可能大家覺得我冷血，無人性。不過我真係不時有個疑問：點解豬牛羊雞都食得？但係貓狗就唔食得？仲要係犯法？因為貓貓同狗狗夠可愛？豬牛羊雞就唔可愛？我地人類唔單止要食佢地，仲要餵好野俾佢地食，然後殺左佢，發明和牛，幫佢地分埋級數，越貴就越靚，越靚就越好食咁話，諗落都幾變態。
“其實有人都會搵豬做寵物!!” 朋友說道。
雖然無講出口，其實我想問：如果隻豬死左咁應該埋左佢……定係食o左佢？原來今時今日仲有一個新方法：做標本。這個是繼尿兜養錦鯉偉大祖國又一創新發明，將去世寵物煎皮拆骨再砌返寵物神態出黎，放o係主人屋企好讓主人”睹標本，思寵物”。用一個咁殘人o既方法去懷念自己最愛o既寵物，所以在祖國：沒有不可能，只有硬道理。
想當年，小弟真係一個食極都唔肥o既人，因此朋友甚至屋企人都有錯覺以為我唔多食野，所以放工屋企果餐碗飯唔係自己添o既話婆婆一定堆金字塔咁，阿媽Weekend買外賣俾我一定買雙份。事實上，我係好擦得 XD …… 依家”問題”黎喇！今日岩岩去拎驗身報告，原來已經過肥，可能真係少做運動，又坐得多，咁點算呢？節食對我黎講同跳樓分別真係唔大，我係唔會咁睇唔開。所以我決定從雜物房拎返買咗返黎玩唔多過十次o既………WiiFit出黎!
今次測試除o左希望幫下自己用最懶方法以不節食(部份食物盡量戒口)為大原則減肥(其實講到尾係減肚腩)，亦都想試下係咪日日開部WiiFit出黎做運動真係可以幫到你減磅。暫定有以下目標：
- 每星期做不少於四日
- 每日做一次，每次不少於廿分鐘
兩星期後再檢討駛唔駛加練 XD 下星期再為各位報告。
WiiFit, Wiimote, Wii Console，傳說中o既”封塵三俠”
WiiFit顯示24.26BMI係標準，BodyCheck顯示23.99BMI，但標準係唔多於22.9 = =
經過極品介紹後，小弟帶各位由一個地獄就去另一個地獄 – 食辣o既地獄。今日無意中睇睇下開飯得知有間食四川菜o既小店，其中網頁介紹o既酸辣粉我記得係曾經食過，就係幾年前o係舊老細度做野老闆娘買俾我食，所以一見之下剛剛晚上就決定去紅磡見識下。好可惜，酸辣粉賣晒，淨係試左麻辣牛脷同豬耳涼麵。一般食開o既辣係真係得個辣，食到頂唔順，投降唔食。聯記o既辣唔係得個辣字，辣中有味，食完條脷真係會麻，唔食過真係唔知咩叫麻辣，喜歡食辣o既人一定會喜歡聯記。不過留意，由於老闆每逢月尾廿一到廿七號都會返四川買料，期間會停業，去到實摸門釘 :p
未能食素聯記川王涼粉 – atnextmotor.com
聯記川王 – openrice.com
TEL:21277559
地址：紅磡黃埔街1號地下 (即係時新隔離)
大家都知小弟最愛台灣，其中一個原因係台灣人服務態度好很多。林海峰o係自己棟篤笑都總結過香港服務態度 – “多晒”，名符其實求鬼其。我聽得最多果句”多謝支持環保”，真係聽唔出佢有幾多謝我支持環保，有時真係覺得，咁例行工事o既話其實我唔介意你唔講的。小弟幾乎每次去台北都會幫母親去一間鋪頭買文具，員工唔係大家o係無名小站睇開果o的台妹，不過對客戶o既笑容，一句多謝都俾香港的鋪頭員工來得真心。試過一次o係台灣食Shabu Shabu，定時定後會有人問你駛唔駛添蔬菜，講緊兩個人埋單只o係港幣二百元有找o既食店，香港何來這樣的服務？
小弟一直本著理解同忍耐的態度接受一些不合理的服務態度，不過真的不得不為各位”推介”呢間”極品“。話說小弟母親去呢間上海菜餐館外賣幾個菜肉包，當母親問可唔可以買多兩個，個Waiter竟然同我阿媽講：係咪玩野呀？過了一會，母親再問要等幾耐，個Waiter再答：依家唔駛整呀？ 嘩，又話金融海嘯o既？幾時到呢間摺？
PS：我唔係單單因為呢個原因為各位推介呢間”極品”，其實早前都有提及過。話說小弟好耐之前去食飯，諗住點個菜飯，Waiter竟然話：無菜飯喎，但你可以叫碟菜加一碗白飯。請恕小弟真係從未食過無菜飯甚至唔知咩係菜飯o既上海菜館。仲有好似炸過食落脆過薯片睇落成舊炭o既炒鱔都令我留下深刻印象。各位，我地覺得食o既野好食係因為食過難食o既野，如果係咁大家可以試下呢間極品喇!
我有好多事都不明白，點解BUSH競選連任仲會有人選佢？點解陳水扁競選連任仲會有人選佢？點解阿扁今時今日變埋2630仲會咁多Die hard fans？究竟支持佢地o既人心入面點諗？真的很難想像……
看過木村的CHANGE，再看看今天的立法會通過特權法查雷曼，感嘆香港真的病了。我相信有不少市民仍然覺得那些雷曼苦主貪錢，抵死。但那些苦主部份於銀行一直在做定期，息率的確跟迷你債券接近，用貪錢，抵死形容他們有欠公允，銀行欠打門的不只是金錢，還有一個公道。
很難想像最積極為銀行護航的是我們的政府，陳家強局長一直強調展開調查會影響香港國際金融中心地位，敢問影響是指甚麼影響？如果銷售手法存在根本問題，那很自然會推上到監管問題，如果不調查就不會影響香港國際金融中心地位，那無王管是否香港國際金融中心的核心價值？如果監管出了問題，應該盡快糾正，避免再有類似雷曼苦主情況出現，而這個就是政府應該做的，現在最高調反對調查的竟然是政府，我還可以對政府有甚麼期望嗎 ?
那邊廂民建聯強調苦主取回本金先決，不是昨日有苦主又跪又拜民建聯副主席，今天他們會投支持票嗎？ 我不知道，但一個要市民”又跪又拜”的政黨有幾好大家好想而知。現在就好像路人甲被朳銀包，警察來到，賊人把銀包丟到地下走了，警察告訴路人甲：不要再追，取回銀包就好了。這是甚麼道理？民建聯到底在怕甚麼？
Recent Comments