要數葵芳人氣食店第一時間一定諗起以往talkonly宵夜指定飯堂 – 金潮小廚，不過現在已經甚少去。一來talkonly越做越夜，二來平日去實再太多人，三來佢個所謂訂檯其實都係焗你要排隊，同屋企老人家去食未免唔太方便。仲有一個更重要原因，水準真係跌o左，尤其繁忙時間”煲類”菜式可能過急起鑊，唔多入味。本身已經無乜服務可言，現時水準唔多值得去排隊捧場。近期友人們”發現”了葵芳一家老店”奇香雞“，位置正正在剛提及的金潮附近。
燒鵝 – 小弟其實唔太好燒鵝，因為太肥。尤其個個讚好o既裕記，多食一舊都唔太敢。但係奇香雞o既燒鵝我又覺得剛剛好喎，加上係即燒當然無得彈啦!據佢地講星期一至四由於客唔多所以唔會有燒鵝，閒日要食(其實假期都係)建議各位最好打電話訂定先。
香芒素魚 – 用芋頭做o既素魚大家食得多，有芒果餡o既我真係未食過，呢個match效果唔錯。
杏汁豬肺湯 – 代表作，足料老火湯，必點!!
龍鬚帶子
除o左以上四款菜式，另外奇香雞同椒鹽鴨下巴 都係值得一試。整體而言，我同友人們都一致認為呢間店絕對係超水準，價錢仲十分相宜，就係唔明點解生意好似唔太好。以開飯食評o既”零喊樣”記錄按道理應該唔會咁慘情，可能係因為開飯錯誤將奇香雞放o係葵涌區而唔係葵芳區有關，所有開飯食客好少留意到有呢間野存在。
上星期同屋企人再光顧奇香雞，阿媽一行入去侍應即話：呀~~~彭生訂位麻。阿媽起初以為個侍應醒目成咁，食到最尾先發現，唔計一早坐低o個檯原來成晚都係得我地一檯客。我經常都話，o個o的板前板後日日都排長龍又唔係特別好食，無理由呢o的咁有水準o既食店會落得如此下場。下個月9號 (9/10)星期六晚小弟會同友人們再去奇香雞，如果各位有興趣一齊去食的話請facebook/twitter聯絡我或者電郵至netbugs AT gmail DOT com。
我經常說去食店是一種體驗，吃只是體驗的其中一部份，我愛觀察食店周邊，包括環境，亦包括店員和食客，通常去到一些未去過的食店都會觀察周圍研究他們是”怎樣做”的？是成功還是失敗？失敗例子有綠寶石餐廳(現址為旺角友誠地庫的美心快餐)，明明在港鐵站出口旁邊，佔盡地利，卻生意淡薄，名符其實的旺中帶死。成功例子有明將，這樣的劣食奇葩，仍然受不少食客追捧，當中除了有部份死士，其餘大部份都是普通食客，幫襯原因跟該區人口結構或多或少有點關係，他們口中的美食，我們眼中的劣食，能夠坐在那處感受這份強烈對比或多或少能令各位學會多點珍惜吧？
今時今日品牌形象十分重要，而建立品牌形象的其中一個重要元素是特許以至連鎖經營。上星期經過登打士街，見到台式飲品”真珠”賣緊十幾蚊仲要買一送一仍然銷情冷淡，相反貢茶企硬HK$12杯仍然大排長龍。珍珠奶茶其實不是甚麼專利發明，其實間間味道差唔多，貢茶唔會特別好飲，真珠唔會特別難飲，只係貢茶成功另消費者覺得飲貢茶比較有Taste，情況其實有點似Starbucks。
說到連鎖食店，我以前是許記甜品的常客，因為我是芒果怪，但近年唔知是我不幸還是他們不幸，次次吃到的都是酸芒果，好像專挑的，之後好一排都沒有幫襯過，近排比較多吃發記。不過我亦不忘試試其他非連鎖甜品店以發掘新款式。以下兩家店是我近期頗欣賞的。
土屋位於女人街近廣華那邊，是上文提及過旺中帶死的那一類，每次去之前都擔心會結業。當初欣賞他們是因為其木糠布丁，有水準之餘亦有份量。上星期再幫襯他們的綿綿冰跟Apple Crumble亦是不錯的選擇，尤其Apple Crumble，對我這類不愛東尼黃那種喪甜的人來說甜度剛剛好，只是3.6奶凍比較遜色(跟小甜谷差太遠)。
認識甜品莊是因為有天乘地鐵回家看到的一個易拉架，話雖同在青衣，但那家店跟我家有一大段距離，很少機會經過。我看了Openrice的食評，看到食評不多，但個個讚不絕口，更有人說是酒店級，感覺有點打手成份，因此我決意去探過究竟。
那個特濃朱古力蛋糕味道以至口感跟Royce的朱古力很相似，但價錢只是廿多元。
甜品莊的好評所言非虛，如果款式更多，老闆有東尼黃咁靚仔，生意應該更上一層樓，可以五天工作週。
上星期跟朋友們吃完晚飯到土屋吃甜品兼吹水，坐到有點不願離開，因為冷氣太舒服，不太冷不太熱的，然後大家在研究為何土屋甜品質素跟生意不成對比，我們得出結論是，可能因為他們沒有深水土步甜品名店殮房般的冷氣，可能食物沒有”食神”所說的求其：
張檯有咁窄得咁窄，張凳有咁迫得咁迫米等D友坐得咁舒服，
食完拿拿聲好走，支飲管有咁粗得咁粗，冰有咁大舊放咁大舊，杯汽水咪
chur一聲飲完買過第二杯囉。你係咪新黎架呢D野要我教，你唔好一尾得
個up做啦仆街！
離開時經過西洋菜街，看到許記甜品繼續大排長龍，有點戥土屋不值…….
平時想搵地方食飯，第一件事梗係上Openrice，然後揀區再按”哈哈笑”排序再慢慢揀。今日女友教多我一樣野，仲要睇埋有咩人寫，如果寫o個個人寫得一篇o既話打手成份十分高，換句話說，多哈哈笑同好食其實未必掛勾。Anyway，女友用o左剛剛o既Formula搵o左呢間文華雞飯。
其實呢間野無咩好講，因為真係主要就係食海南雞飯同燒雞飯兩樣(雞肉除非特別request否則都係去骨)，同埋真係好好食，必試，應該好快要排長龍!!!食評講完，係時候講重點 – 點去？
文華雞飯
電話： 2301 4266
地址： 尖沙咀柯士甸路15A柯士甸大廈D舖
檢視較大的地圖
雖然o係尖沙咀, 但係o個位隱敝到無倫，如果渣住部iPhone開住Google Maps(好似我咁 一,一)保証你搵極都搵唔到，留意係上圖門口行入去就會見到。
份量唔算多，不過岩岩好
o係香港肉骨茶我淨係飲過好時o個o的，呢個我覺得好飲好多(不喜藥味者勿Order)
好似對上一兩年真君寶誕都有跟朋友談及，不過談及的時候已經完了，很多朋友都沒機會去看看，但今次介紹時還是真君寶誕介紹的第二天，各位朋友還是有機會可以進來青衣看看。
Read more…
除左食辣，小弟亦特別鍾愛泰菜(其實都係食辣 XD)。如果話干炒牛河係茶餐廳既代表，咁菠蘿焗飯應該係泰菜既代表。細個o個陣第一次食覺得好新奇，因為o的飯真係用原個菠蘿載住。不過食到今時今日我一直都有個疑問：究竟個菠蘿係咪Second Hand？
近年泰國菜館好似少左用原個菠蘿，就算有原個菠蘿載住食落除左菠蘿粒個飯真係無咩菠蘿味。有時食到差唔多都會搵筷子篤下個底 – 硬過石頭，有點懷疑究竟個菠蘿係咪re-use？所以為左下家著想我食完通常都會破壞個菠蘿以免有下手接貨。
今日去左間泰菜館食菠蘿焗飯，因為個飯帶有好強菠蘿香味，所以心血來潮試下挖舊菠蘿出黎食。雖然我仍然覺得二手菠蘿呢個Urban Legend係真既，但至少呢間我食個個菠蘿底，應該係Brand New既!!
泰豐泰國菜館
電話： 23343271
地址： 紅磡黃埔民泰街
Openrice
在較大的地圖上查看NetBugs 美食版圖
Recent Comments