To share what i see…

近期小弟忙於工作，希望可以趕及復活節前完成手頭工作”安心”遊大阪(實情係星期六去到澳門都唔知有無飛機搭，日後再談)，所以比較少更新Blog。不過剛剛看過票房，看到上週我看過的那套電影票房極為慘淡，個人認為實是可惜。因此在外遊前有必要跟各位分享一下這套電影，好讓各位可以在上畫期間入戲院支持一下。

我算是半個彭浩翔粉絲，由買兇拍人，大丈夫，公主復仇記，伊沙貝拉到對上破事兒都有睇過，除了出埃及記唔太識欣賞，他的作品我自己都很喜歡。今次志明與春嬌屬愛情喜劇，從戲名與Poster未必領略到電影大綱，可能因此導致票房慘淡。在此不多講內容，然而本人極為討厭人食煙，不過不得不讚彭浩翔將打邊爐(即一大班人圍住食煙)拍得極有美感(尤其楊千嬅)。而彭浩翔將一些十分本地的元素加入電影，拿捏得非常精準，這類題材要”玩得盡”，當今本地可能只有他可以做到(不單指技術，還有資金籌集)。

就算各位唔抽煙，就算各位唔講粗口，我相信志明與春嬌亦可以令各位喪笑，而煙民對該片應該更會有多一份共鳴。如果話”歲月神偷”代表六十年代的香港，那志明與春嬌應該代表今時今日的香港，絕對應該入場一看。

TIPS: 記住睇到最後最後最後戲院開埋燈先走

自從明漲食評引來極大迴響後，小弟被友人冠以”劣食總司令”稱號，實情係：除左明漲，我真係諗唔到有更強o既劣食推介俾大家。為o左”洗底”，黎緊幾個星期都會為各位介紹小弟常去的”正常”食店。首先要由”蘇Good”講起……

話說小弟早前相約友人們上川龍飲茶讓他們見識見識，誰不知岩岩遇著剛剛，剛巧那個星期蘇絲黃節目就係介紹上川龍飲茶，相信好多鍾意四圍搵食o既朋友都有個共識  – 蘇絲黃簡直係飲食界o既蝗蟲(絕無貶低之意)，所到之處當場淪陷(同樣絕無貶低之意)，唔多隔三五七月去都有排你等。所以上川龍飲茶之前一晚立即上tvb.com搵返o個集蘇Good睇下佢去邊間飲茶，因為川龍有兩間茶樓，如意算盤係去佢無去o個間，點知佢兩間都去晒……

上星期蘇絲黃又就出廚房去o左澳門，友人們晚晚睇實佢個節目，唔係睇下佢有咩好介紹，而係睇下佢有無介紹自己去開o既。講真，佢介紹好野俾大家食係無錯o既，不過人總係自私麻，俾佢介紹完搞到自己無得食/排餐懵真係幾無癮。好似小弟去開手信街o個間晃記，以前係唔使排隊o既，自從佢介紹完後依家次次去到都要排隊兼且唔係樣樣都有得賣。Anyway，今次要介紹o既係蘇絲黃未曾介紹過o既一間意大利菜。

記得o個次去澳門入住MGM酒店，checkout o個陣問個澳門朋友食咩好，佢答：MGM地下Sunday Brunch OK嫁!! 我一睇，真係OK喎，差唔多四舊水一位食個Lunch!! 最後行o左一陣就黎o左同MGM相隔一條街o既”經典意大利餐廳”。由於呢間野唔太出名，基本上大部份時間都可以walkin，亦因為唔太多人，所以可以坐低同朋友慢慢傾計品嘗美食。

意大利菜指定動作：食麵包(其實成餐食得飽某程度上就係靠呢o的飽，不過都相當好食)。

生牛扒沙律：開胃前菜

風乾牛肉芝士：非常濃烈味道o既芝士(不喜濃味勿吃，反之會覺得好好食)。

薄餅：唔好睇少，呢類薄餅我都食唔少，呢間真係整得特別好食，仲要係食到唔停手o個隻!!

磨菇意大利飯：份量唔多，不過又係高水準之作，貴精不貴多。

要o係香港食返差唔多o既菜我諗最少都要位位二百，仲要未必好食，而經典意大利餐廳收費以意大利菜黎講亦唔太貴，四個人去人均消費講緊都係百鬆o的。自從去過一次之後，依家去澳門就算唔買手信都一定要去食下!!

經典意大利餐廳
地址：宋玉生廣場 (皇朝)倫斯泰特大馬路40,42及46號
Openrice：http://www.openrice.com/restaurant/sr2.htm?shopid=24307

在較大的地圖上查看NetBugs 美食版圖

今年大年初六晚，talkonly節目做到翌日零晨三點，食埋宵夜(其實可以叫做”早餐”了!!)已經差不多係”清晨”將近五點。我渣車送占士返屋企，之前淨係知佢o係旺角轉N車回家，但係無諗過佢屋企原來遠到連我渣車都覺得勁遠，當時o係度諗：平時佢o係talkonly做成幾粒鐘節目之後搭小巴到旺角轉N車返屋企第二朝點返工？我在車上問佢：咁樣返屋企仲要咁夜咪好”lor”命？佢答：唔”lor”命。

最近心裡我經常對各talkonly主持有個疑問：點解要做talkonly？我經常話talkonly唔係自負盈虧，因為從來都無固定收入，所以talkonly只係一個”自虧”節目。個個星期五晚捱更抵夜做talkonly，返到屋企零晨三四點，仲”支力”過返工但係一個仙都無，真係值得嗎？

我本身其實唔係咁鍾意講o野(以前搭小巴唔係最後一刻無人叫落車我都唔會叫)，口才亦唔了得，只係誤打誤撞o係科網泡沫年代o既Radiorepublic開左個節目，而又咁岩識到小黃做就初期o既talkonly。初期talkonly並唔係諗住講IT，又係誤打誤撞講o左一集寬頻o野變o左做IT節目直到現在。話就話今年係talkonly十週年，其實斷斷續續中間有四年無做到，那段時間有一年我落o左腦場做Sales，可能因為返工講太多，所以工作以外愈來愈少講o野。說話少o左換來係聽多o左，而咁多年來o既聆聽換來一個小總結係：我相信人性本善，但大部人口講同心中所想都會有所差異。

記得有一次請o左個o係學校工作o既嘉賓上黎節目，開台前一齊食飯閒談，當時我在談及校園吸毒問題，嘉賓問我呢o的敏感話題可唔可以細聲o的講。我反問嘉賓點解唔可以o係公眾場合談及社會問題？講真心話應該係人類最自然o既本性，點解永遠要遮遮掩掩？我唔係想怪嘉賓，但實情係當社會人人唔敢或者唔想講真話o既時候，人一定唔會開心，社會衍生問題亦會愈來愈多。而talkonly所堅持係講真話，我地所讚所彈o既未必係所有聽眾所認同，但一定係我地所相信。

答返第一個問題 – 做talkonly真係值得嗎？在我個人而言，此時此刻我仍然覺得值得做。QA經常話o既talkonly風格就我o既解讀係 – 主持中不同立場所產生o既火花。可能大家覺得QA鍾意認叻，但係佢提o既o野夠尖銳，占士雖然說話唔多，但係一句到位，ifg代表住佢o個代，A網友係最有心做資料搜集，地畢最Hyper，馬高對Palm始終如一。我對這樣的talkonly主持組合珍而重之。雖然我對talkonly這種自虧製作模式仍然擔心無以為繼，但無疑因為咁talkonly先可以暢所欲言，無須向任何利益團體賣帳，我相信呢個世界點都要有好似我呢o的咁o既傻仔去顯得聰明人有幾聰明吧？

talkonly一集節目長度分分鐘比某些網台一週節目長度總和還要長，因此與其話講台係一個”節目”不如話係一個”台”。而我經常都有呢個疑問：聽Archive 的聽眾要分多少天才聽畢一集節目？在此小弟十二分感謝各位友好及高質素聽眾對talkonly的支持，當然亦要感謝主持們這些年來的付出。但願talkonly接下來可以好好維持，未敢突破， 但求繼續能為各位聽眾服務，謝謝。

自從”一生人必去食店 – 明漲壽司”一文刊出後，迴響甚大，更甚係得到高登巴打賞識，簡直係威過上CNN。坦白說我是始料不及的，因為到呢一刻小弟仍然視陰陽路十二之生化壽司為當今世上最經典食評，論文字功力小弟不及佢一成。借此機會我先回應一下部份網友的疑問。

1) Youtube上看到杯入面有飯o既短片，應該係上一檯客食唔晒壽司將舊飯倒落隻隻杯再放隻杯上杯架的。我個人當然唔鼓勵浪費食物啦(唔計舊梅菜扣肉壽司，對上一次劣食團我地Order o個二三十碟係全部清晒o既)，不過難保有人第一次去明漲唔知唔係件件壽司都擺得落口，所以係可以理解但未能苟同。

2) 對於”俾少少錢唔好要求多多”呢種講法，雖然明漲有堂食難以與超市壽司比較，不過同樣價錢在超市所買到的壽司份量應該相差不遠。再者小弟從來無話過明漲半句不滿，更甚好多友好經我介紹後都好想去試試傳說中要趁熱食o既熱飯壽司。

“食”對我黎講唔單只係味覺體驗，亦係環境體驗，從不同地方食店去觀察週邊食客是一件有趣的事。好似食明漲咁，有人覺得明漲係劣食地標，但係亦有人覺得明漲係優質廉價壽司。我經常都話：去了解一件事或者一個人，必須要從一樣o既角度，一樣o既視線去觀察，依家機會黎喇!!

自上次劣食團後，不少友好都話我點解唔預佢，因此小弟決定會安排多一次劣食團Regroup，暫定係再下一個星期期中一日，各位友好有興趣可以o係以下網址揀返邊日得閒，夠六個人就會成行，以最多人去o個定為最終出發日，謝謝。

PS：正如有人所講： 板左板右會食物中毒，但就真係無聽過明漲有o的咩事，所以我相信食明漲係安全o既。

http://bit.ly/201003sushit

7/3 有興趣參與下一輪劣食團請看 明漲劣食團Regroup

眾所周知香港係美食天堂，各式各樣美食包羅萬有，食店要突圍食物水準一定要有番咁上下。不過好食係唔足夠o既，因為o係香港呢個美食天堂大把好野食。在云云競爭中，香港有一食店悟出驚世道理 – 做唔到天下第一好，就要做地獄第一差。 無錯!! 一千間食店，有九百九十九間都想做最好o個個，唯獨一間要做最差，計下數就知做”最差”呢個市場係好容易壟斷的。

坦白講小弟已經唔係第一次惠顧呢間野，佢有幾”得”我十分了解。再次惠顧係因為小第看畢當今網絡經典文學之一”陰陽路十二之生化壽司“(如果我今日死o左咁呢篇就係我呢生人睇過最好o既食評，蔡瀾都要死開)，跟朋友們談及該文引起本人萌生再搞地獄團之念頭。而地獄團前前後後都籌備好一段時間，係因為團員名單改了又改，最後出黎o既大部份都係talkonly主持，可見無番咁上下老友真係鬼同你去，去得o既都係有情有義，真朋友!!

當晚我地一行六人破地獄，本諗住閒日無咁多人，最後都等o左兩三個字。

低脂三文魚壽司 – 唔單止健康，仲好環保(睇下碟面就知!)

沙律壽司 – 將椰果，菠蘿，車厘子，粟米整合o既壽司!!

甜蝦壽司 – 終於多左條毛…….係甜蝦至真!! (平時係一舊一條的)

海哲壽司 – 有魚翅的!!!!

肉鬆壽司 – 跑馬拉松中途有水站，食明將都要抖下氣，呢舊食落已經係最似傳統壽司(at least飯有飯味，肉鬆有肉鬆味)。

紅豆軍艦壽司 – 該款壽司近年已經上o左神檯，甚少o係迴轉帶出現。當我地同Waiter話要三客紅豆軍艦壽司，佢當堂面色一沉，知道我地係識貨之人黎踢館挑機打大佬。正所謂影評唔講Spoiler，呢舊神檯級壽司o既味道留待各位自己親身感受下。

多春魚壽司 – “為食總司令”幟哥畢生鑽研唔同o既海鮮烹調方法，我諗佢萬料不到原來多春魚可以拎黎做壽司!!

(必點!!!)梅菜扣肉壽司 – 遠睇似梅菜扣肉，近睇似鹹魚，由於我係無食到，所以對佢o既真正身份唔太清楚(下文有講點解無食到….)

剛從迴轉帶上方杯架拿出的杯(該文最後有片睇)

今次再戰明將，絕對保持到水準之餘，亦有不少驚喜。首先係馳名o既熱飯壽司終於有o的改變，除左北寄貝壽司係熱飯外，其他壽司都係冷飯，尤其係炸尤魚鬚壽司，明明睇住佢岩岩整出黎擺上迴轉帶， 估唔到舊飯凍，條炸尤魚鬚仲凍，好似岩岩o係雪櫃拎出黎(仲有些少雪水味)，感覺非常新潁。另外一大驚喜係梅菜扣肉壽司，如果話食紅豆軍艦壽司係打大佬，咁梅菜扣肉壽司應該係Hidden Mode o既超級大佬。 A網友開頭食o左半舊就無食然後講左句oshit!!(日文好食的意思)，小弟認為好野應該同各位分享，所以當時無食到。直到差唔多埋單，由於該壽司賣相實在太吸引，情不自禁地拎起隻碟近距離索o左一野 ………. 氣味先令我有做大肚婆的感覺(作嘔作悶) ，繼而感受到母愛之偉大(感動落淚)，此時此刻我終於明白 – 舊壽司係拎黎聞唔係拎黎食的，各位準備去明漲的話必點(又或者外賣定幾舊，跑跑下馬拉松暈低左既話俾佢索一索保證彈返起身)!!!

事實上明漲分店遍佈港九新界，食客對於其他分店評價亦相當正面，何解偏偏西九店成為劣食地標？外界對呢個問題眾說紛云，有人話呢度就係明漲o既庶務二課，所以搞成咁。亦有人認同本文開頭所講 – 做唔到天下第一好，就要做地獄第一差，邊種講法先正確？呢個係一個……謎!! 無論如何，明漲壽司憑住不斷努力創新，敢於求變o既態度令佢地製作出日本都食唔到，全銀河系只此一家o既Fusion Sushit。

兩次的劣食團後段，我地觀看四周食客，都會有個疑問：點解佢地食得咁開心？隔離檯一位女仕，坐佢旁邊o既似係佢個仔，疑似係阿仔帶阿媽食”好野”。團員訪問個阿媽問佢好唔好食，阿媽一邊搖頭一邊答：å好食!! 此時小弟終於茅塞頓開，亦強烈建議各位一生人一定要去多次明漲壽司。阿仔帶阿媽， 阿媽話好食係引證母愛o既偉大，阿爸帶阿仔去係教識阿仔做人要刻苦耐勞，情侶分手可以叫對方”不如一齊去食明漲壽司”作為借口，聽到o個個一定會話：你係咪想分手？男o既求婚前亦可邀請對方去食明漲壽司，如果可以一齊食完面帶笑容離開，咁可以證明佢係一個可以挨苦，可以共患難o既好女仔，娶得過!!!(小弟亦借似機會為部份食評話食明漲o既就係MK兒女作出平反，食得明漲o既都係克苦耐勞o既好男仔，好女仔!!!! ) 所以話食明漲係充滿無限可能，帶俾你o既快樂比迪迪尼更多，而講緊只係付出五草野有找，快o的約埋班Friend黎西九，食好野!!!

給死士的忠告
- 由於佢地係無Menu的，壽司都係憑空想像出來，建議先搜集本文及其他食家”推介”(梅菜扣肉壽司個名係我作的，因為真係唔知咩黎，所以呢個抄低都無用)，整理好再列印清單以方便Order。
- 最好搵個講急口令叻o既朋友負責落Order，因為呢度waiter唔wait人，我怕你講得慢的話Order o左一半佢已經走o左。
- 盡量坐迴轉帶旁邊，好多新Fusion料理都係咁樣發掘出來的。

烈士的引證 – 明漲雙子塔

小弟雖不能與各位同年同月同日生, 但能同年同日食明漲, 總算共過患難. 一齊硬趙過紅豆壽司, 今後以兄弟相稱!!