香港應唔應該起高鐵？點樣起高鐵？我其實無咩意見，反對亦沒有甚麼意思，因為政府係唔會睇香港人頭，原因好簡單 – 除半個立法會以外，整個特區政府權力並非由香港市民賦予，而係由中央政府授予權力，因似特區政府係唔需要民意基礎，就算民調零分佢采香港人都有味。再簡單o的講，你食A餐廳覺得唔好食，下次可以去B餐廳。特區政府做得唔好，唔通香港七百萬人都去幫襯景鴻移民去岡比亞？
作為一個所謂政客，佢地對傳媒或者公眾發表講話，最重要並唔係講話內容，而係講話技巧。近來我地都聽到好多Keyword，”0708″ “2012″ “雙普選” “人大常委會”。講真我都唔敢講我自己完全聽得明佢地講緊乜野，借此機會我想用我既理解去解讀一o的經常聽到既說話。
無論係林瑞麟定譚惠珠，譚耀宗又或者係成個民建聯，每當佢地談及政改開場白一定係：人大常委會已經決定2012無普選……..，咁究竟人大常委會係咩黎？答案可以在 Wiki 找到，在這裡不詳談，用一個政治不正確既小學生態度問一個問題：人大常委會憑乜野去決定香港人既前途？點解香港人既前途唔係由香港人決定？莫講話人大常委會，連三十六個港區人大也如是，不單止無認受性，仲要無乜人識。安於現在既香港人在鄙視泛民搞亂檔既同時，係咪都應該諗下呢o的問題？
上星期聽光明頂陶傑請左白姐姐上黎講社民連，當中談及功能組別，白姐姐認為如果功能組別選民人數擴大或者利用功能組別把少數族裔聲帶入議會仍然係有其價值， 佢既講法不無道理，不過現實上功能組別既出現並唔係為左平衡各方利益，而係保障商界利益。唔好話將功能組別三十席全面改為直選，就算選民基礎亦無可能大幅增加，因為咁樣會令商界少左個立法會既否決權，that’s the truth。
我地成日話一國兩制好成功，咁係代表o的咩呢？好聽o的就係因為生活方式既差異而維持有別於內地既原有法制， 難聽o的係內地部份法制未盡完善。 好似白姐姐話：”一國兩制好成功，唔係我地都唔可以o係度做節目。”一方面可以話係香港有言論自由，但另一方面亦可以話係內地無言論自由，連抱打不平都要做監躉(詳看：潘小濤﹕查豆腐渣能持有什麼國家機密)。講到言論自由，香港最有言論自由既地方就係逢星期日中午既維園。維園阿伯聞名於世，佢地最憎就係泛民班搞屎棍，每次泛民一出現維園阿伯都會喪鬧佢地，但係有無諗過如果有普選的話，佢地可以用選票去支持建制派而唔係只能夠每個星期日走去城市論壇喪鬧班泛民？
o係古時，老百姓既希望係活在當下有個好皇帝，估唔到呢個傳統可以沿用到依家。尋晚睇有關四川大地震既記錄片”1428″，當敢怒不敢言成了自然，覺得投訴都改變唔到o的咩既時候，睇黎”老百姓”已經習慣政府的缺失。唔知香港幾時都會變成咁呢？
第一次失戀之後，我曾經以為我不會再愛第二個人，我錯了。
眼看以上Youtube，再一次驚覺原來人真係會變。曾經係極度熱血既我，火已經熄左一半，但尚有丁點原則到現在我仍覺得要堅守。寫這篇Blog是想為自己做個記錄，讓N年後的自己看看與過去的自己有甚麼巨變，突變。
幾年前朋友A跟朋友B因為錢銀瓜葛而炒大鑊，當時我分別見過朋友A跟朋友B，他們在說同一件事，但版本卻有兩個。自此之後我學到一件事：與其either相信朋友A跟朋友B，不如信自己。(其實還有一樣： 講朋友壞話最好o係朋友面前講，否則只會溝成朋友間分化，再分拆做唔同既小圈子。)
近期在talkonly談及有關Blog的事，我一直提出現在Blogger談及兩個方向：一) 如何將主流媒體帶入Blog界 二) 讀者對Blogger的信任度，而我是屬於維護讀者的後者。我聽過唔少跟大大少少Blog有關的”Making of”，就像看到旺角那些茶餐廳後巷一樣……我將那些”Making of”跟我女友說，然後她問我：點解唔得講出黎？
在talkonly主持的立場，我唔係想一竹篙打一船人，只係在唔阻人搵食情況下給聽眾及讀者去了解一些事情，而目的唔係想大家唔信呢樣野，而係當”Google”變成”Google大神”，大家覺得在Twitter神下可以找到世上真理既時候，我地在INPUT和OUTPUT之間好像Skip了一個Step – 思考。
作為一個網民 / 讀者，在資訊爆棚既年代，同一個問題可以有上萬種答案，我們需要有清晰思維去判斷我們需要的是甚麼，唔能夠盲目去相信INPUT得來的OUTPUT。而作為一個Blogger或者傳媒人，廢話地也要說一次：能力越大，責任越大。我們需要的不單是對得住自己的良心，還有對得起別人的良知，這就是我想說的。
當看到人們講一套，寫一套，做一套的時候，我對這個世界感到很厭倦，點解要咁做呢？有些Blogger所想的跟所寫的不一樣。有些Blogger因為知道”有人”睇緊佢個Blog，特登唔寫某o的野。有些Blogger參加了俾面派對，唔想得罪某o的人。我所厭倦的不是”他們”所做的，而是”我們”所做的 – 包括我。
人在世俾盡你一百年命，都係得三萬六千五百日，其實都唔係好耐時間，點解要搞到人同人之間既關係咁複雜？點解對住你笑緊既時候內心可以係小緊你？點解唔直接o的小你呢(唔好同我講呢o的叫禮貌)？”我們”所做的真的很難理解。
唔知幾耐之前有朋友睇我手掌既生命線頗短，九成係短命種。而我覺得個天到今日仲俾我呢個短命種活在世上而且過得唔太差係有佢既原因，我希望可以用我僅有既空間同尚在人間既日子去講我所相信。
在此我要對各界友好萬分對唔住，我知到呢幾年在Blog同talkonly言談間得罪左唔少友好，但在我字典中是沒有仇家二字的，如對各位有任何得罪請多多包涵。
無論有普選定無普選，有得揀定無得揀，可以話定俾各位聽，唐英年有超過大半機會做下任特首，而以上就係佢既真面目。佢既答案對何秀蘭不尊重，對全體議員不尊重，更甚係對全香港人不尊重。好難想像點解咁既人都做到特首，香港真係無人材？點解香港會變成咁？請容許我Quote一Quote友好在Facebook的Description
大家有沒有發覺，回歸11年後，香港人已經成功地由一群
自強不息、默默耕耘的人，transform成為一班不學無術、唯利是圖、輸打嬴要、飯來張口的無賴？我們上一代的風骨去了哪裡？
政改資詢出台，五區總辭成數甚大，政府第一輪公關戰用”公帑”做議題，話補選支出要用成點五億，潛台詞明顯係話泛民浪費公帑，我既睇法係 – 要數浪費公帑既事有排都未論到五區總辭。泛民要做一次政治豪賭，無錯，係”豪賭”，我完全唔覺得泛民有必勝把握。而香港人最後要付出的，唔係o個一點五億既公帑， 而係我們如何承擔自己所作的選擇。贏左既話最怕泛民好似當年71臨門一腳淆底，輸左的話就如新加玻資政李光耀所講，
中國人可能真係唔需要民主。
有o的人話現在政府一無事處，對於我黎講特區政府最成功既地方就係令我呢個香港人無晒Vision，是是但但啦。
今次為各位介紹兩部電影有一個共通點 – 票房大收。”2012″在可見將來美國票房保守估計最少過億五美元，”Paranormal Activity”在剛過去的週末全美票房已突破一億美元。不過製作成本卻是天淵之別，”2012″製作成本約兩億美元，”Paranormal Activity”製作成本卻只需十一點七萬港元。
“2012″導演Roland Emmerich係拍災難片既專業戶，無記錯的話對上一部”明日之後”票房係當年本地全年總冠軍。”睇人仆街”唔止係香港人既喜好，係全世界既喜好。只要災難夠慘，死人夠多，災難片永遠唔愁無市場，所以兩億美元成本並唔係常像中咁高風險。正所謂”AV最緊要睇動作，2012最緊要睇特技，劇情並唔重要”。作為計到盡既商業片，”2012″成功原素有三：1) 對上一套”明日之後”有觀眾話死人冧樓既特技已經o係Trailer出晒，入場有點搵笨。今次全片158分鐘最少有3/4死人冧樓，地球能夠發生既災難佢差唔多俾晒你睇，保証睇到你嘔； 2) 黃子華講過，睇人仆街最好”越近越好”，”2012″距離現在只有三年，話題性特別強； 3) 討好內地觀眾：2012結尾來過中國救地球，內地觀眾一致讚好，內地票房再賺一筆。
正所謂職業無分貴賤，睇戲無分高低級。欣賞電影純粹各取所需，睇”斷背孕記”唔代表藝術水平高，睇”2012″唔代表膚淺。咁樣講我諗唔洗再要我畫出腸喇啩？
另一套睇左既戲係仲未上正場既Paranormal Activity 午夜靈異錄像，睇”午”片既原因係佢打破左SAW近年壟斷美國Halloween開畫票房既局面，想睇下佢有咩咁特別。尋求刺激既人對呢部片可能會有點失望，11.7萬港元既製作你覺得o的鬼有幾猛？呢套片橋妙在於以mockumentary(紀錄形式，類似死亡雜作同末世凶煞)拍攝並且生活化，電影由頭到尾都無地震同海嘯，拍黎拍去都係飯廳同睡房，但能夠令觀眾將恐懼帶出戲院，抵導演賺到笑完再喊。
低成本美國鬼片激賺6666倍
你好，
本人乃百老匯院線常客，平均每觀看十部電影最少有一半都會在百老匯院線欣賞。近期每次觀看電影前都會看到”蘇乞兒”的電影預告，那六段每段約廿秒以”2010第一期待”為題的洗腦式電影預告實在令觀眾反感甚或比廣告更擾民。
近期跟身邊朋友談起都覺得這六段Trailer頗為反感，直到今天晚上剛剛在嘉禾荷里活看完2012，才發覺電影開頭沒有了”蘇乞兒”Trailer真的舒服多了。我知道有關電影Trailer不是只有百老匯院線播出，但由於該片發行商是安樂影片，因此希望向你們作出友善建議。
本人並不期待貴公司會因為本人這封電郵而抽起有關電影Trailer，少了我一個觀眾對於貴公司亦不是甚麼損失。可能你們會覺得奇怪為什麼會有人為了Trailer播出而電郵給你們，但作為常看電影的觀眾，每次準時入場換來的是看那個”蘇乞兒”Trailer實在是煩得要吐了。說坦白我是從來未試過為了一段Trailer而這樣長篇大論。我想提出的是，電影Trailer的原意是剪緝精華片段甚至對電影故事大綱作出概述以吸引觀眾入場的，如今”蘇乞兒”的Trailer實在是本末倒置，建議你們盡快更換Trailer並盡快抽起現有的，感謝。
題外話(這個沒有發給他們)：在搜集百老匯院線資料時無意中看到一位網民的說話很有道理。
我一向認為,
網上購票不應有手續費,
故非常同意佢呢點.
反過來,
我冇麻煩佢個票房職員侍候我,
應該可以有網上訂購優惠.
蘇乞兒的Trailer(在戲院觀看時是1 -3一次過播，然後播另一Trailer，再播4-6) 按全文觀看
Read more…
Recent Comments