旺角算係香港飲食潮流其中一個重要指標，o係得旺角區hit既飲飲食食自然會蔓延全港，當年有沙冰，近年有Cafe。還記得幾年前小弟都經常幫襯不同既新Cafe，最深刻係某間o係登打士廣場十幾樓開既Cafe(唔記得左叫咩名，但係九成九摺左)。我地一行幾人上去邊hea邊打NDS，我叫左Latte，朋友A叫Mocha，朋友B叫焦糖咖啡，最後幾杯野放到上檯我地都分唔到邊杯打邊杯，因為一模一樣樣，更甚係一模一樣味。
渣左車年幾真係出少左旺角，上個星期日行一轉人多到有點不習慣。講出黎唔係想講渣車有幾威，而係太耐無行過我對旺角感覺的確好陌生，陌生到自己好似唔係一個香港人，變左自由行。唔行真係唔知Citicall大間左咁多，唔知多左間譚仔o係豉油街，唔知原來台式飲品店開到多過七仔N倍。
其實我個人唔太贊成一窩風咁去做同一樣野，因為一窩風既結果通常都係一鑊熟。好似剛剛提及既”一樣味Cafe”就係當年Cafe泛濫出來的衍生產品，難聽o的講句 – 阿豬阿狗都做無特式無創意：死硬。但吹漲既係好幾間旺角既台式飲品店都其門如市，香港人係咪行街唔飲野會死？作為香港人既我當然係都加入左”行街唔飲野會死”一族既其中一員。
朋友間都知我好貢茶既奶蓋系列，平時幫襯開荃灣店，等十幾分鐘我已經覺得有點兒那個，怎料旺角登打士街貢茶條隊我諗都要等半個鐘，最誇張係依家差唔多間間賣小食既都一定要由珍珠奶茶賣(毓民牛肉麵都改裝舖面賣埋!!)，珍珠奶茶升呢做埋凍奶茶同檸茶以外香港人第三指定飲品。其實呢o的台式飲品店，間間都差唔多，難度COMEBUY同貢茶賣既珍朱奶茶真係好飲好多？事實當然唔係，珍珠奶茶講味道其實好難有太大分別，極其量係茶同奶比較上分別令口味有所不同。其實好似COME BUY或者八方雲集呢o的突然o係香港急速冒起既連鎖o係台灣其實唔係想像中咁火熱，裝修香港店分分鐘台灣店更豪。雖然我無去過高雄，但就我了解，貢茶o係高雄開展係真既，不過真正發明呢杯奶蓋既應該係同樣來之高雄既”綠蓋茶“(嚴格上黎講應該係綠蓋茶走紅後其他店舖相繼模仿)。由此可見，品牌好重要，離香港越遠越好。黎緊天氣轉涼，究竟有幾多間呢o的舖撐得住？還是仿傚火鍋店，你有夏天開行冷氣打邊爐，我有冬天焗爽拿飲珍珠奶茶？
山寨貢茶
Hot.com (還好Hot.com不是鹹網，不然 XDD)
毓民都要加入戰團
話中國最識食不為過，基本上除左碟之外上得餐檯既都食得，甚或頭髮都可以變豉油，呢o的係鬼佬個腦進化到世界末日o個刻都諗唔到既發明。
Anyway，小弟都係”雜”食之人，食得最多係豬雜，其次係牛雜，而今次為各位介紹係小弟都小食既雞雜。當天小弟只係叫左碗雞雜粥同一杯凍奶茶(據聞腸粉都幾得)，已經飽到不行。原因之一係杯奶茶真係好大杯，其二係碗粥的確真材實料兼且極大碗。粥底味就幾好味，不過就係因為太好味有些少懷疑落左味精，小弟喜歡係佢o的粥入面既菜脯粒，小小鹹味配粥幾醒胃。雞雜份量好多，唔會食完一塊雞腎就無第二塊。明記雞雜粥算係o係電影中心附近，睇戲前後去”開粥”不失為一個好選擇。
地址：油麻地永星里1號
Openrice
在較大的地圖上查看NetBugs 美食版圖
飲食節目既公式化程度與劇集不遑多讓，奈何兩個電視台偏偏不斷製作呢o的節目。廢話界代表有亞記收視一姐黃麗梅，無他既，因為佢主持既飲食節目大部份都亞視既收視奇芭。浮誇界代表有蘇玉華，佢既演技的確無可置疑。就係因為飲食太悶，只要節目Format有少少唔同就唔難取得成功，蘇Good甚或前身”一粒鐘真人蘇”算係呢方面既表表者。
過往蔡瀾先生既飲食節目其實都幾公式化，不過蔡生既人生歷練的確豐富，往往飲飲食食時的分享都很有趣，所以無記亦一直搵蔡生”添食”多做幾緝。蔡生可能都知道Keep住公式一年做一緝都會乾塘，所以今緝”蔡瀾品味”多左食以外既野，亦做得放左，”真話”講多左。唔計佢條友集集內容都滲佢自家出產，其實佢講野都幾直接。第一集明讚暗踩政府之餘，其中一段介紹天地書店o個陣同店長講：買健康書唔會健康左，買經濟書唔會有錢左，係既你就唔會o係度做啦。句句入肉，要o係大台節目內踩得咁應，當今唔計無記既港台時段我諗真係得蔡瀾一人做到。
有時睇飲食節目最有趣唔係睇o的野有幾好食，而係睇主持們食完既反應。剛才提及既蘇玉華最據觀賞價值，一般黎講唔太好食既野佢會用浮誇既表情”好好食呀”去蓋過真面目(有關表情可以參考食神Opening 食水晶膠溝雙氧水o個位廚師)，反之好食既時候佢係唔會講野係咁食同埋微笑，唔信可以o係MyTV睇返上一緝蔡瀾嘆名菜。
睇返上星期o個集蔡瀾品味一開頭介紹o個間蘇三茶室，只要仔細睇下佢地幾個表情就知出事。陳貝兒Comment左咁耐只係用左”特別”兩個字，睇黎蔡生介紹純粹係俾面派對。睇返開飯Comment，我唔敢話佢地好客觀，不過有位網友既食評太精彩請容許我在此Quote：
雞湯飯,雞無雞味飯無飯味,湯就勁多味精味
哪個所謂煎白羅白肉餅飯,簡直好似放兩件羅白榚係碗飯上面,羅白煎到勁黑,飯就似隔夜壽司飯.
奶茶就更不中不西,用lipton茶包.
鴨胸面食到我老婆大人黑口黑面,勁多味精.
呢間野係咪真係咁難食我唔敢講，但作為喜歡食既我公平些少我會去食一次再同各位報告。節目中段有介紹小弟最愛既聯記，而聯記既川北涼粉亦係蔡生至愛(佢之前o係報紙雜誌介紹親聯記都係用涼粉做開頭)，你睇佢食到眉飛色舞同開頭食蘇三爭咁遠知道分別o係邊喇。
究竟打邊爐係邊個發明？我問過Google神，太概係N年前唔知邊個朝代既發明，由一鍋過整熟再分食物演變到依家一路”拾”一路食。計我話都係懶之過，Skip埋廚房拎出廳個Step先有今日既打邊爐。
一年三百六十五日打邊爐係幾時開始？其實四季火鍋o係香港好早已經存在，不過要講真係”流行”應該係稻香開始？真係唔肯定，但稻香之前打邊爐食物選擇的確無咁多”花臣”。
上星期因為流料ROY極力介紹去左新填地街既和味菜館，算係旺區少有甚或係唯一既炭爐打邊爐地方。除左炭爐，另一大特式係座位，大部份檯都係放o係後巷，可能o係blog度寫各位好難相信，但的確佢地條後巷異常整潔。當晚(閒日)去到已經九點幾，”後巷”位已經無晒(笑話一則：話說再對上一個星期流料ROY同佢友人去幫襯坐後巷，可能太嘈關係， 樓上有人倒水落黎，佢隔離台中晒招，所以要坐後巷位記住揀有帆布遮住的，唔係呢個笑話可能變成閣下既悲劇)，我地一行三人上左去樓上室內位睇睇環境，不過上面唔係用炭爐之餘仲要煙霧瀰漫，所以最後都係等左兩三個字坐左個地下半Outdoor位。炭爐精妙之處在於室外既自然風o係你一邊食既期間會一邊幫你潑火，所以個一路食個火都會一直火光紅紅，我地就失敗o的，因為坐o個個位唔係完全Outdoor所以唔透風，亦都因為咁個撚左個火成三四個字先食得。
講返食，其實得幾句。手切肥牛的確十分正(唔好叫美國肥牛)，丸類餃類都係必試。整體黎講三個字講晒：食風味。因為坐唔係特別舒服，食物唔係特別好食，湯底亦無其他酒樓咁多花臣，但一定唔會難食，純粹係見識下炭爐係點打邊爐既話一定唔會令你失望。 一般黎講夜晚七八點去一定有位，有興趣既搵晚涼返些少不妨一試!! (問我邊度打邊爐最得我首選仍然係滿口福)
後話：當晚等位時巧遇食環處 架白色VAN仔，其實後巷打邊爐梗係有問題啦，但係架白色VAN仔只係隔一條街停左o係度幾分鐘，老闆就熄左後巷o的燈，食環處o的人就當睇唔到。你地可 以話食環處唔做野，但另一方面呢o的可能就係所謂既”規矩”，你唔做得太過火佢地亦唔會搞到你做唔到生意。而佢地亦好識做有定時定候清理街道垃圾，分分鐘比普通街道更要乾靜。
地址：旺角新填地街282/咸美頓街
電話：23884018
Openrice
在較大的地圖上查看NetBugs 美食版圖
上圖攝於星期四開始一年數天於荃灣廣場舉行的新界數碼生活嘉年華，你們看到的是甚麼？人山人海？我看到的卻是血流成河。
其實如果唔係talkonly，小弟真的沒有太大意欲入場去甚麼電腦節或者嘉年華，電腦已經夠多唔洗再買多，逼餐死最後慳了十幾蚊(只是可能)，點解要去？不過由於對上一次Megabox搞的沒有去，所以今次好有興趣去荃灣廣場看看怎樣可以在商場內搞電腦節那麼神。
我大概走馬看花看過一些產品售價，可能真的有一些平到喊既產品，但大致上都係一樣價，甚至貴左。小弟買得最多亦最關心既RAM價，展場價ADATA 2GB Desktop RAM係HK$335，我幾日前腦場買係HK$320。作為消費者可以先否定”數碼生活嘉年華”有平野賣，因為展場有得平既野，腦場唔見得會貴左，講穿左參展商就係腦場一份子，反之參展商要俾參展租金，租金成本加返落賣既野亦唔出奇。如果真係就腳既話去一趟又唔洗入場費我覺得無咩所謂，否則可以慳返。在商言商，搞呢o的活動係商業決定，如果新鴻基話要搞，你鍾意個個月都搞一次又有參展商肯同你玩其實真係無咩問題。問題係依家主辦o個個係推動業界發展既”香港電腦商會”，咁究竟搞呢類電腦節係咪真係幫助到業界呢？
從一年一次電腦節，到一年兩次，到現在一年四次。消費者越來越意識到電腦節其實唔係咁優惠，呢個活動已經唔能夠令塊餅變大，反之變成展場與腦場的直接競爭，當腦場生意淡薄，展場買氣又唔見得高漲既時候，大家都會變成輸家，最後既得利益者就係”香港電腦商會”，各位天真既行家唔好再妄想電腦節可以長遠都幫你賺到大錢。o係邊度跌低，就要o係返邊度起身，要搞旺腦場應該由返腦場做起，俾些少吉士唔好賣”佢地”帳啦。
PS: 如果”香港電腦業協會”需要任何協助，小弟願意分文不收 =)
山寨貢茶
Hot.com (還好Hot.com不是鹹網，不然 XDD)
毓民都要加入戰團
Recent Comments