To share what i see…

小弟記得好幾年前，想打去o的電訊服務公司熱線搵個”人”聽電話係一件幾咁難o既事。還記得當年打電話去香港寬頻，當你揀完廣東話同技術支援之後，就會一連串畫鬼腳問題，例如”有無查過控制台TCP/IP設定？有請按一，無請按二”，你要答晒差唔多十題畫鬼腳問題証明你係真係上唔到而唔係自身電腦問題先會轉駁去真人接聽。唔好以為聽到”你好，香港寬頻，我係NetBugs，有咩幫到你？”就係終點，其實呢個先係艱辛o既開始，因為呢o的CS(唔只香港寬頻)佢地First Priority係Prove個問題唔關佢地公司，而唔係幫個客解決問題。而作為”客”o既我First Priority就係說服CS個問題係關你地公司事，令CS肯定你做Further Action。友人曾經有個Case係用網上行，有時上到網有時上唔到，聽落好虛無縹緲，其實可能係因為Netvigator Load Balancing 問題，令每次上網只能夠上到尾數係單數或者雙數o既網站，即係依家上到單數IP網，就會上唔到雙數IP網，重新連線後就會倒轉。慶幸小弟遇過呢個情況所以可以幫友人表達俾CS聽呢個問題，如果唔係CS只會同友人講：你CHECK左你部電腦先啦，我地好正常喎。

聽起上黎呢班CS真係好黑人憎，但作為CS界別一份子o既我，小弟係好理解的。大ISP每個CS員工平均每日分分鐘聽過百個電話，其實過半查詢往往都真係唔需要打電話問但係可以講成半粒鐘，CS都係人，聽得多呢o的客查詢坦白講真係好難再客觀去判決個問題係關邊個事。所以真係希望各位網友打電話問問題前Check清楚避免呢個惡性循環加劇。