有好多節日對我黎講都係不明所以，唔係唔知So哥Birthday，而係唔明點解聖誕要送禮物，而禮物又要交換，當然講到尾都係為開心啦(無論係賣定係買o個個)。
我唔係”綠色塔利班”，車我照渣，真係唔記得帶環保袋我係會照買膠袋。不過咁，同常交換返黎o既禮物只會撚一次(即係拆開o個下)o既機會超過五成，真係會用o既一成都無，連我呢個唔多環保o既人都覺得有點浪費。好似”城市低級”同”登出” o的USB Toy真係純粹玩野，仲要好大機會同其他人撞送埋同一樣禮物。作為實際派o既我建議各位不妨送o的比較實用o既野，好似呢位同學收到o既禮物就真係十分實用喇!
我係一個好鍾意試新戲院o既人，以前一有新戲院開我一定仆到去試，就算遠至數碼港我都去睇過。近年覺得The Grand Cinema，荃灣/奧海城百老匯對我黎講已經係無得彈，反之較新o既戲院好似MCL德福，甚或岩岩先開o既UA iSquare同嘉禾Citywalk都俾人鬧到爆，搞到我都無咩癮特登去貼錢買難受。
尋晚岩岩o係中環食完大餐，諗住睇十月圍城。雖然已經上左有一個星期，不過間間戲院都好FULL下，最後揀o左岩岩提及o既UA iSquare。查實我對UA印象都幾差下(請參考我認為列入經典戲院o既UA東薈城)，唔係IMAX片都唔過UA睇，不過咁岩UA iSquare有位，兼且用手機上 m.cityline.com 購票的確好方便 (主要係因為Credit Card資料一早Save左落戶口，唔駛再打過)，所以即管試下。唔計IMAX院，UA iSquare有四個院，一二號院我無留意，但係我睇o個間三號院同Phoenix院就真係激細，個screen 同港威差唔多細，係座位比較好坐搭救返，不過再要去睇o既話就免喇。我一直提出o既理論係，去一間好o既戲院同一間唔好o既戲院，其實票價都係差唔多，點解唔去間好o的o既？
講返十月圍城，有人話係港片年度之最不為過。電影前半係文戲後半係就開打，後者明顯屬商業考量，雖則有些少Over但我覺得還好啦。整體黎講我覺得係值得入場一看，尤其電影好多講孫中山搞革命o既內容都可以套用o係當下，值得觀眾深思(最奇怪係呢套戲竟然可以o係內地上)。尋晚睇九點十竟然有人十點半先入場，我上講記住唔好遲入場，因為呢套戲個頭真係好重要，亦令我一路睇落去o既時候唔能夠唔諗套戲好多對白都有弦外之音……
近大半年來，我平時跟同事都是到公司附近食午飯，據非正式統計，我地食五十次Lunch有四十九次都係食美心快餐，雖然同事落親去既開場白都係：嘩又係食呢o的？不過由於美心實在太就腳，所以都係”焗食”。
在美心快餐有位”應該”廿歲不出頭o既女經理，有時我地食食下Lunch都會走過來，隔離位”網交王”同事當然唔會放過機會同佢傾兩句。同事問佢借o左部Sony Ericsson最新o既手機出黎玩，佢好似對小妹妹部Satio好有興趣，而我最好奇o既係點解佢可以用大半(應該係差唔多足一個月)o既人工去買一部手機，我估計係因為佢無乜家庭負擔(又或者部電話真係好好用)。一聽之下知道呢位小妹妹中學畢業，我唔知點樣可以同各位解釋到佢係一個咩人，但我跟同事同樣用o左兩個字形容佢：無知。
“無知”絕對唔係一個貶義詞，我對無知o既理解係：無經過社會污染，名符其實天真無邪。而社會對於無知o既理解係：唔知世途險惡係生存唔到o係呢個世界。我同同事講：位小妹妹一個唔好彩遇到壞人好易俾人呃。不過同事話：你係邊類人就會同返邊類人一齊(但願如此!)。同事再問小妹妹：有無諗過轉工？小妹妹話：無呀，呢度(指美心)都幾好丫!! 社會對呢類人o既解讀係：無上進心，遲早被社會逃汰。我將這個故事跟友人講，友人話：其實都可以話佢係”知足”者!!無錯，只要努力工作，其實做死一世美心係無問題，那怕係做最厭惡性o既工作。黃子華都講過一個問題：個個去晒炒股票，咁邊個去”湯”雞？可惜的是，呢個社會係唔容許人知足，一踏出社會就好似跌左落個浮沙池，唔努力向上爬o既必然結果就係死無全屍。何解知足都有錯？
我唔敢話我對呢個社會o既解讀完全正確，不過實在親身體會過太多呢個社會o既黑暗事。朋友最後講左個比等價交換更加必然o既定律 – 呢個世界係唔公平。當我地呢o的以為自己好懂得規則玩呢個社會遊戲o既Player去Predict那些無知o既人會係大輸家，最後往往係我地自己俾呢o的遊戲規則困住，而那些人可以快樂生活下去，小妹妹最後可以嫁個有錢人過少奶奶生活。
跟身邊朋友平時吹水閒聊，我真係未聽過有人話：我好開心，好幸福。聽得最多係：無錢呀，還Loan呀，想死呀。或許我們其實唔係過得太差，甚至幸福已經在我們身邊。廢話都要講句，出糧出幾多你控制唔到，但係幸福同快樂係可以掌握o係自己手中。套用Master Card廣告一句 – 快樂：無價。
在港股連跌五個交易日後的今天，預祝各位聖誕快上。
小弟近年比較少發開箱文，如有錯處請糾正 =)
老實講，我比較少接觸Nokia手機，如果真係要講有興趣試既有兩部，一部係Nokia N900(暫時未有本地行貨消息，不過睇eprice評測效果非常OK)，另一部係Nokia E系手機，因為身邊友人對E71評價都唔錯。今次小弟就借o左部岩岩先出o既E72返黎試一下。
好多E71用家對E72 First Impression係程式執行快左唔少，不過對E71用家來說更留意是Phone Jack又2.5mm改為普通耳機通用o既3.5mm。另外新增既有方向鍵中間既Navi光學鍵(類似touchpad)同500萬像素相機。
以商用機來說，對實體鍵盤及大量收發電郵有需求的話，E72係唔錯選擇。Nokia Messaging自早前推出不少Nokia用家都讚好，其實講穿o左就係一個Email Setup Wizard，入個電郵地址同密碼之後其它野幫你Set埋，減少End User唔少麻煩。(現時E72及E75係可以終身免費使用 Nokia Messaging ，其他Nokia手機使用有關服務之收費請向網絡商查詢。)
留意：
- E72 內置o既Mail for Exchange現時支援Google App唔太穩定，所以各位暫時可以當唔支援。如果要收發Gmail可以使用Nokia Messaging，至於同步Google Contacts可以參考呢個網站。
- 對於HTML電郵兼容有待改善。
無錯，又係講辣!!
暫時黎講o係本地食川菜我最欣賞係四姐，不過麵食方面首選都係聯記同傷心酸辣粉，其中傷心酸辣粉肯定係食得最多，因為唔使排長龍兼且就腳，最好係傷心酸辣粉收零晨點半，落去食宵夜最理想(酸辣粉份量真係食唔飽我，做宵夜岩岩好!)。前排渣車見到o係葵興葵涌道對出有間”外婆酸辣粉”，尋晚諗唔到食乜之際就決定食呢間。
入到店內，未落Order未坐低，我聞一聞店內既”辣味” – 係呢隻味!! 簡單而言”外婆酸辣粉”同”傷心酸辣粉”食既野接近一樣，係”外婆酸辣粉”小食選擇比較少，不過大路野口水雞，夫妻肺片同青瓜都有。味道方面良間都差唔多，我唔敢講”外婆”好食過”傷心”，不過一定唔會差過先。對我黎講”外婆”好有驚喜，不過睇黎間野未被Openrice開發，所以人流甚少。我既結論係，各位可以當”外婆”係”傷心”既分店，住九龍區既唔使特登入黎試，相反住新界區既就多左個就腳選擇。
:
外婆酸辣粉
電話： 26102083
地址： 葵涌葵涌道1001號德昌大廈地下24號舖
Openrice
在較大的地圖上查看NetBugs 美食版圖
Recent Comments