臨近放榜，宣傳得最勁o既唔係教育局，唔係考評局，而係IVE同各大補習社集團。其中最為出位o既廣告係我尋日不斷o係電台聽到既活學教育廣告，內容大致係：”唔搵Miss Tann補英文，會考拎U都唔抵可憐”，我想講呢o的廣告真係邊叉個諗出黎，人地唔搵你就唔抵可憐，未免自視過高兼且唔多尊重其他會考生吧？
香港社會的確很虛偽，這邊廂電視鏡頭紛紛報導10A狀元有幾勁，那邊廂會考26分既森美同你講佢自己都唔係咁高分，分數唔代表一切，你信唔信？事實係：如果分數係呢個社會唔係咁重要，就唔會有咁多學生走去幫襯補習社，香港就唔會有補習天皇天后存在。會考高分既相信都唔駛o係度點講，至於低分的話小弟有些事可以跟你們分享。
我諗唔係我自己講出來的話，應該無咩人會信。小弟會考分數係極低，極低, 極低。我唔會話自己唔係讀書材料，不過無乜興趣讀書係真。所以我無選擇重讀，反而讀左個Dip，之後做過一年腦場，一年Office。最後因為考Dip同頂唔順舊老細二手煙Quit左份工，自己開左間公司出黎。原本諗住只係當Part Time，真係無估到會做到今時今日 (詳見 You see me good, I see you good! (2))。公司初期出技術困難有些時候都是找朋友幫手，但係搵唔到人幫手自己又搞唔掂既時候只有一個解決方法 – 點都要死掂佢。我唔會話自己係會考低能兒既成功代表，但至少有一家屬於自己o既公司，不愁食衣住行。我唔會Proud of我自己會考極低分，不過我諗我算係可以代表會考低分唔等於完全無前途，最緊要係要知道自己想做咩。了解自己想做的唔係掂硬，不過唔了解自己想做的就死硬，俾你U grad出黎都好難o係呢個社會生存。
還記得數星期前我以”除了感謝，還有感謝”在talkonly論壇內答謝網友對我們的支持。今次要對網友說的是：除了抱歉，還有抱歉，因為這次飯局的確拖得太耐，小弟因工事繁忙實在未能抽時間安排有關活動，另外亦希望每次活動可以有點”意義”才決定舉行。
是次飯局係因為小弟願賭服輸所以請各位聽眾食飯，日期已鐵定為九月十七日星期四晚舉行，暫定係食中菜，希望大家唔會Expect有鮑參翅肚，但係一定唔會得白飯俾你食。是次活動係有收費的，每位HK$50 – HK$100，你想俾HK$50定HK$100由你選擇，收益將不扣成本全數捐出。
在上星期節目已經提及過，我仍然算擇了鮮魚行學校作為是次活動之受惠機構，因為我想大家再次記起這家對本地教育別具意義的學校。香港人善忘，今天大家好像只記得正生書院，而事實上需然幫助的又豈只一間正生書院。可喜的是，我相信香港人善忘不善變，敬請各位多多支持，謝謝。
活動截止日期為本月廿五日，有興趣參加者請電郵至 talkonly@talkonly.net ，我們會盡快電郵給閣下付款資料及確認，謝謝。
今日晏晝落Taste買麵包，我前面得兩個師奶等緊俾錢，當Cashier o都到一盒HK$20蚊蛋糕既時候………
師奶A：都係唔要喇
Cashier：好……呢件唔要…..
師奶B：點解唔要呀？
師奶A：咁貴……
師奶B：試下丫麻
師奶A：咁買啦，我要返呢件……..
點解呢對師奶買野之前唔睇下價錢呢? 有時o係便利店或者超市買野真係幾複雜…….先生有無自備購物袋呀？多謝支持環保!!先生買唔買利賓納橡皮糖今日特價？先生有無易賞錢卡？先生Look卡定o都卡呀？先生用唔用Enjoy Dollar呀？分分鐘佢問你既問題多過你買緊既野。難怪師奶活躍股壇，今日你開市時間，買和黃股票要用既時間一定比落百佳買野短得多。大家都要”排隊”，不過一般都唔駛等好耐，唔會有人問你有無自備購物袋，唔會有人問你：先生有無興趣買埋1097，岩岩落左好多喎!! 唔會問你點俾錢，銀行懶安全，限制特別多，唯獨炒股戶口，有心跳既人都開到…….講左咁多廢話，唔知o的超市可唔可以簡化下Cashier o的台詞？既然多謝支持環保唔係真心，出位價既野又唔係咁出位，不如唔好講啦，我地受夠喇!!
在不到兩星期前，小弟突然收到好友威哥電話，他說想找我幫手做司儀，我想也沒有想，了解也沒有了解就立即答應了。
如果你覺得我為人大方那你就錯了。我是十分記仇的人，但更加記恩。威哥是我的Best Friend，他算是第一個為我興祝生日的人，那天他只是踫巧打電話給我，一知道是我的生日就二話不說叫我出來，當時其實我已經吃過晚飯，但還是出了去，雖則只是在許留山閒聊，但對我來說我是很感動的，人生就是如此，感動的未必因為其價值。
原本做司儀對我來說是些少緊張而已，因為我…….自真正懂事以來是從未去過飲的(白事去過三次，差館去過無數)，人生的第一次去飲，第一做司儀。就如朋友A說：你做開網台主持實掂啦，不過我連”飲”是怎麼樣都不知道呢！然後朋友B道：做司儀可免則免，因為做得好還可以，做得不好就一世了，因為這可能也應該是別人的唯一一次。這刻我才驚覺”問題所在”。
晚宴最終在昨晚舉行，十分感激Partner兼好友Pierre跟Andrew的幫助，自問昨晚表現還OK啦，只是有人不太滿意我沒有怎樣玩一對新人而已。說坦白，每當想起跟威哥談及婚禮籌備是怎樣麻煩，我就不忍心再玩他。我從來沒想過Book教堂行禮是要上堂，見社工，同神父談談心(每次談兩三小時)，下星期度蜜月，旅行社昨日才通知他成團……
以下是我在台上最後跟威哥所說的：
“剛剛跟Francis(威哥)伯友談及Francis籌備結婚十分麻煩，我聽見就怕怕。然後伯友跟我說：就是因為這麼麻煩，所以才會一生人只有一次，亦因而會珍而重之。在此祝一對新人永遠幸福，快樂。”
可能你們覺得一生人一次是笑話，可能你們覺得結婚的正解是”結分”。我，經歷過這幾年已經由理想主義者變成極度現實主義者。容我在此偷換概念引用前國家主席江澤民先生的一句說話：sometimes simple, sometimes naive。就是這一點簡單，就是那一點點的稚氣，人生才會過得快樂。
Recent Comments