小弟好辣係唔少朋友都知道的，食野係求開心唔係為啖氣，老實說我食傷心酸辣粉都只係食到”BB辣”，”小辣”已經唔多得，鐘意食辣同食得辣係兩回事，我係屬於前者。
今次介紹既四姐川菜係位於灣仔一棟住宅大廈內，地下要先禁鐘上去。因為當晚比較多人老闆安排我地坐一間細房，其實應該係佢地”住處”，名符其實”私房菜”。”四姐”收費係定額位位HK$200的，點到幾多菜就視乎有幾多人，越多人去點既菜當然越多，小弟比較大鄉里，唔多知道係咪通常私房菜都係咁收費。如果真係要比同聯記比，我覺得”四姐”有一樣十分重要既優勝之處，就係每道菜既味道都有所不同，食得辣既人都知道好多店都有個通病就係辣得好食，但係道道菜都係一個辣味，”四姐”辣菜都算係味道多樣化(其實佢地有唔辣既菜)，這是小弟十分欣賞的。小弟特別推介有四川涼麵，辣得來有少少酸，相當開胃。另外有水煮魚，夠滑夠辣仲要夠多!! 話說原本係一行四人但係有一個遲左成個鐘先到，佢黎到其實我地三人都食到七七八八，我地叫多左個涼麵同水煮魚，老闆特登再送多個碟菜同青瓜，水煮魚份量仲要加大，原本差唔多飽既我地直情係飽上加飽，抵食!!
基本上呢餐係食得飽滿有餘，自問盆水煮魚都食左幾多，但係最後都要打包，仲要分三個發泡膠盒載。建議有返四五個人以上先好上去食，記住要先訂位。
地址：灣仔駱克道285-291號高華大廈2/F
電話：28022250
Openrice
在較大的地圖上查看NetBugs 美食版圖
曾特首話貧窮人口問題係可以靠經濟增長解決，而事實係現在香港所謂的經濟增長某程度上大部份財富都只在少數人身上，反之窮人在經濟增長下只係變得更窮，簡單而言香港的經濟增長與貧富懸殊成功接軌了。
工聯會….係工聯會既葉偉明議員都忍唔住丙佢一鑊：唔怪得我地同你傾咁耐都無結果，原來你同我地對貧窮定義既睇法係爭咁遠。我諗曾特首唔止對貧窮定義睇法同市民有差距，而係對大部份社會事都同香港人睇法有脫節之嫌。
我諗香港大部份理性既中產其實對政府係真係無咩期望，甚或已經唔知咩係期望，香港係一個無願景，今朝有酒今朝醉既地方，賺夠就撇係唔少人真真正正既 夢想。中產真係對政府無咩要求，我地只係求付出(交稅)不求收穫，可惜政府往往收”鑊”多過收”穫”。特首話樓市急升只係少數豪宅，一般市民買既樓價格未 有出現泡沫情況。此言一出，新聞報導唔少豪宅業主即時封盤兼加價，咁非豪宅係咪代表就係普通市民就買得起呢？咁就要首先定義何謂豪宅。以前，豪宅應該o係 港島半山，依家豪宅都係o係半山，不過係何文田半山一號。以前，豪宅鄰居應該係李超人之類，依家豪宅樓下就係砵蘭街。根據現在發展商規劃，全部樓盤都可以 係豪宅，十八區都可以係豪宅區。特首在答問大會以1997年樓市高峰期同今日樓市做比較未免過於取巧，如果資料無錯，被黃子華稱為”浩劫灣”既”灝景灣” 當年高峰期呎價達八千元，買o個o的人真係唔係諗住自住，純粹齋炒，當年炒樓炒到連樓都唔洗睇已經可以簽約。香港地少人多，好多香港人打工只係為供層日日 都對住既負家產，政府係咪應該諗下可以點樣幫到市民安居樂業呢？
我並非完全反對曾特首所講，佢話”政府摧毀樓市既力量係好大，唔好逼政府”我係十分認同。如果曾特首在施政報告話”八萬五返黎喇”負資產重臨問題必 然更大。請恕小弟馬後炮兼膚淺地提出無敵論：如果當初政府真係明白香港繼續單靠金融地產托經濟係有問題，其實上年跌市時候應該已經要為樓市適度調控作出準 備。呢排成日o係商台聽到蘇絲黃幫馬會做既宣傳聲帶，強調馬會收入幫助NGO幫助政府稅收，其實有無諗過如果班賭仔唔賭錢去其他地方消費，政府一樣有辦法 從其他稅項取得稅收，同樣香港唔炒樓未必會死，經濟未必會差。(純粹舉例，呢個世界當然無咁理想)
講到活化工廈，依家好多文化藝術工作者或者需要大地方既小本經營者都會租工廠大廈做Studio或者Office。施政報告提及活化工廠其實某程度 上就係想幫助文化藝術或者新式產業進駐，但事實係施政報告一出工廈租金即升一成，政府好有可能最後只會幫倒忙，名符其實”食野唔做野，做野打爛野”。黃毓 民今日有句說話很精警：數字係識得說話。我同各位講：股價係最客觀。
特首「四招」活化工廈，麗展(0488.HK)發力追落後
我份人比較樂觀， Pixar既”五星級大鼠”給予小弟不少啟發。曾特首代表著其中一個成功既勵志香港人故事，因為原來”人人都可以做特首”。但願下年施政報告曾特首出黎只 講一句：”我無野講喇!!” 然後閃人，小弟定必拍手叫好。如果社民連在網絡動員打手喪鬧曾蔭權，小弟就算係唯一一個打手都會落足力在Facebook同Twitter撐行佢。如果 Phone In節目曾蔭權俾人圍插我一定打上去插返o個o的聽眾轉頭!!
我同大部份香港人一樣，十分喜歡行大商場，無他的，有野睇，有冷氣涼，連個廁所都好過我屋企o個個。大商場為香港人帶來便利的同時亦令到香港越來越少特色，每個商場都係一個Clone，食既都係板前板後，著既都係Uniqlo，Izzue，好處係去呢o的連鎖店只需要揀最近o個間就可以，但大商場只引入大型連鎖店變相令消費者選擇少了，所以非由大地產商所管理之商場仍然有其存在價值。
因為工作同住處都係葵青區，所以成日都會去葵芳搵食(青衣真係無咩食)，尤其係葵涌廣場。早年通頂o係葵芳做完野放工一定會去開24×7既草根食堂，麥記早餐四點先有，佢地早餐三點已經有，每次都係食早餐A – 火腿通粉 (有無人知點解早餐通粉default一定係配火腿？)。唔知幾時開始，葵涌廣場三樓變左條食街，由放學到放工，放工到宵夜都係場面墟冚，近期”食街”由三樓延伸到二樓，大家樂對面開左間賣台式飲品既”麻吉兄弟“，唔洗講當然係人頭湧湧。另外回味無窮亦都擴充營業，細鋪變大鋪。”回味無窮”即係新都會天橋直入葵涌廣場行到最入，自不然就會聞到好香既咖喱味，無錯，呢間就係”回味無窮”。可能你食左佢o的咖喱魚蛋咁耐都唔知佢叫”回味無窮”，其實佢o的糕品好似紅豆糕亦都非常得。o係”回味無窮”行入些少斜對面有間”小廚獅“，除左一樣有咖喱魚蛋，呢度仲有外賣飯天使麵之類，小弟試過佢個細碗肉醬珍珠飯，肉醬好足料，而且所謂細碗一o的都唔細碗，重點係 – 碗飯只係十蚊就有交易，絕對係平霸，我諗平時學校放飯o個陣呢間野會幾好生意!!
最後想介紹係三樓既”Fusion Ice“，坦白講Fusion Ice既棉棉冰唔會比糖白府既差，甚或喜歡小甜的話會覺得Fusion Ice更好食，夠棉夠味，價錢亦只係糖白府既一半(廿蚊有找)。不過由於店內無坐位，要人地企o係度食咁大盤冰的確有點難，所以生意似乎唔太好，希望唔會結業啦，因為呢間算係我o係香港食過最好既棉棉冰。
何謂正常呢？
搭地鐵用和記打唔到電話上唔到網 – 正常。
去到一間排長龍食店排左成粒鐘先有得食店員仲要口黑面黑 – 正常。
香港人返工放工趕頭趕命見慣不怪，但係連食野都要排餐懵，講真小弟真係接受唔到。唔知幾時開始香港人接受食物好服務一定差，從搵好野食角度黎講都無錯既，服務差唔緊要，問題係你係咪真係有咁好食先。但係有時放工出街食個普通晚飯，返工仲受唔夠氣咩？只要唔太難食，服務唔太差，價錢唔太貴其實已經好好。今次想為各位介紹兩間服務唔錯既食店，兩間我都覺得食物唔錯，服務亦幾好。
滿口福
呢間小店都算幾隱敝，唔行到門口o個一刻你都仲搵緊(因為無大招牌)，主要食火鍋，不過亦都可以預訂小菜。如果第一次去食既話必食係花雕蛋白蒸蟹(唔係火鍋料黎)，的確整得幾好。火鍋料都係大路野，不能不提係佢個蕃茄湯底，我地Order左個蕃茄牛坑腩湯底，蕃茄味的確很濃。我覺得滿口福最好既地方係定時定後提你o的野可以點食法，好似蒸蟹個花雕汁底教你可以撈烏冬食(另叫)，火鍋食左陣煲入味可以飲個湯底，雖然有人話飲湯底唔衛生，不過個湯底的確幾好飲，有點似牛尾湯，小弟都係第一次飲湯底飲左兩碗。還有佢地個自製既飯後糖水”生磨腰果露”亦係十分得，我本身唔多好呢類中式糖水，但係呢碗生磨腰果露的確十分滑，好似溶左既雪糕咁。留意呢間野如果食得海鮮既話都要預每人兩三舊水落樓，如果齋食火鍋當然平好多啦。
Openrice
在較大的地圖上查看NetBugs 美食版圖
金利來
金利來係由牛下一直開業至今，由於牛下清拆在即，主場已經搬左去九龍灣工廠區，由德福步行約需十分鐘，亦可以打電話去金利來Call轉車o係牛下或者德福專車接送。金利來主要食小炒，上星期同屋企人去食晚飯，正當想叫多味菜，佢竟然話：你岩岩叫o個o的夠食喇，唔使再叫，可見老闆份人都幾老實。以下為主要推介：
口水雞：同一般口水雞唔同，佢地既口水雞酸多過辣，個汁都幾開胃，各位可以試試叫個淨米走湯撈口水雞汁，呢個食飯係老闆推介的。
其他推介：芝士蝦丸，鹹魚蒸肉餅，避風塘茄子。
Openrice
在較大的地圖上查看NetBugs 美食版圖
黃子華在其棟篤笑講過：社會，科技o既進步同時帶來一o的問題，而呢o的問題佢認為未必能夠解決。
大約一星期前，一名姓趙女子在YouTube上傳一段短片，內容大致係因為廿蚊差價而鬧爆一位Shop Manager。後續發展係，”網民”不滿趙小姐所作所為引起一場起底浪潮。除左相片，住處，就讀大學之外，最新消息係有網民投訴佢涉嫌逃稅。
在此我不多講A有幾岩，B有幾錯。在文明社會之下，你桶我一刀並不代表我要桶返你一刀，兩者唔應該有因果關係。所謂”起底”是對是錯我不敢作一個客 觀定論，但我的主觀判斷認為事情已經發展到過火的地步。趙小姐做的是對是錯我不多談，要談的倒是我們這些在食花生等睇戲的站在甚麼位置。
文章主旨”網絡欺淩”指出的不單是網民對趙小姐的攻擊及起底，還有就是在看這件事情發展中的我們，如果我們將事情當作娛樂版C1頭條來作茶餘飯後的 話題，我們某程度上已經是”網絡欺淩”的一份子。說坦白，我沒有道德光環，唔睇唔講無可能，至少希望各位明白大家站在甚麼位置，應該甚麼心態看待這件事。 如果各位覺得起底組做得好，有好戲睇的時候，下一個被起底可能就係你。
這件事的發生亦令我想帶出兩個問題，首先趙小姐再一次給大家一個正面教訓 – 唔好將你屋企擺上網。我一直認為上網用Facebook Twitter已經等於出街露械，乜野都俾人睇晒，但最重要唔係點樣避免呢個情況發生，而係要接受呢個事實。講就咁講，不過有o的無謂既相(工作證之類) 可免則免。FB最好唔好有同事連繫或者最好公私分開。最後一句，自求多福。
另外有關這件事有一方好像未有人提及過的 – 論壇負責人。那些坐擁大量廣告收入的大型論壇，為甚麼論壇負責人可以完全沒人察覺問題嚴重程度讓事情發展得那麼”順利”，可能我說網絡需要監管令你感到不 悅耳，但我更怕這句說話是由政府說出來。話說回來傳統媒體每每在這些起底事情發生後大大聲講：網絡無王管。容我Quote下今期東週刊封面故事的最後一句：
趙燕萍濫用網上平台攻擊他人固然不對，但網民肆意侵犯別人私隱亦不見得道德，看來是時候研究如何加強監管網絡世界。
看看東週所謂保障事主的薄格相片，在此我要向那些佔了便宜又要批評”網民”不道德的傳媒說句： 你們比你們口中不道德的”網民”更不知所謂。
Recent Comments