，可能因為有客Post左個Notice上H公司論壇，H公司有Staff打黎搵我，我當初仲以為係想關心我Network點解會搞成咁，原來係話因為”上面”覺得Notice咁寫有問題，要告我。我真係食唔安訓唔落左好幾日，o個陣有一晚，Ex阿媽生日，我上左去佢屋企慶祝，見到伯友當然係笑面迎人，但內心其實已經崩潰了大半，我唔敢同阿媽講，又唔敢同Ex講。到第二日，佢地再打黎話要我改左篇Notice，我提出左一個好簡單既條件：可不可以承諾提供好的服務給我們？沒想到她拒絕了這樣的條件，但最後我們還是按照她的要求改左Notice。那天我真的完全崩潰，因為我完完全全違反了自己的原則，我唔敢講我無錯，不過我真的想像不到佢可以連”提供好的服務”都承諾唔到。這陣子心情很低落，我嘗試叫自己想一些開心的事情，最後哭了出來，因為真的想不出，可悲的是我真係有諗過去尋死，可喜的是我怕死……..所以我選擇睇醫生……
我因為呢件事在H公司老闆Blog留左個Message，我好詳細地告御狀，將整件事經過一一道出，最後他真的有回覆我：
”你所提及的問題我絕對不希望發生，而且，不論是大公司還是小公司，都是我們的重要客戶；客戶服務，應該一視同仁！希望閣下的問題得到解決，非常抱歉。”
我唔敢講佢有無幫到我，不過我的確可以提早解約。這篇Blog目的唔係要彈呢間公司怎樣怎樣，到現在為止我屋企同公司寬頻同電話都係用佢。小弟只係覺得香港真係好似有個壓力煲，每一個人都有爆炸的可能，沒有根治的辦法。可以的話，朋友們對任何人都盡量嘗試將心比己吧，雖然將心比己大部份時間吃力不討好，人們都會先看重自己利益，但我深信愈來愈多人有這樣的心態壓力煲才能得以舒緩。
經過NNN咁多年，人類不斷發展，我地由爬進化到行，再進化到以交通工具代步，究竟再進化的話應該進化o的乜好呢？
我認為人類個Pat Pat可以考慮好似汽車咁加兩盞尾燈，你地都知啦，香港地少人多，行o的細些少o既商場都經常出現水洩不通o既情況，而水洩不通通常係因為有o的人行行下停o左o係路中心望下旁邊舖頭有乜野賣，如果人類進化到Pat Pat有兩盞尾燈，當佢地停低o個陣Pat Pat就打雙燈，我地就可以醒水避開佢再繼續行。又例如商場或者港鐵電梯上落位，唔知點解好多人鍾意企正o係度，如果佢地停Pat Pat 打雙燈，我地就唔使估估下佢地係咪搭電梯繞過佢地行。
話說小弟早前睇到東張西望報導新城將會搞Eason演唱會，演唱會仲有Mr. 同Swing，而演唱會Poster中提及o既SAME WRONG SIN就係由EASON, MR, SWING既英文字母組合出黎，作為消費者o既我合理期望當然係有EASON, MR, SWING三個表演單位o既Cross Over(即類似拉闊)。最終結果係：原來呢個陳奕迅新歌發佈會 (除左臨尾三首舊歌同唱o左幾首別人的歌)，唔緊要喇…..SWING同MR每邊叫做各唱左三首歌(其實大部份都係同EASON合唱)，我覺得點講SWING同MR只係EASON演唱會既表演嘉賓，如果係既點解會有SAME WRONG SIN呢個Concert Title？原本我覺得都算，但係再諗一諗，SWING同MR呢兩位Concert Title有出名既單位佢地無乜點Solo，但點解Concert Title完全無提及過既啤梨可以Solo唱三首歌(加埋香蕉俱樂部係四首)？我尊重表演單位，尊重演唱會，就算比一般演唱會早一個鐘(門票寫晚上七點半)我都唔介意捱肚餓捱胃痛準時入場，到頭來原來演唱會係八點半先開始……之前係不斷Loop廣告同聽啤梨香蕉唱歌(東亞廣告不斷Loop o既時候場內已經Hur聲不斷)，成個Campaign對觀眾可謂零尊重。
作為觀眾，我對Mr. Swing表示十分同情，竟然Concert Title有份但係Solo時間比所謂暖場既表演單位更少。而作為消費者，我對今次贊助商印像十分負面。廣告商跟商業機構應該引以為鑑，廣告並唔係播得越多，成效越大。
最後一句：豬扒減肥只係瘦o左既豬扒，新城點搞都係新城。
Recent Comments